Ceng’ini ku Babel, adhura moko ubino nuti ma julwong’o Ur. Dhanu mir adhurane gibed giworo ngo Yehova, ento gibed giworo mungu m’araga dupa. Re i adhurane, ng’atu moko ubino nuti m’ubed uworo Yehova kende. Nyinge ubino Abraham.

Yehova uwacu ni Abraham kumae: ‘Wek ot peri ku jupewu, man icidh i ng’om m’abinyutho iri.’ Mungu udok ung’olo ire kumae: ‘Ibidoko thek ma dit, man abimiyo mugisa ni dhanu ceke mi ng’om nikumi.’

Abraham ugam ung’eyo ngo nia Yehova ubeore kani, re ebino ku genogen i wiye. E Abraham, Sara ma dhaku pare, won ma Tera man Lot ma wod umin giworo dwand Mungu; gicoko ter migi man gicaku woth ma bor.

Abraham ubino ku oro 75 saa ma gitundo ku juruot pare i ng’om ma Yehova umito ginen. Nying’ ng’ombe ubino Kanan. Kuca, Mungu uwok uweco i bang’ Abraham man eng’olo ire kumae: ‘Abimiyo ng’om maeni ceke m’ibeneno ni nyikweyi.’ Nwang’u Abraham giku Sara gidaru tii, man awiya migi de ubino mbe. Dong’ Yehova utimo ang’o kara lembe m’eng’olo ni Abraham utimere kakare

Oro ukadhu lee niai m’Abraham giku Sara gigamiri. Giweko ot ma cuu mandha ma gibino kwo i iye i adhura mi Ur, man gicaku kwo i the hema. Ento Sara ubed uwagere ngo pilembe ebino ku genogen iwi Yehova.

Sara ubino mito lee dit nia enyol nyathin, uketho eyero ni Abraham kumae: ‘Ka jatic para m’Hagar unyolo nyathin, ebibedo ve nyathin para.’ I ng’ey nindo moko, Hagar unyolo nyathin ma nico. Nyinge ubino Ismael.

Oro ma dupa i ng’eye, kinde m’Abraham udoko ku oro 99, man Sara ke ku oro 89, welo moko adek ugam uwendogi. Abraham ukwayugi nia gikegiyom i the yen man gicam piny moko. Nyo ing’eyo nia welone gibino jukani? Gibino jumalaika! Giyero ni Abraham kumae: ‘Oro ma cen i dwi ma rom kumeni, min ot peri binyolo nyathin ma nico.’ Sara ubino winjo lembene kud i hema. E eng’iero yor i iye, man ewacu kumae: ‘Acopo nyolo nyathin andha ma dong’ adaru tii?’

Oro m’i ng’eye, Sara unyolo nyathin ma nico, tap calu ma malaika pa Yehova ugam uyero. Abraham ucaku nying’ nyathinne nia Isak, wec ma thelembene tie “ng’iero.”

Kinde ma Isak udoko ku oro 5 kumeni, Sara ugam uneno Ismael ubecayu Isak. Emito egwok wode, pieno ecidho i bang’ Abraham man eyero ire nia eriem Hagar gikud Ismael cen. Ku kwong’a Abraham umito ngo nia eriemgi. Ento Yehova uyero ni Abraham kumae: ‘Winj dwand Sara. Abigwoko Ismael bende. Ento abitimo lembe m’ang’olo iri nikadhu kud i bang’ Isak.’