Cindi Buku mi coko mi Kwo man tic
YENGA MI NINDO 6-12, DWI MIR 5
LONYO MA NWANG’ERE I LEMBE PA MUNGU | 2 JUKORINTO 4-6
“Wavoc ungo”
(2 Jukorinto 4:16) Kum kumeno wavoc ungo; ento kadok ng’atu mwa ma yo woko betop, ento ng’atu mwa ma yor i iwa doko nyen ku ba rupiny ku ba rupiny.
w04-F 15/8 mba. 25 udu. 16-17
Waol, re tego nuti
16 Nidieng’ pi thenge mwa mi tipo pire tie tek lee. Ka watie ku winjiri ma ceng’ini ku Yehova Mungu, wacopo ol i kum ento wore biolowa ngo nyanok de. Pirang’o? Pilembe Yehova “mio tego ni ju m’uvoc; man emedo tego ni ng’atu ma tego mbe kude.” (Isaya 40:28, 29) Jakwenda Paulo utuc nineno andha mi lembe maeno i kwo pare, uketho ekiewo kumae: “Wavoc ungo; ento kadok ng’atu mwa ma yo woko betop, ento ng’atu mwa ma yor i iwa doko nyen ku ba rupiny ku ba rupiny.”—2 Jukorinto 4:16.
17 Wec “ku ba rupiny ku ba rupiny,” ubenyutho kony ma Yehova mio iwa kubang’ ceng’. Nyamego moko m’utimo tic mi missioner pi oro 43 ugam unwang’ere ku olo mi kum man turcwiny. Re eol ungo magwei. Eyero kumae: “Abino ku ng’iyo mi beai pir kugweno, kara i wang’ caku tic moko ci, anwang’ kare mi rwo i bang’ Yehova man mi somo Lembe pare. Ng’iyo maeno ukonya uketho abemedara asu niciro.” Tekene waberwo i bang’ Yehova, wabeparu pi kite pare man lembang’ola pare “ku ba rupiny ku ba rupiny,” m’umbe jiji ebikonyowa ku tego pare.
(2 Jukorinto 4:17) Kum can mwa ma yot, ma nyagwil, etimo iwa ter mi dwong’ ma nja ku nja ma sagu dit apila;
it-1-F mba. 759
Cirocir
Pire tie tek bende nia wiwa kud uwil i kum genogen mi Jukristu mi kwo rondo ku rondo i ng’om ma dubo mbe i ie. Gin moko mbe ma copo mayuwa ku genogen maeno, kadok weg ragedo ginegwa anega ngi. (Rm 5:4, 5; 1Ts 1:3; Ny 2:10) Masendi ma kawoni tie gin moko ngo ka jupore ku lembe ma beco mi genogen mwa. (Rm 8:18-25) Peko ceke ma kawoni kadok m’ubesendowa rukani de, gitie “ma yot [man] ma nyagwil,” ka juporogi ku mugisa ma rondo ku rondo mi nindo m’ubino. (2Ko 4:16-18) Ka wiwa ubewil ungo nia masendi ma kawoni e utie pi nindo moko kende, man wabeketho wiwa i kum genogen mi Jukristu, eno copo gwokowa kara cwinywa kud utur man wagwok bedoleng’ mwa ni Yehova Mungu.
(2 Jukorinto 4:18) nwang’u fodi wabeneno ngo ba gin ma nen, ento ba gin ma nen ungo re: kum gin ma nen kadhu akadha; ento gin ma nen ungo re bedo rondo ku rondo.
Wagol lonyo mi tipo i Lembagora
(2 Jukorinto 4:7) Ento wabedo ku piny m’akana maeni i agulu mir ulobo, kara dwong’ m’apila mi tego maeni ubed pa Mungu, man m’uai i bang’wa giwa re ngo.
w12-F 1/2 mba. 28-29
‘Wunyai anyong’a i Yehova’
Umego David Splane mi Guriri m’utelowic, re m’ukoro i thiwiwec maeno m’uai kud i Lembagora. (2 Jukorinto 4:7) Lonyone tie ang’o? Nyo utie ng’eyong’ec kunoke rieko? Jakorlembe udwoko nia “ungo.” “Lonyo ma jakwenda Paulo uweco pire utie ‘tic mi nyutho pi lemandha.’” (2 Jukorinto 4:1, 2, 5, NWT) Umego Splane upoyo wi awiya mi somo nia dwi abic ma gitimo i Gilead, ulilogi pi tic ma segi mi lembanyong’a, m’umito ngo ginene ku tuko.
