Yozefu ubino nyathin ma Yakobo unyolo ma dong’ eteng’ini; egam emare lee dit. Umego pare ma gi judongo ire gineno nia etie nyathin ma kacwiny won. Nyo iparu nia lembene ubed ufoyo igi? Kumira ubed unegogi lee i kum Yozefu man gidage. Nindo moko, Yozefu uleko kit lek moko ma nwang’u fodi eleko ngo, man ekoro lekne ni umego pare. Giparu nia lekne ubenyutho nia nindo moko gibirum i wang’ Yozefu. E gifodage dong’ magwei!

Ceng’ acel, umego pa Yozefu gibino kwayu rombe ceng’ini kud adhura mi Cekem. E Yakobo uoro Yozefu ucidh unen nia gitie nenedi. Saa ma gineno Yozefu ku bor, giweco i kindgi, giyero kumae: ‘Nen jalek maeni ubebino. Wanege cen!’ Gimake man gibole i vur ma thuc. Ento umin ma Yuda uyero kumae: ‘Kud wanege anega! Walwore ni ng’eca.’ E gilworo Yozefu ni jukuloka m’uai i ng’om mi Midian ma gibecidho i Misiri; jukulokane ging’iewe sente mi mola ma tar 20.

I ng’eye, umego pa Yozefu ginego diel moko man giroyo bongu pa Yozefu i rimbe; gioro bongune i bang’ weggi ku wec ma e: ‘Keng’ii nyo eni tie bongu pa wodi.’ E Yakobo uparu nia lei ma kwiny uyeco i Yozefu. Can umondo lee dit i adundene, ewak man ekwero kud jujuke.

Kinde ma Jumidian gitundo ku Yozefu i Misiri, giwok gilwore ni Pothifar m’ubino ng’atu ma pire tek lee, man Yozefu udoko ng’eca pare. Ento Yehova uweko ngo Yozefu. Pothifar uneno nia Yozefu timo tic cuu man etie ng’atu ma jucopo geno. E i ng’ey nindo ma nok, Pothifar uketho Yozefu ucak neno wi piny pare zoo.

Dhaku pa Pothifar ugam uneno nia Yozefu leng’ man nia e tek. E nja ci ecaku kwayu nia Yozefu uvut kude. Yozefu utimo ang’o? Ekwero, man eyero kumae: ‘Ungo! Eno tie lembe ma rac. Rwoth para gena, in ke itie dhaku pare. Acopo vuto ngo kudi, pilembe eca nwang’u atimo dubo ni Mungu!’

Nindo acel, dhaku pa Pothifar umito maku Yozefu ku kero kara evut kude. Emake ku bongu pare, ento Yozefu uringo. Kinde ma Pothifar udwogo i pacu, dhakune uloko nia Yozefu umito make ku kero. Re eno ubino vupo. Ng’eicwiny ugam umaku Pothifar lee mandha, e ebolo Yozefu i kol. Ento wi Yehova uwil ungo ku Yozefu.

Kinde ma Yozefu ubino i kol, Farao m’ubimo mi Misiri uleko lek moko. Ng’atu moko acel de mbe m’utuc nikoro the lekne. E jatic pa Farao acel unyutho ire nia Yozefu copo koro the lek pare. Ndhu ndhu nica, Farao uoro jucidh julwong’o Yozefu.

Farao upenjo Yozefu kumae: ‘Nyo icopo koro the lek para?’ Yozefu udwoko kumae: ‘Cam bicek lee i Misiri pi oro abiro, man kec bidok podho pi oro abiro. Dong’ ng’ii ng’atu moko ma riek ucok cam i dero kara dhanu peri kud utho ku kec.’ E Farao udwoko kumae: ‘Ang’iyo de in! Ibibedo ng’atu mir ario ma won tego i Misiri!’ Ng’a m’ukonyo Yozefu kara eng’ey the lek pa Farao? Utie Yehova.

Pi oro abiro m’ulubo, Yozefu ucoko cam lee. E kec ugam upodho iwi ng’om zoo calu ma Yozefu uyero. Dhanu ubed uai kaka ma tung’ tung’ pi nibino ng’iewo cam i bang’ Yozefu. Saa ma Yakobo ma won uwinjo nia cam utie i Misiri, eoro awiya pare gicidh ging’iew cam kuca.

Wot Yakobo gicidho i bang’ Yozefu. Yozefu uwok ung’iyogi wang’ acel. Ento gin ging’iye ngo. E girum piny i wang’e, tap calu m’egam eleko saa m’ebino aradu. Yozefu umito ek’eng’ey ka nyo fodi asu umego pare gitie kud adegi i igi. Eyero igi kumae: ‘Wubino i ng’om mwa pi nineno kaka ma wucopo maku.’ Giyero ire kumae: ‘Ungo! Watie umego 12, waai i Kanan. Umegwa acel udaru tho, ma cogo ke udong’ ku wegwa.’ Yozefu uyero igi kumae: ‘Wukel umegwu ma cogo i bang’a, kan abiyiyo nia wuyero lemandha.’ E gidok i bang’ weggi i pacu.

Kinde ma cam uthum ni juruot pa Yakobo, eoro wote kendo i Misiri. Gicidho bende ku Benjamin m’umeggi ma cogo. Pi nimulo i umego pare, Yozefu ukanu kopo pare mi mola ma tar i saki pa Benjamin, man eketho juriemo tokgi nia gikwalu kopo pare. Kinde ma jutic pa Yozefu ginwang’u kopone i saki pa Benjamin, ndiri umaku umego pare. Gikwayu Yozefu nia timba emii matira igi kakare nimiyo matira ni Benjamin.

Kawoni dong’ Yozefu ung’eyo nia umego pare gidaru timo alokaloka. Pieno eromo medere ngo asu nimung’ere igi. Ecaku wak man eyero igi kumae: ‘Atie Yozefu m’umegwu. Fodi vwa tie kwo asu?’ Dhug umego pare uthwo kaw! Yozefu uyero igi kumae: ‘Cwinywu kud upidi pi lembe ma wutimo con i kuma. Mungu re m’uora pi nigwoko kwo mwu. Kawoni, wucidh wugam baba pio man wukele kuni.’

Gigam gidok pio pio i pacu man gikoro lembe ma ber maeno ni weggi. E gicidho kude i Misiri. Yozefu gidok ginwang’iri giku won kendo i ng’ey ma gipokiri pi oro ma lee.