Lot gikud umin won m’Abraham gibino kwo karacelo i ng’om mi Kanan. Nok nok, leya migi unyay lee man kabedo udoko nok igi. Abraham ugam uyero ni Lot kumae: ‘Ebicopere ngo iwa nibedo asu karacelo. Akweyi, ng’ii kabedo m’ibifoyo nikwo i iye, man an abicidho i kabedo ma kucelo.’ Eno unyutho nia Abraham ubino dhanu ma ber mi tuko ngo!

E Lot uting’o wang’e man eneno kabedo moko ma leng’ mandha ceng’ini kud adhura mi Sodoma. Kuca can pii ubino mbe, man lum ma lep lep ubino lee mandha. E efoyo kabedo maeno, man gidok ku juruot pare kuca.

Dhanu mi Sodoma ku dhanu mir adhura moko ma ceng’ini keca ma nyinge Gomora, gibino dhanu ma kura migi rac magwei. Timo migi ma reco ukadhu mukero, uketho Yehova unwang’u nia kwayu enyoth adhura maeno cen. Ento Yehova umito ebodh Lot ku juruot pare, e eoro jumalaika ario gicidh giyero ni Lot kumae: ‘Wuwok kud i adhura maeni, kum Yehova ubecinyothe.’

Ento kakare niwok ndhu ndhu, Lot ucaku nyamere. E jumalaikane gimaku cing’ Lot, cing’ dhaku pare ku cing’ jumanyir pare ario, man giwodhogi kud i adhurane; giwacu igi kumae: ‘Wuringi! Wubodh kwo mwu man kud wunen ng’eywu. Ka wuneno ng’eywu, wubitho!’

Saa ma gitundo i adhura moko ma nyinge Zoar, Yehova uketho mac ku muganga ucwii iwi adhura mi Sodoma ku Gomora. E adhurane ginyothiri pet. Ento dhaku pa Lot uworo ngo dwand Yehova. Eneno ng’eye, e edoko ni mbegi mi kadu! Re Lot ku jumanyir pare giboth pilembe giworo dwand Yehova. M’umbe jiji, can ugam umondo lee i Lot man i jumanyir pare pilembe dhaku pare uworo ngo dwand Yehova. Eno ubeponjowa nia niworo telowic pa Yehova tie lembe ma pire tek lee dit.

Abraham uponjo wode ma Isak nia emar Yehova man egen lembang’ola pare ceke. Re kinde ma Isak udoko ku oro 25, Yehova ukwayu Abraham utim lembe moko ma tek lee. Ebino lembang’o?

Mungu uyero ni Abraham kumae: ‘Akweyi, ting’ wodi m’acel kulong’, man cidh ithiere ira ni lam iwi got moko i ng’om mi Moria.’ Abraham ung’eyo ngo thelembe m’uketho Yehova ukwaye nia etim kumeno. Re asu eworo Yehova.

Urwonde pir kugweno, Abraham uting’o Isak man jutic pare ario, man gicoko woth pi nicidho i ng’om mi Moria. I ng’ey woth mi nindo adek, gigam gineno kum gotne ku bor. E Abraham uyero ni jutic pare nia gikurgi keca kinde ma fodi gibecithiero lam gikud Isak. Abraham ugam uketho Isak uyeyo yen ma gibiwok kudho ko mac, en ke emaku palamularu i cinge. Isak upenjo won kumae: ‘Urombo ma wabithierone ni kani?’ Abraham udwoko ire kumae: ‘Woda, Yehova biwok miyo.’

Saa ma gitundo iwi got kuca, gigiero pemlam. E Abraham utwiyo cing Isak ku tiende de, man ekethe iwi pemlam.

Kinde m’Abraham ung’ayu palamularu, malaika pa Yehova ulwong’e niai kud i polo kumae: ‘Abraham! Kud itim nyathin no rac! Kawoni ang’eyo nia itie ku yiyoyic i Mungu, kum iyiyo nithiero wodi.’ Abraham ugam uneno nyog urombo moko umoko i kind yen. E egonyo Isak nyapio pio nica.

Niai cing’ nica, Yehova ucaku lwong’o Abraham nia jarimbe. Nyo ing’eyo nia pirang’o? Abraham ubed utimo lembe ceke ma Yehova ukwayu i bang’e, kadok saa m’enyang’ ungo i thelembene de.

Yehova udwogo kendo iwi lembang’ola m’etimo ni Abraham kumae: ‘Abimiyo iri mugisa man abiketho nyikweyi kunoke kodhi peri binyay.’ Eno unyutho nia nikum Abraham Yehova bimiyo mugisa ni dhanu ceke m’atira.