Jakorlembe ukoro nia “agulu mir ulobo” utie kum mi dubo. Enyutho tung’ tung’ m’utie i kind agulu mir ulobo kud agulu mi mola. Agulu mi mola jutio ko ngo ree. Ento agulu mir ulobo jutio ko wang’ mapol. Ka juketho piny m’akana i agulu mi mola, juketho wijo akeca iwi agulune nisagu piny ma ni ie. Pieno, umego Splane uyero ni awiya mi somo kumae: “Kud wutel nen mi dhanu i wiwu giwu. I tic mwu mi misioner, wuketh dhanu umii yung ni Yehova. Wutie agulu mir ulobo.”
(2 Jukorinto 6:13) Nie pi culocul ma calcal (ayero calu ni nyithindha), e wun bende wudok dit.
w09-F 15/11 mba. 21 udu. 7
Wudok dit i mer mwu mi utumego
7 Ka wan ke? Wacopo ‘doko dit’ i mer mwa mi utumego nenedi? Etie lembe ma yot nitheyo mer ku ng’atu m’itie kude i oro ma rom man suru de ma rom. Bende, dhanu ma gimaru ayi tuko kunoke galuwang’ ma rom, ginambu saa mapol karacelo. Ento ka lembe moko ma nyang’uwa ubeketho kindwa bedoko bor ku jumange, ukwayu ‘wadok dit’ i mer mwa. Ecibedo ber nia wakewapenjara kumae: ‘Nyo abed arweyo lembanyong’a man anambu kud umego ku nyimego ma gitie ngo jurimba ma ceng’ini? Kan ani Ot Ker, nyo abed aweco i ba dhanu ma nyen kende pilembe ang’eyo nia mito anyuth igi mer? Nyo abed amotho dhanu ceke i cokiri, uketho i ie aradu ku ju m’utii bende?’
YENGA MI NINDO 13-19, DWI MIR 5
LONYO MA NWANG’ERE I LEMBE PA MUNGU | 2 JUKORINTO 7-10
“Tic mwa mi konyo ju ma peko wok i wigi rek”
(2 Jukorinto 8:1-3) Mange ke, umego, waketho wung’ei bero pa Mungu m’umire i kanisa ma Makedoni; 2 maram ku muloic ma dit mi can e dit mi mutoro migi man can piny migi ma apila usagre ni lonyo mi miomic migi ma ku berocwinygi. 3 Kum anyutho, nia calku tego migi, eyo ma kadhu tego migi de, gimio gigi kendgi,
w98-F 1/11 mba. 25 udu. 1
“Mungu maru jamic ma mio kud anyong’a”
Mi kwong’o, Paulo ukoro ni Jukorinto pi lapor ma ber mi Jukristu mi Makedoni: gimio piny pi nikonyo Jukristu wagi ma peko uwok i wigi. Paulo ukiewo nia i saa mi “muloic ma dit mi can e dit mi mutoro migi man can piny migi ma apila usagre ni lonyo mi miomic migi ma ku berocwinygi.” Judiyo ngo Jukristu mi Makedoni adiya. Ento Paulo uwacu nia ‘gikwayuwa ku kwac ma dit pi bero maeni.’ Berocwiny ma Jukristu mi Makedoni ginyutho utie lembe ma wang’u ijo, kum gibino i ‘can ma dit.’—2 Kor. 8:2-4.
kr-F mba. 209 udu. 1
Tic mi konyo ju ma peko wok i wigi rek
I KUM oro 46 R.M., ndru ma dit upodho i ng’om mi Yahudi. Julub ma gi Juyahudi ma gibekwo i ng’ombe, gikoso gin ma ging’iew ko cam, pi beicam m’udoko tek. Kec ubenegogi man gidhingo tho. Re ceng’ini eni, gibineno kony pa Yehova i ayi ma fodi Jukristu uneno ngo. Lembang’o ma bitimere?
