Musa gikud Arun gicidho i bang’ Farao pi niyero ire wec ma Mungu uoro kogi, giwacu kumae: ‘Kan iweko ngo dhanu para gicidhi, abikelo ulwang’ini ma rac i ng’om Misiri.’ Udul mir ulwang’ini ma rac ugam umondo i udi mi Jumisiri ceke, gimondo i udi mi julonyo ku mi jucan de. Misiri zoo upong’ kud ulwang’ini. Ento ulwang’ini ubino mbe i ng’om mi Gocen, kaka ma Juisrael gibedo i iye. Masendi maeni ku mange m’udong’ umulo kum Jumisiri kendgi. Farao uyero ni Musa kumae: ‘Kway Yehova udar ulwang’ini maeni cen ci wubicidho ku juthu.’ Re saa ma Yehova udaru ulwang’ini, Farao ulokere. Nyo masendi maeno umiyo ponji ni Farao?

Yehova uwacu kumae: ‘Ka Farao uweko ngo dhanu para gicidhi, twoyo bimaku lim ceke mi Misiri, man gibitho.’ Urwonde, lim ucaku tho. Ento lim mi Juisrael utho ngo. Re asu Farao ukwero magwei niweko nyithindho mir Israel.

I ng’eye, Yehova uyero ni Musa nia edok kendo i bang’ Farao, man ecok vuru ecoy i kor yamu. Kinde m’ecoye, vurune ugam udoko ni utur, man uturne uumo ng’om zoo. I ng’eye epoto i kum Jumisiri ceke. Utur maeno ukwodo vur i kum Jumisiri ku leya migi kpo. Re asu Farao uweko ngo nyithindho mir Israel gicidhi.

Yehova udok uoro Musa kendo nia ecidh eyer ni Farao kumae: ‘Fodi asu ibekwero niweko dhanu para gicidhi? Urwo, pei bicwii iwi ng’om Misiri.’ De andha urwonde Yehova uoro pei, eoro morpolo man mac. Nwang’u fodi polo umor ungo kumeca i Misiri. Yen ku piny mi podho ceke unyothere, ento i Gocen lembe maeno utimere ngo. Farao uyero ni Musa kumae: ‘Kway Yehova ujig masendi maeni! I ng’eye abiweko wubicidho.’ Re saa ma pei man koth ujik, Farao uloko paru pare.

I ng’eye Musa uyero kumae: ‘Kawoni bonyo bicamu piny moko ci ma pei uweko.’ E bonyo ma wendgi kwanere ngo upoto iwi piny mi podho man iwi yen; gicamu pinje pet. Farao uwacu ni Musa kumae: ‘Kway Yehova udar bonyo maeni cen.’ Re kadok Yehova udaru bonyo de, asu Farao ucerere.

Yehova ugam uyero ni Musa kumae: ‘Riey cingi malu i polo.’ Musa ugam urieyo cinge, e wang’ acel piny ucido bii. Mudho uumo ng’om mi Misiri bii pi bang’ adek, man jucopo neno ngo kum dhanu kunoke kum piny moko ci. Juisrael kendgi re ma gibino ku der i udi migi.

Farao uwacu ni Musa kumae: ‘Wucopo cidho karacelo ku juthu. Re lim mwu ceke bidong’ kakeni.’ Musa uyero ire kumae: ‘Wabicidho ku lim mwa pilembe wabiwok thierogi ni Mungu mwa.’ Kwinyo ugam uopo i Farao lee dit. Ekok i wigi kumae: ‘Wuai cen kud i wang’a! Kan abinenowu kendo keni, abinegowu cen.’

Musa ung’olo ni Farao nia ebidok ungo kendo i bang’e. Ento i wang’ niweko Farao, eyero ire kumae: ‘I diewor ma tin, awiya ma kayu ma co ceke mi Misiri gibitho, niai i kum kayu pa Farao ma jany iwi komker pare nitundo i kum kayu pa jatic.’

Yehova uyero ni nyithindho mir Israel nia giyik cam moko ma segi. Eyero igi kumae: ‘Wuthum nyathi rombo kunoke nyathi diel ma oro pare acel, man wuketh kum rimbe moko i kum ng’et dhugola mwu man iwi riu mi dhugolane. Wuvul ringe man wubicame ku kwen ma thobi mbe i iye. Wukenduru, wurony wara mwu i thiendwu, man wubed ayika. Abigonyowu i diewor ma tin.’ M’umbe jiji, lembe maeno unyayu mutoro lee i nyithindho mir Israel!

I diewor ma cing’ nica, malaika pa Yehova ucidho i udi acel acel mi Misiri. E kubang’ ot ceke ma juwiro ngo rimo i wang’ dhugolane, nyathin ma co ma kayu utho. Ento malaikane umulo ngo kum dhanu ceke m’i udi ma juwiro rimo i dhugolane. Awiya ma co ma kayu utho i ot moko ci mi Misiri, dok ebed i ot pa jalonyo kadi pa jacan. Ento i bang’ nyithindho mir Israel, nyathin moko acel de mbe m’utho.

Kadok wod Farao ma kayu bende utho. Kawoni dong’ Farao unwang’u nia gin m’ecopo timo mbe! E ndhu ndhu nica, elwong’o Musa gikud Arun, man eyero igi kumae: ‘Wuwoki. Wuai cen ku keni. Wucidh wutim ni Mungu mwu, wucok lim mwu, man wucidhi!’

Nyithindho mir Israel giwok kud i Misiri ku diewor kinde ma dwi ulero ng’om ma ber; giwok ma gicokiri juruotman i suru migi. Gibino dhanu elufu dak abusiel (600000), jumaco ku jumamon man awiya ma thindho. Bende, dhanu mange ma wendgi lee gicidho karacelo kugi kara gin bende gitim thier ni Yehova. Kawoni dong’ nyithindho mir Israel gitie agonya!

Pi nibepoy i kum kite ma Yehova ubodho kogi, ugam ukwayu gibed gicam cam maeno wang’ acel kubang’ oro. Jubed julwong’o nyinge nia Kadhukuwijo.