PONJI MIR 13

Ninyutho kite mi tio ku ponji

Isaya 48:17

LEMBE M’ICOPO TIMO: Kony ju m’ubewinji ginen kite ma ponji peri umulo ko kwo migi, man nyuth igi ayi ma gicopo tio ko ku ponjine.

Par pi juwinj peri. Par cuu nia pirang’o dhanu gitie ku yeny mi ponji m’ibemio, man ang’o dhe m’i ponjine ma bimio igi kony nisagu.
I saa mi ponji peri, nyuth ni juwinj gin m’ukwayu gitim. Niai i acaki mi ponji peri ci, ng’atuman m’ubewinji ucikere niyero yor i ie kumae: ‘Ponji meni juyiko pira ba.’ Saa m’ibekoro paru ma dongo, nyuth kite ma jucopo tio ko kugi. Kud icok lembe wuu kumeni, ento nyuth pend lembe.

Kor kite ma gicopo tio ko ku cik mir ukungu mi Biblia; kore i ayi ma nyutho nia ibedieng’ i kum pidoic migi. Kakare nidhau iwi dhanu ma dong’ ginwang’ nia gi judubo, ng’ei nia gitie ku yioyic i Yehova man gimare, pieno bed ku genogen nia gibitimo lembe m’atira man gibitio ku juk m’ibemio igi.