Yiyoyic ma nen ku timo ketho wabedo weg bedopwe

1. Ka wabeparu pi yiyoyic p’Abraham, waromo penjara ku penji ma kani?

KADOK nwang’u dhanu ma pol gidaru winjo pir Abraham de, re dupa m’i kindgi ging’eyo lembe nyanok magwei i wiye. Ento in ing’eyo lembe lee i wiye. Ku lapor, ing’eyo nia julwong’e “wego mi dhanu ceke ma ginyutho yiyoyic.” (Rum. 4:11) Re saa moko nyo ibepenjiri kumae: ‘Nyo andha acopo lubo ba tiend Abraham man abedo ku kit yiyoyic m’ebino ko?’ Eyo, icopo.

2. Pirang’o pire tie tek niponjo lembe iwi lapor p’Abraham? (Yakobo 2:22, 23)

² Yo acel ma wacopo cego ko kit yiyoyic p’Abraham utie niponjo lembe iwi lapor pare. Nikum telowic pa Mungu, Abraham udok i ng’om ma bor, ekwo i the hema pi oro ma dupa, man ebino ayika nithiero kadok Isak ma wode m’emaru lee ni lam. Lembe maeno ceke unyutho nia ebino ku yiyoyic ma tek. Yiyoyic p’Abraham m’unen ku tic uketho Mungu uyiye man edoko jarimbe. (Som Yakobo 2:22, 23.) Yehova ubemito nia wan ceke wanwang’ mugisa maeno, kadok in bende. Eno re m’uketho etelo wi Paulo giku Yakobo ku tipo pare kara giwec iwi lapor p’Abraham. Dong’ wakeng’iyu kilili mandha i lembe ma gikoro i wiye i Jurumi thek 4 man i Yakobo thek 2. I thek maeno ceke giweco iwi lembe ma pigi tek m’umulo kum Abraham.

3. Paulo giku Yakobo ceke gidok iwi giragora ma kani?

³ Paulo giku Yakobo zoo gidok iwi wec ma nwang’ere i Thangambere 15:6, m’uyero kumae: “[Abraham] ubedo ku yiyoyic i Yehova, man ekwane ire ni bedopwe.” Yehova neno nia ng’atini tie won bedopwe kunoke nia kosa mbe i wiye, nwang’u ng’atune ubenyayu anyong’a i iye. Etie lembe ma wang’u ijo nia ng’atu m’utie ku dubalaga ubed ma kosa mbe i wiye i wang’ Mungu! M’umbe jiji, in bende ibemito eneni kumeno; etie de lembe ma copere. Dong’ pi ning’eyo gin m’ukwayu watim, wakenen nia pirang’o Mungu ulwong’o Abraham nia won bedopwe.

YIYOYIC KETHO WABEDO WEG BEDOPWE

4. Ang’o ma cero dhanu nibedo weg bedopwe?

⁴ I barua ma Paulo ukiewo ni Jukristu mi Roma, eyero nia dhanu ceke gitie judubo. (Rum. 3:23) Dong’ wacopo nyayu anyong’a i Mungu man ekwanuwa ni weg bedopwe ke nenedi? Pi nikonyo Jukristu m’atira nidwoko wang’ penji maeno, Paulo utiyo ku lapor p’Abraham.

5. Ang’o m’uketho Yehova ukwanu Abraham ni won bedopwe? (Jurumi 4:2-4)

⁵ Yehova ulwong’o Abraham nia won bedopwe kinde m’ebino kwo i Kanan. Pirang’o elwong’e kumeno? Nyo pilembe eworo Cik pa Musa tap tap m’umbe nikieri? Ungo. Wang’eyo lembuno nenedi? (Rum. 4:13) Mungu umiyo Cik maeno ni thek mir Israel oro ma kadhu 400 i ng’ey m’eyero nia Abraham utie won bedopwe. Dong’, elwong’e won bedopwe ke pi thelembe ma kani? Yehova unyutho ire bero ma yawe mbe man elwong’e nia won bedopwe nikum yiyoyic pare.—Som Jurumi 4:2-4.

