Yesu ku julub pare gitimo diewor adek i Bethania niai ma giweko Yeriko. Kugweno mi ceng’ kas’acel, nindo 10 mi dwi mi Nisan, giai apokapiny pi nicidho i Yerusalem. Kec ubenego Yesu. Pieno kinde m’eneno yendulam, ecoro i bang’e. Nyo ebinwang’u nyinge i wie?

Kawoni utie thum mi dwi mir adek, man nitundo dwi mir abusiel de nwang’u fodi asu ulam ucego ngo nyinge. Re saa maeno ithe uluk. Yesu ubino niparu nia ebinwang’u nyinge malar cek. Ento enwang’u ngo acel de. Ithe m’uluk re m’ubino niwondo wang’gi. Eno uketho Yesu uyero kumae: “Ng’atu moko kud ucam nyingi ugambre kawono cil nja ku nja.” (Marko 11:14) E ndhundhu nica ithe ucaku ner, re julub gibinyang’ i thelembene urwonde.

Ing’ei saa ma nok, Yesu ku julub pare gitundo i Yerusalem. Ecidho i hekalu, m’elar eliewo nyaworo ku reto. Tin eciliewe aliewa kende ngo, ento ecitimo lembe moko m’urombo ku m’elar etimo oro adek i wang’e, i nindo mi Kadhukuwijo mi oro 30 R.M. (Yohana 2:14-16) M’ecidho maeni, Yesu uwok ubayu piny mi “ju ma giloko piny ku ju m’ung’iewo de ku i hekalu.” Bende, ‘eredho mesa mi juwilsente, ku kom mi ju m’uloko akuru.’ (Marko 11:15) Eyio ngo ni dhanu m’ubelabu piny migi gikadh kadok akadha de kud i lela mir hekalu pi nicidho i theng adhura mange.

Pirang’o Yesu umaku yub mi riemo dhanu m’ubeloko sente man m’ubelworo lei i hekalu? Eyero kumae: “Egore ngo kumae, Ot para jubilwong’o ot mi rwo ni thek ceke? ento wudwoke ni kagonjo mi weg ayeki.” (Marko 11:17) Elwong’ogi weg ayeki pilembe giketho bei matek mandha ni dhanu ma gibino ku yeny mi ng’iewo lei pi nithiero lam. Yesu neno nia eca utie kwo kunoke ayeki.

M’umbe jiji, julam ma dongo, jugorcik, man dhanu mange ma dongo giwinjo pi lembe ma Yesu utimo, uketho gisayu kendo yo ma ginege ko. Ento, lembene ularere ngo igi. Ging’eyo ngo yo ma giromo ninege ko, pilembe dhanu cokiri lee pi niwinje.

Juyahudi m’atika kendgi ngo re ma gibino i Kadhukuwijo, ento dhanu ma gijolo yioyic mi Juyahudi bende. Jugiriki de gibino nitimo thier i nindo maeno mir agba. Gigam gicidho ibang’ Filipo, saa moko nyo pi nyinge m’utie ku dhok mi Jugiriki. Ecicopere nia Filipo uneno nia lembuno cibedo cuu ngo, uketho emito ginyam i lembene kud Andrea. E Filipo gikud Andrea gitero lembene i bang’ Yesu, ma ve fodi asu ebino i hekalu.

Yesu ung’eyo nia tho pare dhingo, pieno eneno nia eno tie ngo saa mi pong’o yeny mi dhanu kunoke mi yenyo nia eng’eyere lee. E etio ku lapor pi nidwoko lembe ni jukwenda pare ario maeno, ewacu kumae: “Saa wok, ma jubiyungo ie Wod dhanu. Andhandha, ayero iwu, tek nying’ nganu kupodho i ng’om ungo etho de ngo, ebedo e kende; ento tek etho, ecego nyinge dupa.”​—Yohana 12:23, 24.

Nying’ nganu acel copo nen nia kabang’e mbe. Ento, ka jupidhe i ng’om man “etho,” e etwi edongo man ecego nyinge dupa. Kumeno bende, Yesu kende re m’utie ng’atu maleng’. Nikum gwoko bedoleng’ pare m’enyutho ni Mungu cil i tho, ebiyabu yo mi nwang’u kwo ma rondo ku rondo ni dhanu dupa ma gitie ku pidoic mi miiri gigi. Uketho eyero kumae: “Ng’atu m’umaru kwo pare erwinye; man ng’atu m’udagu kwo pare i ng’ombuni ebigwoke ni kwo ma rondo ku rondo.”​—Yohana 12:25.

Yesu ubino paru pire kende ngo, pieno eyero kumae: “Tek ng’atu moko timo ira, wek elub ng’eya; man ka m’ani ie, jatic para bende bibedo keca: tek ng’atu moko timo ira, Vwa biyunge.” (Yohana 12:26) Eno tie mugisa madit ma rukani! Ju ma Wego uyungogi, gibidikiri karacelo ku Kristu i Ker.

Yesu ung’eyo nia ebisendere man jubinege mi tek, pieno ewacu kumae: “Kawono cwinya ng’abre; e abiwacu ang’o? Vwa, lara ni saa maeni.” Eno ubenyutho ngo nia Yesu ubemito uro nitimo yeny pa Mungu. Eyero kendo kumae: “Ento kum lembe nini abino ni saa maeni.” (Yohana 12:27) Yesu uyio nitimo lembe ceke ma Mungu ukeco, uketho i ie nithiero kadok kwo pare.