(2 Jukorinto 8:4) ma gibekwayuwa ku kwac ma dit pi bero maeni man ribri i timotim ma ni jumaleng.’
kr-F mba. 209-210 udu. 4-6
Tic mi konyo ju ma peko wok i wigi rek
4 I waraga mir ario ma Paulo ukiewo ni Jukorinto, ekoro nia Jukristu gitie ku tic ario ma pigi tek. Kadok ekiewo waragane ni Jukristu ma juwiro ku tipo de, re lembe m’i ie utie pi Jukristu ma gitie ‘rombe mange’ bende. (Yoh. 10:16) Tic mwane acel utie ‘tic mi poto’ kindjo, niwacu tic mwa mi rweyo lembanyong’a man mi ponjo dhanu. (2 Kor. 5:18-20; 1 Tim. 2:3-6) Ticne mange uketho i ie kony ma wamio ni juyic wadwa. Paulo ulwong’o tije “timotim,” niwacu tic mi konyo ju ma peko wok i wigi rek. (2 Kor. 8:4) Wec “tic mi poto” kindjo man “timotim,” ceke julokogi niai kud i wec mi dhu Jugiriki diakonia ma thelembe tie “tic”. Eno uponjowa ku lembang’o?
5 Wec ma rom mi dhu Jugiriki ma Paulo tio ko pi tic ario maeno, ubenyutho kamaleng’ nia tic mi konyo ju ma peko wok rek i wigi de pire tie tek calu tic mange ma watimo i cokiri. Nwang’u i wang’e elar eyero kumae: “Tic de gi tung’ tung’, Rwoth re en e acel. Man tic m’ubetimbre gi tung’ tung’, . . . ento gin maeni ceke tipo acel maeni nini timo en.” (1 Kor. 12:4-6, 11) Paulo ukwanu tic ma tung’ tung’ ma watimo i cokiri ni “tic ma leng’.” (Rum. 12:1, 6-8, NWT) Eno re m’uketho enwang’u nia eber ya etii ku theng saa pare pi ‘nitimo ni jumaleng’.’—Rum. 15:25, 26.
6 Paulo ukonyo Jukorinto ginen nia pire tek nikonyo ju ma peko wok i wigi rek, man nia tije tie bende kum thier ma watimo ni Yehova. Eyero nia Jukristu gikonyo jumange ‘ni kum woro migi mi tuc ma gituco ko lembanyong’a pa Kristu.’ (2 Kor. 9:13) Pieno, Jukristu gigam gikonyo juyic wagi pilembe gimaru nitio ku ponji pa Kristu i kwo migi. Berocwiny ma ginyutho ni umego migi ubino “bero ma apila pa Mungu.” (2 Kor. 9:14; 1 Pet. 4:10) Pi tic ma watimo mi konyo umego mwa ma gitie i yeny, Otkur ma Wiw mi nindo 1, dwi mir 12, 1975 ukoro kumae: “Wambe ku jiji nyanok de nia Yehova ku Wode ma Yesu gibeneno ayi tic maeno ni gin ma pire tek mandha.” Andha, tic mi konyo ju ma peko wok i wigi rek utie tic ma leng’.—Rum. 12:1, 7; 2 Kor. 8:7; Ebr. 13:16.
(2 Jukorinto 9:7) Dong’ dhanu ceke kubang’gi kubang’gi ng’atuman utim calu ekeco ku i adundene: ku minowang’ ungo, kadi kum acung’a de ngo: kum Mungu maru jamic ma mio kud anyong’a.
kr-F mba. 196 udu. 10
Sente ma waculo ko tic mwa mi Ker beai kani?
10 Mi kwong’o, wamio giramia ma ku berocwiny pilembe wamaru Yehova man wamito “nyayu mutoro i wang’e.” (1 Yoh. 3:22) Anyong’a nego Yehova i kum jurutic pare kan ebeneno gimio giramia ku berocwinygi. Wakewec iwi lembe ma jakwenda Paulo uyero iwi ayi ma Jukristu gimio ko giramia. (Som 2 Jukorinto 9:7.) Jakristu mandha jucung’o ngo acung’a nia emii piny, ento emio pilembe “ekeco ku i adundene.” Niwacu eparu cuu pi yeny m’unuti, man ayi m’ecopo pong’o ko yenyne, e emio. Jamic ma kumeno nyayu anyong’a i Yehova “kum Mungu maru jamic ma mio kud anyong’a.” Lok mange mi Biblia uwacu nia, “Mungu maru dhanu m’umaru mio.”
