Rwom ma watie ko mi giero Udi mi thier mandha, man mi gwoko Udine gibed ma leng’

Pi nigiero hekalu ma con mir Israel, ugam ukwayu tic ma lee man jamcing’ de dupa. Kadok kumeno de, nyithindho mir Israel gidiko cing’gi pi nitielo ticne kud amora. (1Kei 29:2-9; 2Kei 6:7, 8) Ing’ei giedone, kite ma nyithindho mir Israel gibed gigwoko ko Otne ubed unyutho ka nyo gibino dhanu mi tipo kunoke ngo. (2Ub 22:3-6; 2Kei 28:24; 29:3) Tin bende, Jumulembe pa Yehova gibed gitio ku saa man kero lee pi nigiero, niweyo, nilwoko, man nigwoko Udi Ker ku Udi mi coko ma dongo. Re, etie rwom ma dit nitimo tic karacelo ku Yehova i kite maeno, man etie bende thenge acel mi tic mwa ma leng’.​—Zab 127:1; Nyu 7:15.

WACOPO DIKO CINGWA I TIC MAENO NWANG’U . . .

• Wabeweyo Ot mwa mi Ker man wabepangu piny ceke kakare kakare ing’ei cokoman. Kan ecopere ngo iri nitimo kumeno, kwany kadok susu m’i ng’eti.

• Wabedikara nja i tic mi lwoko man mi gwoko Ot Ker. Nyoko tic anyoka ketho ticne timere ma ber; pieno, lemb leng’o mi pacu, in de ibed i ie.​—lv-F mba. 92-93 udu. 18.

• Wabetielo ticne ku sente mwa. Yehova bemaru mic ma jumio niai kud i adunde, kadok etie ‘sente ario mi tongolo’ ma juneno nia tije mbe de.​—Mk 12:41-44.

• Wabemiara giwa kan ecopere iwa, kara wadikara i tic mi giero man mi yiko udi ma tung’ tung’ ma konyo pi tic mi Ker. Pi nidikiri i tic mi giedo maeno, ubekwayu ngo nia ng’atini ukeubed kokoro ku bodho i tije.