Udu m’utimere i Nam ma kwar

Kinde ma Farao uwinjo nia nyithindho mir Israel giweko Misiri, eloko paru pare; enwang’u nia etimo rac niwekogi. Eng’olo ni juaskari pare kumae: ‘Wuyik magali para, man wariemu tokgi! Pirang’o waweko joni gicidho?’ Farao ku juaskari pare gicaku riemo tok nyithindho mir Israel.

Yehova ubino telo wi dhanu pare ku mbegi mir afuru ku dieceng’ man ku mbegi mi mac kud uthieno. Etelo wigi nitundo i Nam ma kwar, man eyero igi nia gigonj keca.

E nyithindho mir Israel gineno nia Farao kud udul mony pare giberiemo tokgi. Ubino ve gimoko i uwic, kum udul mony mi Misiri ubino i ng’eygi, i wang’gi lundo Nam ma kwar umoyere gwaa. E gikok i bang’ Musa kumae: ‘Musa, wadaru tho! Pirang’o iwodhowa kud i Misiri?’ Ento Musa udwoko igi kumae: ‘Lworo kud unegwu! Wukur, man wubineno kite ma Yehova bibodho kowa.’ Eno unyutho nia andhandha Musa ubino ku genogen iwi Yehova!

Yehova uyero ni nyithindho mir Israel nia gicok woth. Uthieno eca Yehova uketho mbegi mir afuru upoko kind nyithindho mir Israel ku Jumisiri. I thenge mi Jumisiri piny ubino abinga, ento i thenge mi Juisrael, piny ulero ma leng’.

Yehova uyero ni Musa nia eriey cinge iwi nam. E Yehova uketho yamu ma tek ukoto iwi namne. Yamune ukoto nitundo ma nam upokere ni ario man gengi uyabere i diere. Juisrael milioni ma dupa giwotho iwi ng’om m’uthwo man angongo pii ucungo i ng’etgi ve gang’.

Udul mony pa Farao gilubo tok Juisrael nitundo i die nam. E Yehova ujebo wi udul mony pa Farao. I ng’eye ewodho ukobere kunoke pine mi magali migi. Juaskari pa Farao gicaku kok kumae: ‘Waringu cen ku keni! Kum Yehova ubekiedo pigi.’

Yehova uyero ni Musa kumae: ‘Riei cingi iwi nam.’ E angongo pii m’utiekogi kun ku kun ucorere iwi udul mony mi Misiri. Farao kud udul mony pare githo kpo. Ng’atu acel de mbe m’uboth kud i kindgi.

I dhu wat yolokaca ke udul mi dhanu ma lee mandha ubino yungo Mungu ku wer, giyero kumae: ‘Wuwer ni Yehova, kum edodere malu nisagu zoo. Ebolo kana ku ng’atu ma n’i wiye i nam.’ Kinde ma dhanu gibewer, jumamon gicaku goyo vul man gimiel. Dhanu ceke ubino kud anyong’a pilembe dong’ gitie agonya.