Wagol lonyo mi tipo i Lembagora
(2 Jukorinto 9:15) Foyofoc ubed ni Mungu kum giramia pare ma sagu ma aweca.
w16.01-F mba. 12 udu. 2
Wek “giramia pa Mungu ma sagu ma aweca” ucweli i timo
2 Paulo ugam ung’eyo nia lembe ceke ma beco ma Mungu ung’olo bipong’o ni kum lam ma leng’ pa Kristu. (Som 2 Jukorinto 1:20.) Pieno, “giramia pare ma sagu ma aweca” ucoko kwai bero ceke man mer mi gwoko bedoleng’ ma Yehova unyutho nikadhu kud i bang’ Yesu. Giramia maeno wang’u ijo, ma ninwang’u wec ma jukor ko ie ceke ceke tie tek. Dong’ giramiane copo bedo kud adwogi ma kani i wiwa? Man ecopo cwaluwa nitimo ang’o calu ma wabeyikara pi Poi pi tho pa Yesu, ma wabitimo kas’adek, nindo 23, dwi mir 3, 2016?
(2 Jukorinto 10:17) Ento ng’atu m’ulule, dong’ elule i Rwoth.
g99-F 8/7 mba. 20-21
Nyo niluliri utie rac?
I Lembagora mi dhu Jugiriki mi Jukristu, jubed jutio ku wec kaukhaomai, ma juloko nia “nihayiri, nibedo kud anyong’a i kum lembe moko, niluliri,” pi niweco iwi kulula ma rac kunoke ma ber. Ku lapor, Paulo uyero nia “anyong’a negowa i genogen mi dwong’ pa Mungu.” Eyero bende nia: “Ng’atu m’ulule, dong’ elule i Rwoth.” (Rum. 5:2; 2 Kor. 10:17) Niluliri i Yehova thelembene tie nibedo kud anyong’a nia wabetimo ni Mungu mandha, man eno ketho wacwaku bang’e kud anyong’a.
YENGA MI NINDO 20-26, DWI MIR 5
LONYO MA NWANG’ERE I LEMBE PA MUNGU | 2 JUKORINTO 11-13
“‘Ukudho mi ring’kum’ Paulo”
(2 Jukorinto 12:7) Man kara kud atingra malu ma sagu ni kum giranyutha ma dit apila, ukudho ma i ring’kum umire ira, jakwenda pa Jok kara epada, kara kud atingra ma sagu.
w08-F 15/6 mba 3-4
Wacopo bedo tek kadok wang’ic
Jaratic mange m’ugwoko bedoleng’ pare ukwayu Yehova ukab ‘ukudho mi ring’ kume,’ niwacu peko moko m’ubethum ungo. Jakwenda Paulo ukwayu Mungu wang’ adek zoo nia edar amulaic m’ubesende. Amulaicne ubedo ire ve ukudho m’ubecobe, ma nwang’u copo kabu anyong’a m’ebetimo ko ni Yehova. Paulo uyero nia ukudhone udok ubedo ve jubepade thiri thiri. E Yehova udwoko ire nia: “Berona romi: kum tegona doko ndhu cu i ng’ic.” Yehova ukabu ngo ukudhone kud i ring’ kume. Ugam ukwayu Paulo unyeg kud ukudhone, uketho eyero kumae: “Kinde ma a ng’ic, kinde maeca a tek.” (2 Kor. 12:7-10) Emito yero ang’o?
(2 Jukorinto 12:8, 9) Pi gin maeni akwayu Rwoth bang’ adek, kara eai i kuma. 9 Man ewacu ira kumae, Berona romi: kum tegona doko ndhu cu i ng’ic. Kum kumeno abilula kum ng’ic para kud anyong’a m’usagu dit, kara tego pa Kristu bed i kuma.
w06-F 15/12 mba. 24 udu. 17-18
Yehova mio ‘tipo maleng’ ni ju m’upenje’
17 Mungu udwoko wang’ rwo pa Paulo kumae: “Berona romi: kum tegona doko ndhu cu i ng’ic.” E Paulo yero nia, “Kum kumeno abilula kum ng’ic para kud anyong’a m’usagu dit, kara tego pa Kristu bed i kuma [calu hema].” (2 Jukorinto 12:9; Zaburi 147:5) Paulo unyang’ nia nikadhu kud i bang’ Kristu, tego pa Mungu mi gwok uume calu hema. Tin bende, Yehova dwoko wang’ rwo mwa i ayi ma rom. Epedho gwok pare i wiwa calu hema.
