Can unyai lee mandha i jumamon m’ucidho i dhu liel kinde ma giwok ginwang’u nia avuj Yesu mbe i liel! Maria Magdalene ulund uringo ibang’ “Simon Petro, giku jalub wadi ma Yesu maru” ma tie Yohana. (Yohana 20:2) E jumamon mange m’udong’ i dhu liel gilund gineno malaika moko, man i odliel bende malaika mange ubino nuti ‘m’uronyo kendi ma tar.’​—Marko 16:5.

E malaika acel uyero igi kumae: “Lworo kud unegwu, kum ang’eyo nia wuyenyo Yesu, ma jugure. Embe keni; kum ecer, cil calu ewacu. Wubin, wunen ka ma Rwoth ukouvuto i ie. E wuci tho tho, wuwac ni julubne kumae, ecer ku kind ju m’utho; man nen, etelo yo i weng’wu i Galilaya.” (Matayo 28:5-7) Wang’ acel, jumamon ne giringo niyero ni julub ku ‘mielkum man wang’uic.’​—Marko 16:8.

Maria ulund unwang’u Petro giku Yohana, ekoro igi ma kume ubemiel kumae: “giwodho Rwoth kud i liel m’aroka i cana, wang’eyo de ngo ka ma gikethe i ie.” (Yohana 20:2) E Petro giku Yohana gimaku ng’wec. Yohana uringo nisagu Petro man elar etundo ma kwong’a i dhu liel. Re emondo ngo i ie, ento ekemo ku woko man eneno bongu ma juboyo ko kum Yesu kende re m’unuti.

Kinde ma Petro utundo, ekakere wang’ acel i odliel. Eneno bongu ma nwang’ ku bongu ma juriwo ko wi Yesu. Yohana de udok umondo, e eyio wec ma Maria ugam ukoro. Kadok Yesu ular uyero igi i wang’e nia ebicer de, re gin ario zoo ginyang’ ungo nia ecer. (Matayo 16:21) Gidok i pacu ma wigi ujebere, ento Maria m’udwogo wang’ mir arionde i dhu liel udong’ asu keca.

Ikind saa maeno jumamon mange gini yo, gibeciyero ni julub nia Yesu udaru cer. Kinde ma giberingo, Yesu ugam urombo kugi man ewacu kumae: “Moth iwu.” E gipodho piny i the tiende man “girwo ire.” Ento Yesu yero igi kumae: “Kud wulwor: wucidh wuyer ni utumira ya gicidh i Galilaya man gibicinena kuca.”​—Matayo 28:9, 10.

Nwang’u iwang’e, digidi ular uyengo ng’om man jumalaika uwok rek, eno uketho juaskari ma gibino i dhu liel kumgi “umiel man gidoko calu avu dhanu.” Ing’eye saa ma kumgi piei, gimondo i adhura man “giyero gin ceke m’utimbre de ni julam ma dongo.” Julam gigam gicokiri ku judong Juyahudi man giwinjiri nia gibiculo juaskari kara giling’ iwi lembe ma gineno, ento gicwai vupo kumae: “Julubne gibino ku diewor, gikwale nwang’u wanindo.”​—Matayo 28:4, 11, 13.

I andha, ka juaskari mi Roma giweko nindo ukwalugi i saa ma gini dhu tic migi, jucopo negogi, pieno julam ung’olo igi kumae: “Tek lembene [niwacu vupo ma nia nindo kadhu kugi] tuc i ith jabim, wabiloko pidoie kara iwu kud upidi.” (Matayo 28:14) E juaskarine gigamu sente ma jumio igi, man gitimo lembe ma julam ging’olo. Pieno, vupo ma nia jukwalu uvuj Yesu uroc lee mandha ikind Juyahudi.

Fodi asu Maria Magdalene ubeywak i dhu liel. E eluro wang’e i odliel man eneno malaika ario m’ukendo kendi ma tar! Acel ubedo yor i thiwic, m’ucelo ke yor i tielo, kaka ma avuj Yesu ukeuvuto i ie. E gipenje kumae: “Dhaku iywak nedi?” Maria udwoko kumae: “Kum gikabu Rwoth para woko, ang’eyo de ngo ka ma gikethe i ie.” Kinde ma Maria uloko wang’e, eneno ng’atu mange. Ng’atune de upenje ve ma jumalaika gilar gipenje ko, re emedo kumae: “Iyenyo ng’a?” Maria uparu nia jatipodho re m’ubepenje, man eyero ire kumae: “Rwoth, tek itere kamange, yer ira ka m’ikethe i ie, kan abitere kamange.”​—Yohana 20:13-15.