Yesu ubino i hekalu ceng’ kas’acel nindo 10 mi dwi mi Nisan, saa maeno ebeweco pi tho pare ma dong’ udhingo. Ebino nidieng’ akeca iwi matoke ma tho pare bibedo ko iwi nying’ Mungu. Uketho eyero kumae: “Vwa, yung nyingi.” E dwal madit uai i polo uwacu kumae: “Adaru yunge, man abiyunge kendo.”​—Yohana 12:27, 28.

Wi dhanu m’ubino ceng’ini kude ulal. Jumoko uparu nia giwinjo dwand morpolo. Jumange ke uwacu kumae: “Malaika weco kude en.” (Yohana 12:29) Re eno ubino dwand Yehova! Eno utie ngo wang’ ma kwong’a ma dhanu giwinjo dwand Mungu niai ma Yesu ucaku tic pare iwi ng’om.

Oro adek ku nusu i wang’e, kinde ma Yesu ubino nimaku batizo, Yohana ma Jababutisi uwinjo dwand Mungu m’uwacu pi Yesu kumae: “Meni Woda ma jamerna, ma mutoro nega i kume.” Bende, ing’ei Kadhukuwijo mi oro 32 R.M., kit Yesu ugam ulokere i wang’ Yakobo, Yohana, man Petro. Dhanu adek maeno de giwinjo dwand Mungu m’uwacu: “Meni Woda ma jamerna, ma anyong’a nega i kume; wuwinje.” (Matayo 3:17; 17:5) Ento kawoni wang’ mir adege, Yehova uweco i kite ma dhanu dupa giwinjo!

Yesu uyero kumae: “Dwal maeni wok pira ngo, endre piwu.” (Yohana 12:30) Eno ubenyutho nia andha etie Wod Mungu, ma tie Masiya ma jular juewo pire.

Gwoko bedoleng’ pa Yesu utie lapor m’ukwayu dhanu gilubi, man ubenyutho nia Sitani Wonabali ma jabim mi ng’om maeni uromo ku nek. Yesu uyero kumae: “Kawono pokolembe mi ng’ombuni nuti: kawono jubibayu jadit mi ng’ombuni woko.” Tho pa Yesu bibedo ni aloci. Nenedi? Ekoro kumae: “Man an, tek juting’a malu kud i ng’om, abipeyo dhanu ceke i bang’a.” (Yohana 12:31, 32) Nikadhu kud i tho pare iwi yen mi can, Yesu bipeyo dhanu dupa ibang’e, man ebiyabu igi yo mi nwang’u kwo ma rondo ku rondo.

Wec m’eyero nia “juting’a malu,” uketho udul dhanu giwacu kumae: “Wawinjo i cik nia Kristu bedo rondo ku rondo: ka in iwacu nenedi kumae, jubikoting’o Wod dhanu malu be? Wod dhanune en e ng’a?” (Yohana 12:34) Kadok dhanu gineno lembe ceke, man giwinjo dwand Mungu ngi de, re asu dupa m’ikindgi giyio ngo nia Yesu utie andha wod dhanu, Masiya ma jung’olo pire.

Yesu ubeweco pire gire nia en e “der” calu m’elar eyero i wang’e de. (Yohana 8:12; 9:5) Eyero ni udul dhanu kumae: ‘Der ni i kindwu nindo ma nok. Wuwoth ma fodi der ni beng’wu, kara mudho kud urubwu. . . Ma fodi der ni beng’wu, wuyi ni der, kara wudok wot der.’ (Yohana 12:35, 36) Ing’eye epalere igi, pilembe nindo 10 mi dwi mi Nisan utie ngo nindo m’ukwayu etho i ie. I Kadhukuwijo mi nindo 14 mi dwi mi Nisan re ma ‘jubiting’e malu,’ niwacu jubigure iwi yen.​—Jugalatia 3:13.

Ubenen nia, niai ma Yesu ucaku tic, Juyahudi gikwero niyie. Timo migine ubino nipong’o lembila. Jabila Isaya ular uyero nia dhanu gibibedo abinga man ithgi bidhing’ kara kud gilokiri pi ninwang’u keikum. (Isaya 6:10; Yohana 12:40) Juyahudi mapol gikwero mi tek lembe ceke m’unyutho nia Yesu utie Jalar migi ma jular jung’olo nia bibino, ma tie yo mi kwo.

Nikodem, Yosefu mir Arimathayo, ku jutelwic mange dupa de, ‘giyio’ Yesu. Nyo gibinyutho yioyic migine ku timo, kunoke nyo gibidok ku ng’eigi pilembe gibelworo nia jubiriemogi kud i kacokiri, kunoke pilembe “gimaru dwong’ mi dhanu”?​—Yohana 12:42, 43.

Yesu ukoro nia niyie uketho i ie lembang’o. Eyero kumae: “Ng’atu m’uyio ira, meca eyio ira ngo, ento ni ng’atu m’uora. Ng’atu m’ubenena, meca ebeneno ng’atu m’uora.” Lemandha ma Mungu ung’olo ni Yesu nia eponji, man m’emedere niponjo, gitie lembe ma pigi tek. Uketho eyero kumae: “Ng’atu m’ukwera, man ejolo lem para ngo, gin acel ni i bang’e m’upoko lembe pare: lembe m’ayero, lembene bipoko lembe pare i kajikceng’.”​—Yohana 12:44, 45, 48.

Yesu udolo dhu wec pare ku lembe mae: “Ayero gira ngo; ento Wego m’uora, emio ira lembang’ola, m’ayer, ku m’awec de. Man ang’eyo nia lembang’ola pare en e kwo ma rondo ku rondo.” (Yohana 12:49, 50) Yesu ung’eyo nia rimbe udhingo cwir ni lam pi dhanu ceke ma giyie.​—Jurumi 5:8, 9.