KWO MI JUKRISTU
Nwang’ mutoro i tic mi rweyo lembanyong’a
Nyo saa moko idaru nwang’u de nia etie lembe ma tek nirweyo lembanyong’a? Dupa m’ikindwa copo dwoko wang’ penji maeno nia eyo. Pirang’o? Ecopere nia pilembe wang’ mapol wabed warombo ku dhanu ma gifoyo ngo ku lembe ma waciyero igi, dhanu ma gikwiny, kunoke nyo wabed walworo niweco ku dhanu ma wang’eyogi ngo. M’umbe jiji, lembe maeno copo jwigo mutoro mwa i tic mi rweyo lembanyong’a. Ento, Mungu ma wabeworo ubemito nia watim ire ku mutoro pilembe en de e jamutoro. (Zb 100:2; 1Tm 1:11) Thelembe adek makani m’ucikere nicwaluwa ninwang’u mutoro i tic mi rweyo lembanyong’a?
Mi kwong’o, waberweyo lembe m’ubekonyo dhanu nibedo ku genogen. Kadok nwang’u genogen ubejwik ajwika i ng’om ma tin de, re wan, wacopo nipong’o adunde dhanu ku “rwonglembe ma ber mi gin ma ber.” (Is 52:7) Lembanyong’a mi Ker pa Mungu copo nipong’o bende adundewa ku mutoro. Pieno, iwang’ nicidho rweyo lembanyong’a, kepar pi mugisa ma Ker pa Mungu bikelo iwi ng’om keni.
Mir ario, lembanyong’a ma waberweyo mio kony ni dhanu i thenge mi kum man mi tipo bende. Gitimo kero niweko timo ma copo mio igi peko, man ginwang’u genogen mi kwo ma rondo ku rondo. (Is 48:17, 18; Rm 1:16) Ubemito nia wanen tic mwane ni tic mi laru dhanu m’ubecitho. Pieno, kadok dhanu moko gimaru ngo jubodhgi de, ukwayu wamedara asu nisayu jum’ubemito gibothi.—Mt 10:11-14.
Mir adek man m’usagu zoo, tic mwane mio yung ni Yehova. Eneno tic maeno ni gin ma pire tek akeca. (Is 43:10; Eb 6:10) M’uweko maeno, Emio iwa tipo pare maleng’ ku berocwinye kara watuc nitimo tic parene. Pieno, kwai Yehova ukonyi kara ibed ku mutoro, pilembe mutoro eno tie theng nying’ tipo maleng’. (Ga 5:22) Ku kony pa tipo maleng’, wabidaru lworo mwa man wabirweyo ku tegocwiny. (Tic 4:31) Eno biketho wabinwang’u mutoro i tic mwa mi rweyo lembanyong’a, kadok nwang’u dhanu gibejolowa nenedi de.—Eze 3:3.
Saa m’iberweyo lembanyong’a, iromo maru nia ibed ku can kunoke nyo ku mutoro? Mutorone romo nen nenedi?
NEN VIDEO MA THIWIE TIE RETROUVE DE LA JOIE GRÂCE A L’ÉTUDE ET À LA MÉDITATION, MAN ING’EYE, DWOK WANG’ PENJI M’ULUBO E:
Pirang’o wacikara niketho ponji mwa mi Biblia i kabedo ma kwong’a, kadok nyo wabed watimo saa ma lee i tic mi rweyo lembanyong’a de?
Wacikara nilubo lapor pa Maria nenedi?
Ibed inyamu i Lembe pa Mungu saa makani?
Kinde m’iberweyo lembanyong’a, ang’o ma bemio iri mutoro?