Wamed bodho mwa i tic mi rweyo lembanyong’a​—Warwei ni ju ma wang’gi tho

PIRANG’O PIRE TIE TEK: Dhanu ma pol ma wang’gi tho bemaru ngo akeca niweco ku dhanu ma ging’eyo ngo. Pieno, nimio igi lembatuca kwayu bodho. Yehova umaru dhanu ma wang’gi tho man ebedieng’ pigi lee. (Law. 19:14) Wacopo lubo lapor pare nwang’u wamaku yub mi konyo ju ma wang’gi tho kara gin de ging’ei Yehova man gidok jurimbe.

KITE MA JUROMO TIMO KO:

• ‘Yeny’ ju ma wang’gi tho. (Mt 10:11) Nyo ing’eyo ng’atu moko ma wat pare wang’e tho? Nyo teritwar ma wuni ie utie ku ot dharaza kunoke dikiri moko mi ju ma wang’gi tho, ma copo jolo girasoma mwa ma juyiko pi ju ma wang’gi tho?

• Nyuth nia idieng’ pigi. Ka ng’atu ma wang’e tho ubenyang’ nia imare man ibedieng’ kude, eno biketho ewinjere ma ber man ebibedo ayika niweco kudi. Tim kero icak kude wec iwi lembe moko ma copo nyang’e

• Konygi i thenge mi tipo. Pi nikonyo dhanu ma wang’gi neno piny cuu ngo kunoke ma wang’gi tho, dilo pa Yehova uwodho girasoma mi kwonde ma tung’ tung’. Dong’ penj ng’atuman m’i kindgi nia ecopo foyo eponj Biblia i ayi ma kani. Jadit cokiri ma neno wi tic mi lembanyong’a ucikere nineno nia umego ma tio iwi girasoma ukwayu girasoma ma juyiko pi ju ma wang’gi tho ma copo konyogi.