Tii ku girasoma pa jamiru ku rieko

Yesu uyero kumae: “Wumaku mi mananu, wumii de mananu.” (Mt 10:8, NWT) Wanyutho nia wabeworo telowic maeno ma ngbeng’ nwang’u wabekwayu ngo sente i bang’ dhanu, pi Biblia ma wabemio igi kunoke girasoma mwa mange m’ukoro i Biblia. (2Ko 2:17) Re, wang’eyo nia girasoma maeno gitie ku lemandha ma pigi tek akeca m’uai i Lembe pa Mungu. Bende, pi niwodhogi man niorogi i cokiri ma tung’ tung’ i ng’om zoo, ubekwayu ii mi tuko ngo, man bende sente ma lee mandha. Pieno, wacikara niting’o kende kende girasoma ma watie ku yenyne.

Bed ku riekowang’ kinde m’ibemio girasoma ni dhanu, kadok saa m’iberweyo i kabedo ma dhanu tie lee i ie. (Mt 7:6) Kakare nimio kende kende girasoma ni dhanu m’ubekadhu, ketim kero niweco kugi nyanok pi nineno nyo giromo maru nisomo. Kepim nidwoko wang’ penji acel moko kokoro ikind penji ma nwang’ere i ng’ete ee ku eyo, pi nineno ka nyo ng’atine romo nifoyo ku girasoma. Kan ungo ke, etie ber nia imii ire trakt. Re, ka en re m’ekwayu gazeti kunoke girasoma moko mange, wabimie ire ku mutoro.​—Rie 3:27, 28.