18 I andha, hema cero ngo koth man ecero ngo yamu, ento egwokowa i kumgi. Kumeno bende, hema ma ai i “tego pa Kristu,” cero ngo amulaic kunoke masendi kud unwang’wa. Ento egwokowa i thenge mi tipo i kum ragedo man lembe ma copo timowa rac i ng’om maeni ma Sitani ubebimo wie en. (Lembanyutha 7:9, 15, 16) Dong’ kan ibenyego kud amulaic moko m’ubeweki ngo, ng’ei nia Yehova ung’eyo pi peko peri man ewinjo ‘ywak peri.’ (Isaya 30:19; 2 Jukorinto 1:3, 4) Paulo ukiewo nia “Mungu en e mandha, m’ebiyio ngo ya jubidhwu ma sagu ma wucopo bedo ko: ento karacelo kud abidhe nica ebiketho yojboth bende, kara wucopo cire.”—1 Jukorinto 10:13; Jufilipi 4:6, 7.
(2 Jukorinto 12:10) Kum kumeno anyong’a nega i ng’ic, i acidi de, i can piny, i ragedo, i can m’alimo, ni kum Kristu: kum kinde ma a ng’ic, kinde maeca a tek.
‘Yehova mio tego ni ng’atu m’uvoc’
8 Som Isaya 40:30. Ecicopere nia watie ku bodho dupa, re waromo ngo nitimo lembe ceke ku tego mwa giwa. Wan ceke wacikara ning’eyo lembuno. Jakwenda Paulo ubino ku copo dupa, re ebed etundo ngo nitimo lembe ceke m’ebemito. Kinde m’ekoro ni Yehova kite m’ebewinjere ko, Yehova uwacu ire kumae: “Tegona doko ndhu cu i ng’ic.” Enyang’ ma ber i kum wec maeno ma Yehova uyero. Pieno ewacu kumae: “Kinde ma a ng’ic, kinde maeca a tek.” (2 Kor. 12:7-10) Paulo umito yero ang’o?
9 Paulo ung’eyo nia ecopo timo ngo lembe zoo ku tego pare gire. Ebino ku yeny pa ng’atu ma won tego m’usagu pare. Pieno kinde m’evoc, Mungu umio ire tego nikadhu kud i tipo maleng’. Ento eno kende ngo. Tipo maleng’ umio bende ire tego m’ecopo timo ko lembe ma nwang’u uvoyo kero pare. Wan de wacopo nwang’ara i wang’ lembe ma rom tin eni. Re tipo maleng’ pa Yehova biketho wabinwang’u tego andhandha!
Wagol lonyo mi tipo i Lembagora
(2 Jukorinto 12:2-4) Ang’eyo ng’atu moko i Kristu, rundi apar wi ang’wen m’ukadhu (tek eni i kum, ang’eyo ngo; kadi tek embe i kum, ang’eyo ngo; Mungu ng’eyo), ng’atu ma kumeca juting’e malu cil i polo mir adege. 3 Man ang’eyo wagi ng’atuca (tek eni i kum, kadi e nge ku kum, ang’eyo ngo; Mungu ng’eyo), 4 maram juting’e ko malu i [Paradiso], m’ewinjo ko lembe de ma sagu aweca, ma cik uyio ngo ya dhanu weci.
Penji mi jusom
“Polo mir adege” ma juweco pire i 2 Jukorinto 12:2 copo nyutho Ker pa Masiya ma Yesu Kristu bibedo jabimne karacelo ku dhanu 144 000, eno re ma tie “polo ma nyen.”—2 Pet. 3:13.
Juyero nia etie “polo mir adege” pilembe etie kit bimobim m’usagu mange ceke.
