Kadhukuwijo ma tokcen ma Yesu ubecitimo udhingo

Yesu udaru niponjo jukwenda pare ang’wen iwi got Zeituni, edwoko wang’ penji migi iwi giranyutha mi bino pare man mi kajik mi ng’om maeni.

Etimo tic lee mandha i nindo 11 mi dwi mi Nisan! Ecicopere nia kinde ma gibedwogo pi nivuto i Bethania re ma Yesu uyero ni jukwenda pare kumae: ‘Wung’eyo nia yo ng’ei ceng’ ario Kadhukuwijo bino, e jumio Wod dhanu ya jugure.’​—Matayo 26:2.

Ubenen nia urwonde ceng’ kas’adek, Yesu urio duu karacelo ku jukwenda pare i kabedo ma yakini mbe i ie. Ceng’ kas’ario egam ejuko judong dini man etuco wi umbili migi kamaleng’ i wang’ dhanu. Kawoni gibemito ginege. Pieno enyuthere ngo igi kamaleng’ i nindo 12 mi Nisan, kara gin moko kud ucere nitimo Kadhukuwijo ku jukwenda pare urwonde ing’ei mwony pa ceng’, ma tie caku mi nindo 14 mi dwi mi Nisan.

Ento julam ma dongo ku judongo mi dhanu gicopo bedo yoo ngo iwang’ timo agba mi Kadhukuwijo. Gicokiri i lela pa Kayafa ma jalam madit. Pirang’o? Gitie ku ng’ecwiny pilembe Yesu utuco wi umbili migi kamaleng’ iwang’ dhanu. Kawoni giporo lembe karacelo “kara gimak Yesu ku rieko, ginege de.” Gibitimo lembuno nenedi man awene? Giyero kumae: “I nindo mir agba re ngo, rop umaru moc i kind dhanu.” (Matayo 26:4, 5) Lworo ubenegogi pilembe ging’eyo nia dhanu dupa gimaru Yesu.

I saa maeno welo moko utuc ibang’ judong dini. Lembe mi zungo utie nia etie Yuda Iskariote, acel m’ikind Jukwenda pa Yesu. Sitani upidho paru mi cibo Rwoth pare i ie! Yuda upenjogi kumae: “Wuyenyo ya umi ang’o ira kan amie iwu?” (Matayo 26:15) Lembuno unyayu anyong’a i igi, e “giribo lembe gikugi ya gimie sente.” (Luka 22:5) Gimio ire sente adi? Giwinjiri nimio ire cekel 30 mi mola ma tar. Etie rom ku sente ma jung’iewo ko ng’eca acel. (Ai 21:32) Eno ubenyutho nia judong dini gicayu Yesu, pilembe etie ng’atu ma tije nok i wang’gi. Yuda ucaku “yenyo maram ecopo cibe ko igi kan udul dhanu mbe.”​—Luka 22:6.

Nindo 13 mi dwi mi Nisan bicaku ceng’ kas’adek i mwony pa ceng’, man eni tie ceng’ mir abusiende man ceng’ ma tokcen ma Yesu bedo i Bethania. Urwonde, ubekwayu nia giyikiri wang’ ma tokcen pi Kadhukuwijo. Bende, ubekwayu junwang’ urombo iwang’e kara juthume man juvule zoo iwang’e, ma fodi nindo 14 mi dwi mi Nisan ucaku ngo. Gibinwang’u cam maeno kani man ng’a dhe ma bitede? Yesu unyutho ngo lembe maeno zoo de. Pieno Yuda de copo koro ngo lembene ni julam ma dongo.

Ecicopere nia ceng’ kas’ang’wen ku reto, Yesu uoro Petro giku Yohana niai kud i Bethania ewacu igi kumae: ‘Wuciyik iwa Kadhukuwijo, kara wacam.’ Gidwoko ire kumae: “Iyenyo wayik kani?” Yesu uyero kumae: ‘Ka wumondo i adhura, wubirombo ku ng’atu m’uyeyo agulu pii; wulub ng’eye ka m’emondo i ie i ot. E wubiwacu ni won ot kumae, Japonji uwacu iri kumae, odwelo ni kani, ka ma wabicamu ie Kadhukuwijo ku julubna? E ebinyutho iwu ot ma dit ma malu m’ubedo ku piny i ie: e wuyik kakeno.’​—Luka 22:8-12.

M’umbe jiji won ot maeno ubino jalub pa Yesu. Ecibedo ve ebino nikuro nia Yesu utii ku ot pare pi timo Kadhukuwijo. Kinde ma jukwenda ario maeno gituc i Yerusalem, ginwang’u lembe ceke tie calu ma Yesu ular uyero igi. Ginwang’u urombo ubedo ayika man lembe mange ceke urombo kara Yesu ku jukwenda pare 12 gitim Kadhukuwijo.