Yehova uyero ni Musa kumae: ‘Bin i bang’a iwi got kuni. Abikiewo cik para iwi bankidi man abimiye i beng’i.’ Musa ugam uidho iwi got man etimo nindo 40 ku diewor 40. Kinde m’ebino kuca, Yehova ugam ukiewo Cik apar iwi bankidi ario man emiyo bankidinegi i bang’ Musa.

I ng’ey nindo moko, nyithindho mir Israel giparu nia Musa uwenjogi. Giyero ni Arun kumae: ‘Wabemito ng’atu moko utel wiwa. Yik iwa mungu!’ Arun udwoko igi kumae: ‘Wumii ira mola ma kwar mwu.’ E etwagu mola ma kwarne ku mac man eyike ni ayi nyathi dhiang’. Udul dhanu gigam gikok kumae: ‘Nyathi dhiang’ maeni tie mungu mwa m’uwodhowa kud i Misiri!’ Gicaku woro nyathi dhiang’ mi mola ma kwar, man gipangu nitimo fet. Nyo eno tie lembe ma cuu? Ungo. I wang’e, ging’olo nia gibiworo Yehova kende, ento kawoni gituro lembang’ola migi.

Yehova uneno lembe m’ubino timere, pieno eyero ni Musa kumae: ‘Dok i bang’ dhanu. Kum giworo ngo lembe m’ang’olo igi man giberwo i wang’ mungu m’araga.’ Musa ugam uloro ku wi got m’emaku bankidi ario i cinge.

Kinde ma Musa uwok ceng’ini ku kagonjo, ewinjo dhanu gibewer. I ng’eye, eneno gibemiel man giberum i wang’ nyathi dhiang’. Ng’eicwiny ugam umaku Musa lee mandha. Ebolo bankidi ario m’ubino i cinge i ng’om, e bankidine ugam urungere nziki nziki. Ndhu ndhu nica, enyotho ayi nyathi dhiang’ne cen. I ng’eye, epenjo Arun kumae: ‘Ang’o m’ucweli nitundo itimo lembe ma rac kumeni?’ Arun udwoko ire kumae: ‘Ng’eicwiny kud unegi i kuma. Ing’eyo kura mi dhanu maeni. Gikwayu nia ayik igi mungu, e abolo mola ma kwar migi i mac ci ewodho nyathi diang’!’ Nwang’u ukwayu ngo Arun utim lembe maeno. Musa ugam udok kendo iwi got man ekwayu pi dhanune i bang’ Yehova, kara ewek dubo migi.

Yehova ugam uweko dubo mi dhanu ma gibino ayika niwore. M’umbe jiji, pire ubino tek lee nia nyithindho mir Israel gilub telowic pa Musa.

Kinde ma Musa ubino iwi got Sinai, Yehova uyero ire nia egier hema moko ma segi; nyinge bibedo hema mi cokiri. I hema maeno re ma nyithindho mir Israel gibibetimo ire thier. Kwayu gibed giyey hema mi cokirine kakare ceke ma gibecidho i iye.

Yehova uyero kumae: ‘Yer ni dhanu nia gimii piny nimakere ku copo migi pi nigiero hema mi cokiri.’ Nyithindho mir Israel gimiyo mola ma kwar, mola ma tar, mola man kidi ma i upal. Gimiyo bende bongu mi yuk rombe, bongu ma nwang’, adila man piny mange de. Gimiyo piny lee dit uketho Musa ujukogi kumae: ‘Eromo! Kud wukel piny mange.’

Jumaco ku jumamon dupa ma weg bodho gimiyiri pi nigiero hema mi cokiri. Yehova umiyo igi rieko mi timo tije, pieno jumoko ucaku yiko uzi, jumange ke ucaku cwiye ni bongu kunoke niketho rangi i kume. Jumoko uyiko kidi, jumange uyiko mola ma kwar, jumange ke uyiko bau.

Nyithindho mir Israel gigiero hema mi cokiri tap calu ma Yehova uyero igi. Giyiko ridho ma dit pi nipoko i hemane ni ario: Kamaleng’ ku Kamaleng’ m’usagu. I Kamaleng’ m’usagu, giketho sanduku mi lembariba ma juyiko ku yen magasia, man juwiro kume ku mola ma kwar. I Kamaleng’, giketho thetala ma juyiko ku mola ma kwar, meza man pemlam mir udok ma ng’wice ng’ar. I lela giketho jamlogo mi mola man pemlam ma dit. Sanduku mi lembariba ubed upoyo wi nyithindho mir Israel i kum lembe ma ging’olo ni Yehova. Nyo ing’eyo nia lembariba utie ang’o? Lembariba utie lembe moko ma segi ma ng’atini ng’olo nia ebitimo.

Yehova ung’iyo Arun ku wote re ma gibed julam man gitim i hema mi cokiri. Gicikiri nigwoko hemane man nithiero lam ni Yehova i iye. Arun m’ubino jalam ma dit re m’ubed umondo i Kamaleng’ m’usagu. Ebed emondo kuca wang’ acel kubang’ oro pi nithiero lam pi dubo pare, pi dubo mi juruot pare man pi dubo mi thek mir Israel zoo.

Nyithindho mir Israel gidaru hema mi cokiri i ng’ey oro acel niai ma giwok kud i Misiri. Kawoni dong’ gitie ku kaka ma gicopo woro iye Yehova.

Yehova ugam upong’o hemane ku dwong’ pare man eketho afuru ubedo i wiye. Pi nindo ceke ma kan afuru ucungo iwi hema, nyithindho mir Israel gibed gicoko ngo woth ku kaka ma gigonjo i iye. Ento kan afuru uai kud iwi hema, ging’eyo ndhu nia eno tie saa m’ukwayu gicok iye woth. E giyaku hemane, man gilubo tok afuru.