Ng’atu moko ubino kwo i ng’om mi Uz, man ebed eworo Yehova. Nyinge ubino Yob. Ebino jalonyo man juruot pare ubino lee. Ebino dhanu ma ber, man ebed ekonyo jucan, mon ma coggi tho man nyithikic. Nyo calu m’ebed etimo lembe m’atira ci dong’ eromo kadhu ngo kud i peko moko acel de?

Yob ung’eyo ngo nia Sitani Wonabali ubino nene. Yehova upenjo Sitani kumae: ‘Nyo ineno jatic para ma Yob? Ng’atu moko acel de mbe iwi ng’om ma calu en. Eworo dwanda man etimo lembe m’atira.’ Sitani udwoko kumae: ‘Yob ubewori mananu ngo. Ibegwoke man imiyo mugisa ire. Imiyo ire ng’om man iketho leya pare unyay. Kan imaye ku piny maeno ceke, ebiweko niwori.’ Yehova udwoko ire kumae: ‘Icopo ketho Yob i amulaic. Ento kud ikab kwo pare.’ Pirang’o Yehova uweko Sitani uketh Yob i amulaic? Ebino ku genogen nia Yob bicungo ma tek i wang’ amulaicne.

Sitani ucaku kelo peko ma tung’ tung’ iwi Yob pi nimulo iye. Mi kwong’o, eketho dhanu mi Seba ubin uyaku dhieng’ man kana pa Yob ceke. I ng’eye, mac uwang’u rombe pare ceke. Udul dhanu mange, niwacu Jukaldayo, gibin gikwalu ngamia pare ceke. Junego jutic pa Yob ma gibino kwayu lim pare. I ng’eye, lembe moko ma rac magwei ugam utimere. Awiya pa Yob utho pet kinde ma ot ma gibino nambu i iye urwombere i wigi. Peko maeno uroyo can lee i Yob, re eweko ngo niworo Yehova.

Sitani umito nia emed masendi lee i kum Yob, pieno eketho vur ukwodo kume zoo. Yob uneno can lee dit. Kadok nwang’u Yob ung’eyo ngo nia pirang’o ebenwang’ere ku peko maeno zoo de, re emedere asu niworo Yehova. Mungu uneno lembe maeno ceke, man anyong’a unege lee i kum Yob.

I ng’eye, Sitani udok utiyo ku dhanu adek pi nimulo i Yob. Giyero ire kumae: ‘Copere nia itimo dubo man ibemito imung’e, eno re m’uketho Mungu ubemiyo iri matira.’ Yob udwoko igi kumae: ‘Atimo ngo lembe ma rac acel de.’ Ento Yob ubino paru nia Yehova re m’ubenyayu peko maeno i kume, man eyero nia Mungu ubetimo ngo ire lembe i ayi m’atira.

Jalawobi moko ma nyinge Elihu ubedo ling’ man ebino winjo wec migi. I ng’eye, emaku wec man eyero kumae: ‘Wun ceke wucwayu vupo. Yehova tie Mungu ma yawe mbe. Ecopo timo ngo lembe ma rac nyanok de. Eneno piny ceke man etie ayika nikonyo dhanu kinde ma gibenwang’iri ku masendi.’

I ng’eye, Yehova ugam uweco i bang’ Yob. Epenje kumae: ‘Ibino kani kinde m’abecwiyo polo ku ng’om? Pirang’o iyero nia atimo iri lembe m’atira ngo? Aweca re ibeweco, ento ing’eyo ngo thelembe m’uketho peko maeno unweng’i.’ Yob ugam uyiyo kosa pare man eyero kumae: ‘Andha aweco swa. I wang’e, alar awinjo piri, ento kawoni ang’eyi. Lembe moko mbe ma copere ngo iri. Tim ira kisa pi lembe ma dhoga yero.’

Kinde m’amulaic pa Yob uthum, Yehova ukeyo kume man emiyo ire piny lee nisagu m’elar ebino ko. Yehova umiyo mugisa ni Yob pilembe eworo dwande kadok i saa m’ebino ire lembe ma tek. Nyo in de ibimediri niworo Yehova calu Yob, kadok saa ma peko ma lee uwok i kumi?

I Misiri, jubed julwong’o awiya pa Yakobo nia Juisrael. I ng’ey ma Yakobo giku Yozefu githo, Farao mange ucaku bimo. Enwang’u nia nyithindho mir Israel gibenyay man kero migi ubemedere nisagu mi Jumisiri. Farao maeno ugam uketho Juisrael udoko ni ng’eca. Ecaku diyogi kara gigoy briki man gitim tic ma tek mandha mi podho. Re saa ma Jumisiri gibediyo nyithindho mir Israel nitimo tic ma tek, wendgi umedere ameda. Calu ma nyay migi ufoyo ngo i Farao, egam eng’olo nia juneg awiya ma co mir Israel ceke i saa mi nyoliri migi. Lembuno unyayu lworo lee mandha i nyithindho mir Israel!

Dhaku moko mir Israel ma nyinge Yokebed unyolo nyathin moko ma nico ma leng’ mandha. Kara kud juneg nyathinne, eyiko bwathi moko ma dit, eketho nyathinne i iye man ecidh ekane i kind kolo i dhu kulo Nil. Nyamin nyathinne ma nyinge Miriam ubedo ceng’ini kude pi nineno wiye.

Kinde ma Nyafarao uloro i kulo pi nijom, eneno bwathi moko ma dit. Saa m’eyabu wiye, enwang’u nyathin ubewak i iye; kisa unege lee i kum nyathin maeno. Miriam upenje kumae: ‘Imito acidh asay mego moko ma bipido nyathinne iri?’ Nyafarao uyiyo; e ndhu ndhu Miriam ucidh ulwong’o Yokebed ma min. Nyafarao uwacu ni Yokebed kumae: ‘Gam nyathin maeni, gwoke ira, man abiculi.’

Saa ma nyathinne udongo, Yokebed utere i bang’ Nyafarao, man Nyafarao ucaku nyinge Musa. Etunge calu nyathin pare gire. Musa udongo i kal pa Farao, pieno ebino ku copo mi nwang’u gin moko ci m’etie ku yenyne. Ento wiye uwil ungo ku Yehova. Eng’eyo nia etie Jaisrael ento ungo Jamisiri. Bende, eng’iyo nitimo ni Yehova.

Kinde ma Musa udoko ku oro 40, enwang’u nia kwayu ekony jupagi. Nindo acel, kinde m’eneno Jamisiri moko ubefodo Jaisrael ma tie ng’eca, egoye bir man enege, e eyike i kwiyo. Saa ma Farao uwinjo lembuno, emito eneg Musa cen. Ento Musa uringo i ng’om mi Midian. Kuca, Yehova uwok ugwoke.