6. Ang’o ma ketho Yehova lwong’o ng’atu m’utie ku dubalaga nia won bedopwe?

⁶ Paulo uyero nia ka ng’atini utie ku yiyoyic i Mungu, ekwane “ni won bedopwe ni kum yiyoyic pare.” (Rum. 4:5) Emedo kumae: “Tap calu ma Daudi unyutho kinde m’eweco pi mutoro pa ng’atu ma Mungu ukwanu ni won bedopwe, kadok nwang’u ng’atune utimo ngo tic de; eyero kumae: ‘Mutoro ni ng’atu ma juweko kier pare, man ma juumo dubo pare; Mutoro ni ng’atu ma Yehova ukwanu ngo dubo pare.’” (Rum. 4:6-8; Zab. 32:1, 2) Mungu weko kunoke umo wi dubo mi ju ma gitie ku yiyoyic i iye. Eweko igi mi magwei man dong’ ekwanu ngo dubo migine kendo. Enenogi ni dhanu ma kosa mbe i wigi man ma weg bedopwe nikum yiyoyic migi.

7. Jutic pa Mungu ma con gibino weg bedopwe nikum ang’o?

⁷ Kadok nwang’u Mungu ukwanu Abraham, Daudi, man jutic pare mange ni weg bedopwe de, re asu gibino ku dubalaga. Ento nikum yiyoyic migi, enenogi ni dhanu ma kosa mbe i wigi, asagane ka juporogi ku dhanu ma gibino mbe ku yiyoyic i iye. (Efe. 2:12) Calu ma Paulo unyutho kamaleng’ i barua pare, wacikara nibedo ku yiyoyic pi nibedo ku winjiri ma segi ku Mungu. Lembuno ucopere ni Abraham giku Daudi ceke; ecopere iwa bende.

WINJIRI MA KANI M’UTIE I KIND YIYOYIC KU TIC?

8-9. Dhanu moko gibino ku paru ma kani ma rac i kum wec pa Paulo man pa Yakobo, man pirang’o?

⁸ Pi oro ma dupa, jurudini gisayu ku kero migi ceke ning’eyo winjiri m’utie i kind yiyoyic ku tic. Judong dini moko giponjo nia kara ng’atini ubothi, ecikere nibedo kende kende ku yiyoyic i Rwoth Yesu Kristu. Saa moko nyo idaru winjo gibeyero kumae: “Yii Yesu kara ibothi.” Pieno jumoko m’i kindgi betiyo ku wec pa Paulo ma e: “Mungu [kwanu ng’atini] ni won bedopwe, kadok nwang’u ng’atune utimo ngo tic de.” (Rum. 4:6) Ento jumange girido nia kara “ng’atini ubothi,” ukwayu ecidh i kabedo ma juridini gineno nia tie leng’ man etim tic ma kanisa umiyo i kore. E moko gitiyo ku Yakobo 2:24 m’uwacu kumae: “Jubikwanu ng’atini ni won bedopwe ni kum timo ento ungo ni kum yiyoyic kende.”

⁹ Tung’ tung’ maeno uketho jururieko moko mi Biblia giyero nia dhu Paulo giku Yakobo urombo ngo iwi gin ma ketho Mungu yiyo ng’atini. Judong dini moko giyero nia nimakere ku wec pa Paulo, jukwanu ng’atini ni won bedopwe nikum yiyoyic kadok etimo ngo tic, man nia nimakere ku wec pa Yakobo ke ng’atini nyutho yiyoyic pare ku tic pi ninwang’u bero i wang’ Mungu. Profeser moko mi dini udolo dhu lembuno kumae: “Yakobo unyang’ ungo i kum gin m’ucwalu Paulo niketho nwoc nia [jukwanu ng’atini ni won bedopwe] nikum yiyoyic kende ento ungo nikum tic.” Re Yehova utiyo ku tipo pare ma leng’ pi nitelo wi Paulo giku Yakobo ceke pi nikiewo barua. (2 Tim. 3:16) Pieno, ayi moko ma yot copo bedo nuti mi nyang’ i wec migine; utie ninyang’ i lembe ma gibino weco pigi.

