Anwang’u nia Yehova tie Mungu ma Jakisa

KWO PARA MA CON:

Adongo i pacu moko mi jucan, i adhura mi Montréal. Kinde m’abino ku oro abusiel, baba gam utho man eweko mama re m’udong’ ucur ku peko mi pacu. I ot mwa wabino awiya abusiel, man an abino cogo.

Dhanu mi kabedo m’adongo i iye gibed gitiyo ku yath mi mero, gituko tuko mi sente, gimaru lem rop man gidikiri ku dhanu ma reco. Kinde ma oro para udoko apar, adoko jaor mi bandumba man mi dhanu ma miyo lon. Abed acwayu ndra wang’ mapol man anyong’a bed unega nivuro dhanu i ayi ceke. Lembene ubino ira calu yath mi mero.

Kinde m’adoko ku oro 14, nwang’u dong’ ang’eyo yore dupa mi wondo dhanu. Ku lapor, abed ang’iewo saa mi or dupa, mangil man lagith, e akiewo beyne i kume nia carats 14 mi or, e acidh alwore i dhu ngudu, man i parking’ mi jukuloka. Anyong’a bed unega mi tuko ngo ninwang’u sente i ayi ma yot kumeno. Nindo moko, anwang’u dolar 10 000 ceng’ acel!

Kinde m’adoko ku oro 15, juriema kud isomo ma jubed jutwinyo dhanu i iye man agam akoso kaka m’akwo i iye. Abed anindo i dhu ngudu, i the yen, kunoke i pacu mi jurimba ma gibed giting’a saa moko.

Nikum dhanu m’abed avuro akeca, ba polisi gibed gitwoyo dhoga ku penji wang’ mapol. Calu m’abed alworo ngo piny m’akwalu akwala, jutwiya ngo i kol. Re abed aculo cul ma dongo nikum vuro dhanu, lworo piny mandha ngo, man lworo piny m’umbe niculo karatasi pa leta. Lworo ubino mbe i iya i kum gin moko ci, uketho abed acamu sente mi dhanu, kadok ku nying’ weg lon bende. Eno ubino lembe mir ariti mi tuko ngo, uketho nindo moko abed awotho kud atum de. Saa moko abed adikara kud ungu mi dhanu ma timo lembe ma reco magwei.

KITE MA BIBLIA ULOKO KO KWO PARA:

Wang’ ma kwong’a m’awinjo pi lembe mi Biblia, abino ku oro 17. Nwang’u dong’ abekwo karacelo ku nyaku para moko m’ucaku ponjo Biblia ku Jumulembe pa Yehova. Ento an, agam akwero cik mi kurajo mi Biblia, uketho aweke man acidh akwo ku nyaku mange ma nwang’u abino weco ko.

Alokaloka ma dit utimere i kwo para kinde ma nyaku para mir ario de ucaku ponjo Biblia ku Jumulembe! Etimo alokaloka i kwo pare, man lembene unyang’a lee kinde m’aneno edoko mol man enyutho cirocir lee mandha. E agam ayiyo lwong’o ma julwong’a ko i coko, i Otker mi Jumulembe pa Yehova. Kuca, dhanu ma giwok gijola gibino dhanu ma mol man jumer. Gibino tung’ ku dhanu m’alar ang’eyo! Nwang’u fodi awinjara ngo nyanok de nia jufwa gimara; niai ma fodi atie nyathin, awinjara ngo nia ng’atu moko umara. Yaw yaw ma Jumulembe pa Yehova ginyutho ira ubino tap gin m’avane ubino nega. Kinde ma gipenja nia gicak ponjo kuda Biblia, ayiyo kud anyong’a wang’ acel.

Abeparu nia lembe m’abino ponjo i Biblia ubodho kwo para. Nwang’u dong’ ku jurimba ario, wapangu nia wacidh wayak piny mi dhanu kara acul ko dolar ma kadhu 50 000 ma tuko uroyo i iya. Ento anyong’a nega lee, pilembe atuc niwok kud i plan maeno! Jurimona ma con gimediri asu ku lembayeki migi. Jugam jutwiyo ng’atu acel i kol, makucelo ke junego.

Kinde m’abemedara ku ponji para mi Biblia, kan abin apoi nia ubekwayu atim alokaloka dupa. Ku lapor, aponjo gin ma Biblia uyero i 1 Jukorintho 6:10, m’uwacu kumae: “Kadi jukwo, kadi ju ma ketho cwinygi hai i kum piny, kadi ju ma mer ku kong’o, kadi ju ma yanyu ayany, kadi weg ayeki, gibimondo ki ngo i Ker pa Mungu.” Saa m’asomo giragora maeno, kit kwo para unyayu wak i iya. Agam anyang’ nia ubekwayu atim alokaloka i kwo para ceke. (Jurumi 12:2) Abino jarop, won ali, man abed ayuyo vupo ayuya.

Ento aponjo i Biblia nia, Yehova timo kisa man eweko dubo. (Isaya 1:18) Abed arwo ma tek, man akwayu Yehova nia ekonya kara awek kit kwo para ma con. Ku kony pare, yoyo atuc niloko kura para. Watimo mediri ma pire tek, saa ma waku dhaku para wakiewo gamiri mwa.

Agamu dhaku man abino kud awiya adek, m’abino ke ku oro 24. Eno re m’ubino saa m’ukwayu ayeny tic i yore m’atira. Re asomo ngo akeca, man abino mbe ku karatasi m’unyutho nia adaru timo tic moko de. Arwo ma tek kendo i bang’ Yehova. E acidh asayu tic. Abed akoro ni ju ma gimito miyo ira tic nia abemito timo alokaloka i kwo para, man amito timo tic i ayi m’atira. Saa moko abed akoro igi nia abeponjo Biblia man amito adok dhanu m’atira. Ju mapol giyiyo ngo nimiyo ira tic. Tokcen ne, agam akoro lembe ma reco ceke m’ukadhu i kwo para ni won tic moko m’ubino penja. E egam eyero kumae: “Ang’eyo ngo nia pirang’o, re iya moko wacu nia ukwayu amii iri tic.” Ayiyo nia eno ubino wang’ rwo para. I ng’ei nindo moko, waku dhaku para walimo batizo man wadoko Jumulembe pa Yehova.

BERO M’AGAM ANWANG’U:

Tin atie kwo pilembe abetiyo ku cik mir ukungu mi Biblia man abekwo i ayi ma Jukristu gicikiri nikwo. Atie ku juruot ma ber mandha. Atie bende ku pidocwiny ma leng’ pilembe ayiyo nia Yehova uweko dubo para.

Pi oro 14 m’udaru kadu, atimo tic mi saa ceke, niwacu atiyo ku saa para mapol pi nikonyo dhanu mange de ging’ey lembe ma Biblia ponjo. Ceng’ini eni, dhaku para de ucaku ticne. Ikind oro ma romo 30 m’ukadhu, akonyo jurutic wada 22 nicaku timo ni Yehova. Abed acidho asu i dhu ngudu matie kaka mi kuloka, re pi nivuro dhanu ngo, calu ma naka. Kawoni dong’ acidho kuca pi nikoro pi yiyoyic para ni ju mange. Abemito amii igi gin moko, niwacu genogen mi kwo i ng’om ma nyen mi nindo m’ubino, ma jukuvuga bibedo mbe i iye.​—Zaburi 37:10, 11.