“Paradiso” ma juting’o jakwenda Paulo nitundo cil i ie i ginmawokiwang’ copo nyutho, (1) Paradiso mi kum ma bibedo iwi ng’om, (2) paradiso mi tipo ma bibedo nuti saa maeca; ebibedo lee nisagu paradiso mi tipo ma kawoni, man (3) “paradiso pa Mungu,” i polo, ma bibedo nuti i saa ma rom ku m’i ng’om ma nyen.
(2 Jukorinto 13:12) Wumothru ku cwiocwic ma leng’.
it-2-F mba. 753
Cwio limbjo
“Cwiocwic ma leng’.” Jukristu mi rundi ma kwong’a gibed gimothiri ku “cwiocwic ma leng’” (Rm 16:16; 1Ko 16:20; 2Ko 13:12; 1Ts 5:26) kunoke “cwic mi mer” (1Pe 5:14), ma copere mon ubed umothiri ko i kindgi man co de i kindgi. Kit moth maeno urombo kud ayi ma nyithindho mir Israel gibed gicwio ko limbgi con nwang’u gimothiri. Kadok Lembagora ukoro ngo lembe lee iwi kit moth maeno de, ubenen kamaleng’ nia “cwiocwic ma leng’” kunoke “cwic mi mer” ubenyutho mer man bedo i acel ma Jukristu gibino ko i cokiri.—Yh 13:34, 35.
YENGA MI NINDO 27, DWI MIR 5–NINDO 2, DWI MIR 6
LONYO MA NWANG’ERE I LEMBE PA MUNGU | JUGALATIA 1-3
“Ajai ire i wang’e”
(Jugalatia 2:11-13) Ento kinde ma Kefa bino Antiokia, ajai ire i wang’e, kum lembe ni i wie. 12 Kum ka fodi dhanu m’uai ba Yakobo foduwok ungo, ecamu ku Thekdhanumange; ento ka giwok, ecoro cen man ekoire gire, m’elworo ko ju ma weg yaa. 13 Juyahudi m’udong’ de gipali kumeno gikugi; ketho cil Barnaba de wingre woko ku pali migi.
w17.04-F mba. 27 udu. 16
Nyo itie ku nen ma rom ku pa Yehova iwi bedopwe?
16 Som Jugalatia 2:11-14. Petro upodho i awic mi lworo dhanu. (Rie. 29:25) Kadok nwang’u elar ung’eyo paru pa Yehova cuu iwi lembuno de, re elworo Juyahudi ma jutimo yaa i kumgi ma gibino i cokiri mi Yerusalem. Jakwenda Paulo de ubino nuti i coko m’ugam utimere i Yerusalem i oro 49 R.M. Kinde m’etundo i Antiokia, ejuko Petro man etuco wi umbili pare. (Tic. 15:12; Gal. 2:13) Jukristu ma gi Juyahudi ngo gibino ku nen ma nenedi iwi akoyakoya ma Petro unyutho? Nyo giweko lembene ukiergi? Nyo Petro ubayu rwom pare pi kosa maeno m’etimo?
(Jugalatia 2:14) Ento kan aneno nia giwotho atira ngo calku lemandha mi lembanyong’a ma juboth ko, awacu ni Kefa i wang’gi ceke kumae, Tek in, m’i Jayahudi, ikwanyu koth lembe mi Thekdhanumange, ma k’ikwanyu koth lembe mi Juyahudi ngo, idong’ icung’o Thekdhanumange ya gikwany koth lembe mi Juyahudi nedi?
w13-F 15/3 mba. 5 udu. 12
Ni ju m’umaru Yehova, gin moko mbe ma copo kierogi
12 Petro ulworo dhanu, man saa moko ekier ku rac; re egwoko bedoleng’ pare ni Yesu man ni Yehova. Ku lapor, ekwero Rwoth pare i wang’ dhanu ceke, wang’ acel kende ngo, ento wang’ adek. (Lk. 22:54-62) I ng’eye, Petro utimere ve Jakristu ngo: etimere ve nia Jukristu ma gi Juyahudi ma jutimo yaa i kumgi pigi tie tek nisagu Jukristu ma gi Juyahudi ngo. Ento jakwenda Paulo uneno timo pare eno kamaleng’. Timone ubino rac, kum akoyakoya ucikere ngo nibedo i cokiri. Ma fodi timo pa Petro ku nyotho ngo bedo i acel mir umego, Paulo ujuke kamaleng’. (Gal. 2:11-14) Nyo kuhaya uketho ng’eicwiny umaku Petro man eweko ng’wec mi nwang’u kwo? Ungo. Ewinjo juk pa Paulo man etio kugi, e emedere asu ku ng’wec.
