Gony mi nindo m’ubino, bimio kaka mi dwoko foyofoc ni Mungu man ni Kristu

In ibenweng’iri ku peko ma kani? Nyo itie jawiot m’ubepong’o rwom dupa ma tung’ tung’? Nyo itie janyodo ma jang’eti mbe man ibetungo awia peri kendi? Nyo itie nyathin mi kalasi man awia wedu mi somo gibecuku bidhi? Nyo ibenweng’iri ku peko mi remokum kunoke tiyo? Wan ceke wabenyego ku peko moko kokoro. Jukristu mapol gibenwang’iri ku peko ma dupa i saa ma rom. Re wang’eyo nia ceng’ini eni, peko maeno ceke bithum.​—2Ko 4:16-18.

Ento pi kawoni, gin ma tielo cwinywa tie ka wanyang’ nia Yehova ung’eyo pi peko mwa, ebeneno gwoko bedoleng’ mwa man cirocir mwa ni gin ma pire tek, man nia ebimio iwa mugisa ma dit i nindo m’ubino. (Yr 29:11, 12) Yesu bende ubedieng’ piwa. Ewacu nia ebibedo kudwa thirithiri tek wabetimo tic ma jumio i korwa (Mt 28:20) Kinde ma wabenyamu i lembe iwi gony ma wabinwang’u i the Ker pa Mungu, lembene ketho genogen mwa doko tek man emio iwa tego mi ciro peko ma tin wabenwang’ara ko.​—Rm 8:19-21.

NEN VIDEO MA THIWIE TIE CALU YAMU MADIT UBEBINO, WAMEDARA NINENO CUU BANG’ YESU!​—MUGISA MA KER BIMIO, MAN I NG’EYE, DWOK WANG’ PENJI M’ULUBO E:

• Kind dhanu udoko bor ku Mungu nenedi man lembene ukelo matoke ma kani?

• Dhanu ma gibegwoko bedoleng’ migi ni Yehova gibinwang’u mugisa makani i nindo m’ubino?

• Ang’o ma biketho wabinwang’u mugisa mi nindo m’ubino?

• I kind mugisa ma wabinwang’u i ng’om manyen, makani ma ibekuro kud ava?