I andha Maria ubino weco ibang’ Yesu, ma dong’ udaru cer, ento saa nica ebeng’ie ngo. Ento kinde ma Yesu ulwong’e nia, ‘Maria!’ e eng’ie wang’ acel, pilembe eng’eyo kite ma Yesu ubed uweco ko i bang’e. Maria ukok ku mutoro kumae: “Raboni!” (thelembene, “Japonji!”). Re ebenwang’u nia ve Yesu ubecidok i polo, e egwake. Yesu ulund ujuke kumae: “Kud imul kuma; kum fodi aidho ba Wego ngo; ento ci ba utumira, man iwac igi nia abecidho ba Vwa ba Wegwu, ba Mungu para man Mungu mu.”​—Yohana 20:16, 17.

Maria uringo kaka ma jukwenda man julub gicokiri i ie, man ewacu igi kumae: “Aneno Rwoth!” lembe m’ekoro umedo lembe ma jumamon mange ular ukoro igi. (Yohana 20:18) Ento lembe maeno ‘unen i wang’gi calu wec mananu.’​—Luka 24:11.

Ceng’ yenga nindo 16 mi dwi mi Nisan, cwiny julub ung’abere. Fodi gibenyang’ ungo nia liel copo dong’ thwolo nenedi. (Matayo 28:9, 10; Luka 24:11) Reto mi cing’ nica, Kleopa giku jalub mange giai kud i Yerusalem gibecidho i pacu mi Emao, ma nwang’ere i kilometre 11 kumeni.

Saa ma gini gengi gibino weco iwi lembe m’uwok. E ng’atu mange unwang’ugi. Epenjogi kumae: “Lembang’o ma wuwotho ku weco i kindwu?” Kleopa udwoko kumae: “Ibedo i kendi i Yerusalem man ing’eyo gin m’utimbre kuca i ceng’ maeni ngo?” Ng’atune upenjogi kumae: “E girang’o?”​—Luka 24:17-19.

Gidwoko ire kumae: “Gin m’utimbre kum Yesu ma Janazareti. . . . Wageno nia en e ng’atu ma biwaru Israel.”​—Luka 24:19-21.

E Kleopa giku jalub wadi gimediri ku koro ire lembe m’utimere ceng’ nica. Gikoro nia jumamon moko m’ucidho i dhu liel ma jukunyo i ie Yesu giwok ginwang’u lielne udong’ thwolo man gineno ku wang’gi lembe mir udu, niwacu malaika uwok i wang’gi man uyero igi nia Yesu utie kwo. Bende, Kleopa gikoro nia jumange de m’ucidho i dhu liel giwok “ginwang’u ebedo kumeno calu ma mon uwacu.”​—Luka 24:24.

Ubenen kamaleng’ nia julub maeno gibenyang’ ungo ikum lembe m’uwok ne. E ng’atu m’unwang’ugi i gengi ukoro igi terere wec m’utiro paru ma cuu ngo m’ubepido cwinygi, eyero kumae: “E wun ma wun adhura, ma adundewu galu ku yio lembe ceke ma jubila yero! Kristu kousendre be ku gin maeni ngo kan emond i dwong’ pare?” (Luka 24:25, 26) Ekoro igi bende Giragora mange dupa m’uweco pi Kristu.

E dhanu adek maeno gitundo i Emao. Kleopa giku jalub wadi gimito ging’ei lembe dupa, pieno gicero ng’atu ma kucelo kumae: “Dong’ wabed wakudu; kum uthieno dhingo, man ceng’ de doko ng’ic.” E eyio igi, nia gicam kugi karacelo. Saa ma ng’atuno urwo kpo, man eting’o kwen, eng’wenyo ie de, emio bende igi, ka gifoging’ie, re elund erwinyo igi keca keca. (Luka 24:29-31) Kawoni ging’eyo m’umbe jiji nia Yesu tie kwo!

