Pirang’o julub pa Yesu gikwiro ngo cam?

Nindo ma nok ing’ei ma Yesu gitimo Kadhukuwijo mi oro 30 R.M., jubolo Yohana ma Jababutisi i kol. Nwang’u Yohana ular umito nia julub pare gidok julub pa Yesu, ento jumoko kende re m’utimo kumeno ikind dwi moko ing’ei ma jutwie.

Kawoni Kadhukuwijo mi oro 31 R.M. ubebino romo, e julub moko pa Yohana gibino ibang’ Yesu man gipenje kumae: “Nedi waku Jufarisayo waweko cam wang’ udul, ento julubni giweko cam ungo?” (Matayo 9:14) Jufarisayo gibed gikwiro cam pilembe etie kura mi dini migi. Ing’eye, Yesu umaku lapor moko, eyero nia Jafarisayo moko m’ukethere gire nia e pwe, urwo kumae: “Mungu, afoii, kum a calu dhanu mange ngo . . . Aweko cam wang’ ario i yenga acel.” (Luka 18:11, 12) Copere nia julub pa Yohana de gibed gikwiro cam pilembe ebino lembe moko ma ging’io ko, kunoke nyo pi can Yohana m’ubenegogi. Gizungo pilembe giparu nia nwang’u ukwayu julub pa Yesu de gikwir cam pi ninyutho nia can ubenegogi ikum lembe m’unwang’u Yohana.

Pi nidwoko wang’ penji migi, Yesu umio lapor mae: “Juwagi won ambadha can copo negogi, ma fodi ginuti giku won ambadhagi? Ento ceng’ biwok, ka jubikabu won ambadha woko kud ibang’gi, ka gibilund weko cam.”​—Matayo 9:15.

Yohana uyero en gire nia Yesu tie cwar mugole. (Yohana 3:28, 29) Nimakere ku wec maeno, julub pa Yesu gikwiro ngo cam ma fodi Yesu utie kugi. Ing’eye, kinde ma Yesu bitho, ka julubne gibibedo ku can i cwinygi man ava cam biai ikumgi. Re saa m’ebicer, lembe bilokere! Dong’ gibibedo mbe ku thelembe mi kwiro cam man mi bedo ku can.

Yesu udok umio kendo lapor ario mae: “Ng’atu moko mbe de ma ketho kurembo bongu [kidaka] ma nyen wang’ bongu m’uti; kum maeno ma juketho ya eum wang’e, eyeco kendi, wang’e de doko rac ma sagu. Kadi dhanu de mbe ma piko pigulok ma nyen i usaupigulok m’uti: tek gipiko usaupigulok yec, man pigulok oi, usau de nyothre: ento gipiko pigulok ma nyasa i usaupigulok ma nyen.” (Matayo 9:16, 17) Yesu umito niyero ang’o?

Yesu umito nikonyo julub pa Yohana ma Jababutisi ginyang’ nia dhanu ucikiri ngo nigeno nia julub pare gibicaku nitimo kura ma dong’ utii mi Juyahudi, calu ve kwiro cam. Yesu ubino ngo niyiko kit thier macon man niketho emedere, pilembe nwang’u dong’ ayi thierne unyothere man ing’ei nindo ma nok nwang’u jubecikwere cen. Kit thier ma Yesu ubemito julub gitim utie ngo ma ve mi Juyahudi mi rundi maeca, ma gibed giroyo cik mi dhanu i ie. Ebemito ngo esud kidaka (kunoke kiraka) mi bongu manyen ikum bongu m’utii, kunoke nia ekonj pigulok manyen i usaupigulok m’utii.