Cer bibedo nuti nikum jamgony

Poi pi tho pa Kristu bemio iwa kaka maber mandha mi paru iwi mugisa ma tung’ tung’ ma wabinwang’u i nindo m’ubino nikum jamgony, calu ve genogen mi cer. Nwang’u Yehova umito ngo nyanok de nia dhanu githo. Pieno, wabedo ku can akeca i cwinywa ka ng’atu moko ma wamaru utho. (1Kor 15:26) Can ugam unego Yesu i cwinye kinde m’eneno julubne gibeywagu Lazaru. (Yoh 11:33-35) Calu Yesu utie tap ve Won, wacopo bedo ku genogen nia Yehova bende bedo ku can i cwinye kan ebeneno nia wabeywagu dhanu mwa ma wamaru ma githo. (Yoh 14:7) Yehova ubekuro kud ava ma lee dit nindo m’ebicero i ie jurutic pare ma githo; wan bende wacikara nikuro nindo mi cer kud ava kumeno.​—Yob 14:14, 15.

Yehova tie Mungu ma ketho lembe wotho i ayi m’upangere maber. Pieno, wacopo bedo ku genogen nia Yehova bicero dhanu i ayi m’upangere maber. (1Kor 14:33, 40) Kakare nibedo saa mi ywagu dhanu m’utho, cer bibedo saa mir anyong’a mi jolo dhanu ma gibecer. Nyo ibed iparu lee iwi cer, akecane saa ma ng’atu moko m’imaru utho? (2Kor 4:17, 18) Nyo ibed inyutho foyofoc peri ni Yehova pi jamgony m’emio, man pi lembe m’enyutho i Biblia nia ju m’utho gibicer?​—Kol 3:15.

• Ikind jurimbi kunoke wat peri ma gidaru nitho, ibekuro kud ava madit ninen kendo akecane ku ng’agi?

• Ikind dhanu ma Biblia uweco pigi, ibemito iromb man iwec akecane ku ng’agi saa ma gibicer?