Julub ario maeno giweciri ikindgi ku zungo iwi lembe m’uai ukadhu, kumae: “Adundewa wang’ lii ngo i iwa, kan eyero iwa i yo, kan ekoro iwa lembagora pa Mungu?” (Luka 24:32) E gidhuliri gidok i Yerusalem; kuca giwok ginwang’u jukwenda ku jumange de ucokiri. Kinde ma Kleopa giku jawodhe gibemito gikor lembe m’uwok igi, giwinjo jumange ubewacu kumae: “Rwoth ucer andha, man enyuthre ni Simon!” (Luka 24:34) E gin de gikoro kite ma Yesu uwok ko igi. Andha, gin de gitie jumulembe m’uneno ku wang’gi nia Yesu ucer.

Mbwang’ kumeni ci, Yesu ugam utundo i ot, kawoni gin ceke wigi uthum! Ecopo nen ni lembe ma winjere ngo pilembe gitwio dhugola ku koflo ni lworo mi Juyahudi. Re Yesu ucungo i kindgi keca, man ejuko cwinygi kumae: “Kwiocwiny ubed i beng’wu.” Ento ndiri makugi, man ‘giparu nia nyo gineno tipo,’ calu ma gilar giparu nindo moko i wang’e de.​—Luka 24:36, 37; Matayo 14:25-27.

Pi niketho ging’ei nia etie ngo tipo kunoke gin moko ma gibeparu apara, ento nia etie dhanu ku kume, Yesu unyutho igi cinge ku tiende man ewacu igi kumae: “Cwinywu ng’abre nedi? Penji de wok i adundewu nedi? Wunen cinga ku tienda nia en e an ku kita: wumul kuma, wunen; kum tipo mbe ku ring’o man cogo, calu ma wuneno abedo ko.” (Luka 24:36-39) Mutoro umakugi lee dit, re fodi asu nyathi jiji moko ni igi.

Yesu udok utimo lemange pi nikonyogi ginen nia utie en andha, epenjo kumae: “Gin moko nuti beng’wu keni mir acama?” E gimio ire avula mi rec moko ecamu. Ing’eye eyero kumae: “Maeni en e lembe para m’ayero iwu ma fodi ani i beng’wu [i wang’ tho para], nia gin ceke koutimbre be kakare, m’ugore pira i Cik pa Musa, ku Jubila, ku i Zaburi de.”​—Luka 24:41-44.

Yesu ukonyo Kleopa giku jalub wadi ginyang’ i Giragora dupa; kawoni ebekonyo bende dhanu ceke m’ucokiri keca, eyero kumae: “Egore kumeno, nia maku Kristu sendre, ecer kendo de ku kind ju m’utho i ceng’ mir adege; man kara juyer pi lokocwiny ku rucodubo i nyinge ni thek ceke, ugambre Yerusalem. Wun wu jumulembe mi gin maeni.”​—Luka 24:46-48.

I saa maeno, nwang’u fodi jakwenda Thoma mbe, pilembe nyo ecidho kaka moko. Nindo m’ulubo, jumange giyero ire ku mutoro kumae: “Waneno Rwoth!” Thoma udwoko igi kumae: “Tek aneno poyo musumali i cinge ngo, aroyo lweta de ngo i poyo musumali, aroyo cinga de ngo i wang’ ng’ete, abiyio ngo.”​—Yohana 20:25.

Nindo abora ing’eye, julub gicokiri kendo karacelo ma gitwio dhugola kikiki ibang’gi, man Thoma de nuti. Yesu utundo kendo i kindgi m’etie ku kum pa dhanu, e emothogi kumae: “Kwiocwiny ubed i beng’wu.” Egam eloko wang’e ibang’ Thoma man eyero ire kumae: “Riei lweti kakeni, inen cinga de; riei cingi de, iroi i wang’ ng’eta: man kud ibed ma yic umbe, ento ma yic nuti.” E Thoma upoi kumae: “Rwodha ku Munguna!” (Yohana 20:26-28) Kawoni dong’ eyio andha nia Yesu tie kwo, man etie giracwia mi tipo ma tie ku tego, man Yehova Mungu re m’uore.

Yesu uwacu kumae: ‘Kum idaru nena, iyio? mugisa ni ju ma gineno ngo ento giyio.’​—Yohana 20:29.