10. Ku kwong’a Paulo ubino weco iwi “tic” ma kani? (Jurumi 3:21, 28) (Nen bende cal.)

¹⁰ “Tic” ma Paulo uweco pire i Jurumi thek 3 kud 4 ubino ang’o? Ku kwong’a, ebino weco iwi “lembe ma Cik ung’olo,” niwacu Cik ma jumiyo ni nyithindo mir Israel. (Som Jurumi 3:21, 28.) Ubeyenyo nen nia i rundi pa Paulo, ebino tek ni Jukristu moko ma Juyahudi niyiyo nia Cik pa Musa ku lembe ma Cikne ubed ukwayu ceke kakagi daru kadhu. Pieno, Paulo utiyo ku lapor p’Abraham pi ninyutho kamaleng’ nia ng’atini mbe ku yeny mi timo “lembe ma Cik ung’olo” pi nidoko won bedopwe. Ento, ukwayu ebed ku yiyoyic. Eno tie lembe mi tielocwiny ma lee pilembe ebenyutho nia tek watie ku yiyoyic i Mungu man i Kristu, wacopo nwang’u bero i wang’ Mungu.

11. Yakobo uweco iwi “timo” kunoke “tic” ma nenedi?

¹¹ “Timo” kunoke “tic” ma juweco pire i Yakobo thek 2 utie ngo “lembe ma Cik ung’olo.” Yakobo uweco iwi tic kunoke lembe ma Jukristu gitimo i kwo migi ma kubang’ ceng’. Tic maeno ginyutho ka nyo ng’atini utie ku yiyoyic mandha i Mungu kunoke ngo. Wakewec iwi lapor ario ma Yakobo utiyo ko.

12. Yakobo ukoro ang’o iwi winjiri m’utie i kind yiyoyic ku tici? (Nen bende cal.)

¹² I lapor ma kwong’a, Yakobo unyutho nia ukwayu ngo Jukristu gibed kud akoyakoya i kindgi. Pi nikonyowa ninyang’, eweco pi ng’atu moko m’ubenyutho bero ni jalonyo ento ebecayu jacan. Yakobo unyutho nia ng’atu ma kumeno romo yero nia etie ku yiyoyic, ma ke tic pare ubenyutho ngo nia etie ku yiyoyic. (Yak. 2:1-5, 9) I lapor mir ario, eweco pi ng’atu moko m’uneno ‘umego kunoke nyamego moko ukoso kendi kunoke cam,’ re emiyo ngo igi gin ma gitie ku yenyne. Kadok nwang’u ng’atuno uyero nia etie ku yiyoyic de, re timo pare ubenyutho nia embe ku yiyoyic. Calu ma Yakobo ukiewo, “yiyoyic kende m’umbe timo en e avu.”—Yak. 2:14-17.

13. Yakobo utiyo ku lapor ma kani pi ninyutho nia yiyoyic nen ku timo? (Yakobo 2:25, 26)

¹³ Yakobo uweco pi Rahab calu lapor ma ber mi yiyoyic ma nen ku timo. (Som Yakobo 2:25, 26.) Rahab ugam uwinjo pi Yehova man enyang’ nia ukwayu edik cinge ku Juisrael. (Yoc. 2:9-11) Enyutho yiyoyic pare ku timo, niwacu ekanu Juisrael ario ma julib kinde ma kwo migi ubino i ariti. Eno uketho jukwanu dhaku maeno m’ubino ku dubalaga man m’ubed uworo de ngo Cik pa Musa ni won bedopwe, tap calu Abraham. Lapor m’eweko ubeketho nwoc nia pire tie tek nibedo ku yiyoyic ma nen ku timo.

