Nyo ibenwang’u kony i kum nyathibuku Tuchunguze Maandiko Kila Siku?

Nyo ibed isomo giragora man ponji ma kubang’ ceng’ ma nwang’ere i nyathibuku Tuchunguze Maandiko Kila Siku? Kan ungo, nyo iromo roye i program peri mi lembe mi tipo ma kubang’ ceng’? Umego ku nyimego ma dupa gibed ging’io i giragora ma kubang’ ceng’ kugweno. Eno konyogi kara gibed ku paru m’i ie dieceng’ duu saa ma gibetimo lembe migi ma tung’ tung’. (Yc 1:8; Zb 119:97) Icopo timo ang’o kara inwang’ bero lee i giragora ma kubang’ ceng’? Bed isom verse mange m’udhoko giragora ma jubeng’io ie pi ninyang’ kilili i lembe ma tung’ tung’ m’ugwaku giragorane. Kepim niparu iwi lembe moko ma jukoro pire i Biblia m’ubenyutho cik mir ukungu ma giragorane ubeketho peko i wie. I ng’eye, tii ku cik mir ukungune i kwo peri. Kan ibetio ku Lembe pa Mungu pi nimaku yub, ebitelo wi kwo peri man ibinwang’u bero lee.​—Zb 119:105.

Juruot mi Bethel mi ng’om zoo, gibed ging’io i giragora ma kubang’ ceng’ kugweno i saa mi madhu cai. I kind oro m’ukadhu ang’ec, jucaku ketho ponjine moko i Televizio JW i the thiwiwec PONJI MAN LEMBE MA TUNG’ TUNG’. Niai m’ineno programne moko, nindo daru kadhu rukani? Saa moko nyo lembe mi ie utie tap gin m’itie ku yenyne. Ku lapor, icopo tio nenedi ku kpawa pa Lot kinde m’ibemaku yub?

NEN VIDEO MA THIWIE TIE “KUD WUMAR NG’OM” (1YH 2:15). I NG’EYE, DWOK WANG’ PENJI M’ULUBO E:

• Ponji mi kugweno maeni ujengere iwi cik mir ukungu ma kani mi Biblia?

• Kpawa pa Lot ubemio iwa ponji ma kani iwi ariti mi maru ng’om ku piny mi ie?​—Th 13:12; 14:12; 19:3, 12, 13, 24-26

• Wacopo nyutho nenedi nia wamaru Yehova ento ungo ng’om maeni ku piny mi ie?