Pirang’o Jumulembe pa Yehova gitimo ngo foc mi nindo mi nyoliri?

Jumulembe pa Yehova gitimo ngo foc mi nindo mi nyoliri pilembe giyiyo nia foc maeno nyayu ngo mutoro i Mungu. Kadok nwang’u Biblia ukwero ngo ndem ndem nia etie rac nitimo foc mi nindo mi nyoliri de, ento ekonyowa niparu kilili iwi lembe ma pigi tek ma timere i focne man ning’eyo nen ma Mungu tie ko iwi foc maeno. Kenen lembe moko ang’wen iwi foc maeno man cik mir ukungu mi Biblia iwi lembene acel acel.

1. Jukafiri re m’ucaku the foc mi nindo mi nyoliri. Buku moko (Funk & Wagnalls Standard Dictionary of Folklore, Mythology, and Legend) ukoro nia foc maeno uai kud i yic ma nia i nindo ma jubetimo iye foc mi nyoliri pa ng’atu moko, “tipo ma reco copo nyayu peko i kume,” ento “bedo nuti mi jurimo man mugisa ma gimiyo ire gwoke i kum peko maeno.” Buku mange (The Lore of Birthdays) uyero nia i rundi ma con, goro nindo mi nyoliri ubino “lembe ma pire tek lee pi nitiyo kud horoscope” m’ujegere iwi “somo lembe iwi nyikaluku, i ther atelatela mi tipo m’ucido.” Bukune umedo nia “juyiyo nia buji ma juwang’u i nindo mi nyoliri utie ku copo mir udu mi ketho mugisa ma jubekwayu ni ng’atune uwinjere.”

   Ento Biblia ukwero lemb’ajoga, lamu bila, weco ku tipo, kunoke “wagi gin ma kumeni.” (Poi mi cik 18:14; Jugalatia 5:19-21) Ku lapor, Mungu ugam upoko lembe iwi adhura mi Babeli ma con, pilembe dhanu mir adhurane gibed gisomo nyikaluku pi niewo lembe, ma eno utie ayi acel mi lamu bila. (Isaya 47:11-15) Jumulembe pa Yehova gitimo ngo kero ning’eyo ulang lembe mi suru ceke; ento ka Lembagora unyutho lembe kamaleng’ kamaleng’ kumeno, gilubo lembene.

2. Jukristu mi rundi ma kwong’a gibed gitimo ngo foc mi nindo mi nyoliri. Buku moko (The World Book Encyclopedia) uyero nia “gibed gineno timo foc mi nindo mi nyoliri pa ng’atu moko ci, utie timo mi jukafiri.” Biblia unyutho nia jukwenda man jumange ma Yesu ku kume re m’uponjogi, gitiye lapor ma Jukristu ceke gicikiri nilubo.​—2 Juthesaloki 3:6.

3. Foc acel kende ma Jukristu gicikiri nitimo utie ngo mi nindo mi nyoliri, ento etie mi nindo mi tho: nindo mi tho pa Yesu. (Luka 22:17-20) Eno tie ngo lembe ma wang’u ijo, kum Biblia uyero nia “ceng’ mi tho sagu ceng’ mi nyol ni dhanu.” (Eklizia 7:1) I ajiki mi kwo pare iwi ng’om, Yesu ubino ku nying’ ma ber i wang’ Mungu, uketho pi nindo mi tho pare ubino tek nisagu pi nindo mi nyoliri pare.​—Juebrania 1:4.

4. I Biblia junwang’u ngo jatic pa Mungu acel de m’utimo foc mi nindo mi nyoliri pare. Eni tie ngo wil wic, kum Biblia ukoro pi foc mi nyoliri mi dhanu ario ma giworo ngo Mungu. Ento lembe m’ukadhu i igi zoo ubino lembe ma reco.​—Thangambere 40:20-22; Marko 6:21-29.

Nyo awiya mi Jumulembe pa Yehova ginwang’u nia gikoso piny moko pilembe gitimo ngo foc mi nindo mi nyoliri?

Calu junyodo ceke m’umaru awiya migi, junyodo ma gitie Jumulembe pa Yehova ginyutho mer ni awiya migi saa ceke i kind oro, uketho i iye nimiyo igi giramiya man ninambu kugi. Giii nilubo lapor ma ber mandha pa Mungu, ma miyo piny ma beco ni awiya pare ku berocwinye. (Matayo 7:11) Awiya ma junyodo migi tie Jumulembe pa Yehova ginwang’u ngo nia gikoso piny moko. Wec m’ulubo e m’aradune moko giyero, unyutho lembuno kamaleng’:

• “Etie anyong’a ma lee dit ka jumiyo iri giramiya moko ma nwang’u ibino paru de ngo pire.”​—Tammy, oro 12.

• “Kadok nwang’u jubed jumiya ngo giramiya i nindo mi nyoliri para de, junyodo para ging’iewo ira giramiya i saa mange ma segi. Eno re ma nyang’a lee, pilembe apoy kude apoya.”​—Gregory, oro 11.

• “Iparu nia nambu mi minute apar, de ku biskwith e, man wer acel kende e utie foci? Kebin i bang’a i pacu kan inen nia foc utie ang’o!”​—Eric, oro 6.