Wagol lonyo mi tipo i Lembagora
(Jugalatia 2:20) An judaru gura waku Kristu; man en e an kendo ngo m’ukwo ento Kristu e m’ubedo i ia; man kwo maeno m’abedo ko i kum akwo i yioyic, yioyic ma ni i Wod Mungu, m’umara, m’umire gire pira.
w14-F 15/9 mba. 16 udu. 20-21
Tim ni Mungu ku gwoko bedoleng’ kadok kud i kind “masendi dupa”
20 Wacopo yero ang’o pir amulaic ma nbgeng’ ungo? Ku lapor, wacopo nyego nenedi ku turcwiny? Yore acel ma ber mandha ma waromo timo ko kumeno utie niparu cuu iwi jamgony. Paulo de ugam utimo kumeno. Saa moko enwang’u nia tije mbe. Re eng’eyo bende nia Kristu utho pi judubo, ento ngo pi judubo ngo. Paulo ubino acel m’i kind judubonegi. Ekiewo kumae: “Kwo maeno m’abedo ko i kum akwo i yioyic, yioyic ma ni i Wod Mungu, m’umara, m’umire gire pira.” (Gal. 2:20) Andha Paulo ujolo jamgony, man enyang’ nia Mungu umio jamgonyne pire athothi.
21 Ka wan de waneno jamgony ni giramia ma Yehova umio ni ng’atuman m’i kindwa athothi, eno copo konyowa lee dit. Re lembuno nyutho ngo nia turcwinyne bithum wang’ acel, pilembe jumoko m’i kindwa nyo binyego ku kit amulaic maeno nitundo wamondo i ng’om ma nyen. Ento poi nia ng’atu m’uvoc ungo re ma binwang’u sukulia. Nindo ma Ker pa Mungu bikelo ie akwiacwiny iwi ng’om, man m’ebiketho ie dhanu ceke ma gigwoko bedoleng’ migi gidok leng’, ni ceng’ini mandha. Dong’ tim kero imond i the Ker maeno, kadok kud i kind masendi dupa de.
(Jugalatia 3:1) E Jugalatia ma wun adhura, ng’a m’urambuwu, ma juketho Yesu Kristu ma juguro kele i weng’wu?
it-1-F mba. 940
Jugalatia (Waraga ni)
Kinde ma Paulo uyero nia Jugalatia gin “adhura,” kunoke jukusegu, lembe moko mbe m’unyutho nia ebino weco kende kende pi thek moko m’uai kud i ng’om mi Gaule ma gibino kwo i Galatia yo malu. (Ga 3:1) Ento Paulo ubino juko jumoko mi cokiri, pilembe giweko ju ma cwaku lemsuru mi Juyahudi unyoth wigi, ma ke june gibino sayu bedopwe nikadhu kud i Cik pa Musa, kakare nisayu bedopwe ni kum yioyic i lembariba ma nyen. (2:15–3:14; 4:9, 10) “[Cokiri] mi Galatia” (1:2) ma Paulo ukiewo igi waraga ujebere ku Juyahudi man Juyahudi ngo bende, niwacu dhanu mi thek mange ma jutimo yaa i kumgi ku ma jutimo yaa ngo i kumgi, man bende Juselti (dhanu m’uai kud i Europe ma yo reto). (Tic 13:14, 43; 16:1; Ga 5:2) Paulo ukwanugi tup ni Jugalatia, kum kabedo ma gibino kwo i iene jubed julwong’o Galatia. Lembe ma Paulo ukiewo i waraga eno, ubenyutho nia ekiewe ni dhanu m’eng’eyo cuu mandha ma gibino kwo yo piny mir adhura maeno ma Roma ubino neno wie, ento ungo ni dhanu mange m’eng’eyo ngo ma gibino kwo yo malu mir adhura mi Galatia, ma ve etundo de ngo i bang’gi.