14. Pirang’o wacopo yero nia Paulo giku Yakobo giweco iwi lembe m’ukoci?

¹⁴ Kawoni wabenyang’ nia Paulo giku Yakobo giweco iwi yiyoyic man tic i ayi m’ukoc. Paulo ubino nyutho ni Jukristu ma Juyahudi nia Yehova biyiyogi ngo kende kende pilembe gibetimo lembe ma Cik pa Musa ung’olo. Yakobo ke ubino ketho nwoc nia ukwayu Jukristu ceke ginyuth yiyoyic migi nikadhu kud i bero ma gibetimo ni jumange.

15. Wacopo nyutho yiyoyic mwa ku timo i ayi moko ma kani? (Nen bende cal.)

¹⁵ Yehova ubekwayu ngo nia kara elwong’wa ni weg bedopwe, wacikara nitimo tap tap gin m’Abraham utimo. I andha, yore tie dupa ma wacopo nyutho ko yiyoyic mwa nikadhu kud i timo. Wacopo jolo dhanu ma fodi gitie welo i cokiri mwa, wakonyo umego ku nyimego mwa ma gitie andha i yeny, man watimo bero ni wedi mwa, kum lembe maeno ceke nyayu anyong’a i Mungu man ketho emiyo iwa mugisa. (Rum. 15:7; 1 Tim. 5:4, 8; 1 Yoh. 3:18) Yore acel ma pire tek nisagu zoo ma wanyutho ko yiyoyic mwa ku timo utie nirweyo lembanyong’a kud amora. (1 Tim. 4:16) Wan ceke wacopo nyutho nikadhu kud i timo mwa nia watie ku yiyoyic nia lembang’ola pa Mungu bipong’o andha man nia etimo lembe kwa i atira. Tek wabetimo kumeno, cwinywa bed tek nia ebikwanuwa ni weg bedopwe man ebilwong’owa jurimbe.

GENOGEN KETHO WABEDO KU YIYOYIC

16. Abraham ubino ku genogen man yiyoyic i lembang’o?

¹⁶ Jurumi thek 4 uweco iwi ponji mange ma pire tek ma e ma wacopo nwang’u kud i lapor p’Abraham: Pire tie tek nibedo ku genogen. Yehova ng’olo nia Abraham “bidoko wego mir udul thek,” man nia nikadhu kud i bang’e “thek ceke m’i ng’om binwang’u mugisa.” Kepar pi genogen ma ber maeno m’ebino ko! (Tha. 12:3; 15:5; 17:4, NWT; Rum. 4:17) Ento, kadok kinde m’ebino ku oro 100 man Sara ke ku oro 90 de, nwang’u fodi nyathin ma nico ma jung’olo igi unyolere ngo. I nen pa dhanu, nwang’u dong’ ecopere ngo ni Abraham giku Sara ninyolo nyathin. Ebino amulaic ma lee ni Abraham. Ento, “ni kum genogen eyiyo nia ebidoko wego mi thek dupa.” (Rum. 4:18, 19) De andha lembe ma jung’olo ire upong’o. Edoko won Isak ma nyathin m’ekuro ku genogen pi kare m’ulwar.—Rum. 4:20-22.

17. Ing’eyo nenedi nia Mungu copo kwanuwa ni jurimbe?

¹⁷ Mungu copo yiyowa man wabedo jurimbe calu Abraham. Paulo uweco tap iwi lembuno kinde m’ekiewo kumae: “Wec ma nia ‘jukwane ni won bedopwe,’ ukiewere pir [Abraham] kende ngo. Ekiewere bende piwa. Wan de Mungu bikwanuwa ni weg bedopwe, pilembe wayiye, en m’ecero Yesu ma Rwoth mwa ku kind ju m’utho.” (Rum. 4:23, 24) Calu Abraham, ukwayu wabed ku yiyoyic, wanyuthe ku timo, man kud wabay genogen mwa ki. Paulo umedere niweco iwi genogen mwa i Jurumi thek 5. Wabiweco pi genogenne i thiwiwec m’ulubo.