I ng’ey m’Adamu giku Eva giwok kud i podho mir Eden, ginyolo awiya dupa. Wodgi mi kwong’o nyinge ubino Kain man edoko jarafur; wodgi mir ario nyinge ubino Abel man edoko jakway rombe.

Nindo acel, Kain gikud Abel githiero lam ni Yehova. Nyo ing’eyo nia lam utie ang’o? Lam utie giramiya moko ma segi. Mutoro ugam unego Yehova i kum lam p’Abel, ento mutoro unege ngo i kum lam pa Kain. Lembene unyayu kwinyo lee dit i Kain. E Yehova ucimo Kain nia enen ber, kan ungo kwinyo biketho ebitimo lembe ma rac. Re ewinjo ngo.

Ento Kain uyero ni Abel kumae: ‘Bin wacidh i podho.’ Kinde m’eneno nia gini kendgi i podho, egoyo umin man enege. Yehova utimo ang’o pi lembe maeno? Yehova umiyo matira ni Kain: erieme cen man eyiyo ngo nia edwog kendo kaka ma jupagi n’i iye.

Lembe maeno ubemiyo iwa ponji ma kani? Saa moko, lembe moko copo timere i ayi ma wamaru ngo, e kwinyo romo mondo i iwa. Ka wanwang’u nia kwinyo umondo i iwa, kunoke ng’atu mange re m’uneno nia kwinyo umakuwa man epoyowa, ukwayu watim alokaloka nyapio pio man wabim wiye ma fodi eterowa ngo nitimo lembe ma rac.

Yehova biwil ungo pir Abel pilembe Abel ugam umare man ebed etimo lembe m’atira. Kinde ma Yehova bidwoko ng’om ni paradizo, ebicero Abel.

Kinde ma oro ubekadhu, dhanu ugam unyay lee dit iwi ng’om. Ju ma dupa gibed gitimo lembe ma reco, man jumalaika moko de gicaku timo lembe ma reco. Giweko kabedo migi i polo, man giloro iwi ng’om. Pirang’o? Gibino i ng’om kara girony kum mi dhanu man gigam igi mon.

E jumalaikane gigamu mon, man ginyolo kugi awiya. Saa m’awiyane gidongo, gidoko jurukara man gibino dhanu ma kwiny. Gibed gisendo dhanu lee dit. Yehova umito ngo ewek lembe maeno umedere asu, e enwang’u nia ukwayu eketh pii upong’ ng’om man unyoth dhanu ma gibetimo lembe ma reco.

Re ng’atu moko acel ubino ku timo m’ukoc ku mi jumange. Egam emaru Yehova. Nyinge ubino Noa, man giku dhaku pare ginyolo awiya ma co adek; nying’gi ubino Cem, Ham man Yafeth. Gin adek zoo mon migi ubino nuti. Yehova uwacu ni Noa nia egier avur ma dit kara kud githo ku juruot pare i pii ma dit ma bipong’o ng’om zoo. Avur utie ve sondu moko ma dit ma copo lierere iwi pii. Yehova uyero bende ni Noa nia eroy kwond lei ma tung’ tung’ i avur kara kud githo.

E wang’ acel Noa ucaku giero avur. Noa karacelo ku juruot pare gigiero avur pi oro ma romo 50. Gigiere tap calu ma Yehova unyutho igi. I kind saa maeca, Noa ubed upoyo bende dhanu nia pii ma dit bipong’o ng’om. Re ng’atu moko acel de mbe m’uwinje.

E saa ugam uromo pi nimondo i avur. Wakenen lembe m’utimere i ng’eye.