Kinde ma julib ario mir Israel gitundo i Yeriko, giwok gimondo i ot pa dhaku moko ma nyinge Rahab. Saa m’ubimo mi Yeriko uwinjo lembene, eoro juaskari yo pa Rahab. Rahab ukanu julib iwi ot man eoro juaskari m’ubino sayugi i yo mange. Ewacu ni julibne kumae: ‘Abikonyowu kum ang’eyo nia Yehova ni kudwu, man nia wubimaku ng’om maeni. Akwayuwu, wung’ol ira nia wubibodho jufwa.’

Julib giyero ni Rahab kumae: ‘Wabeng’olo iri nia gin moko mbe ma bitimo ng’atu m’ubedo i ot peri keni.’ Gimedo kumae: ‘Twii thol ma kwar i madhirisa mi ot peri, e jupewu biboth.’

E Rahab uluro julib ku thol kud i wang’ madhirisa nitundo i ng’om. Gicidho iwi got man gipondo kuca bang’ adek, kan i ng’eye gidok i bang’ Yocuwa. I ng’eye, nyithindho mir Israel gikadhu Kulo Yordan man giyikiri pi nimaku Yeriko. Yeriko ubino adhura ma kwong’a ma gimaku. Yehova ung’olo nia gidhok adhurane wang’ acel kubang’ nindo, ke pi nindo abusiel. I nindo mir abiro, gidhoko adhurane wang’ abiro. E julam gikudho agwara man juaskari gikok ku dwandgi ma tek mandha. Gang’kidi mir adhura ugam urwombere! Ento ot pa Rahab m’ubino malu iwi gang’kidi urwombere ngo. Rahab ku jupagi giboth pilembe Rahab uketho genogen pare iwi Yehova.

Thek ma dupa mi Kanan giwinjo kite ma Juisrael gigam ginyotho ko adhura mi Yeriko. Jubim mi Kanan gipangu nicokiri karacelo pi nikiedo i dhu nyithindho mir Israel. Ento Jugibeon gipangu nitimo lembe m’ukoc. Gikendo bongu m’uyec man gibino i bang’ Yocuwa, giwacu ire kumae: ‘Waai i ng’om ma bor. Wawinjo pi Yehova man pi gin ceke m’etimo iwu i Misiri man i Moab. Wung’ol iwa nia wubitimowa rac ungo man wabidoko jutic mwu.’

Yocuwa uyiyo lembe ma giyero, man eng’olo igi nia ebitimogi rac ungo. Nindo adek i ng’eye, Yocuwa uwinjo nia karaman Jugibeon giai ungo i ng’om ma bor. Giai i Kanan. E Yocuwa upenjogi kumae: ‘Pirang’o wuwondowa?’ Gidwoko kumae: ‘Lworo ubino negowa en! Wang’eyo nia Yehova Mungu mwu ubekiedo piwu. Timba kud wunegwa anega.’ E Yocuwa unegogi ngo tap calu m’eng’olo.

I ng’ey nindo ma nok, jubim abic mi Kanan kud udul mony migi gicokiri pi nikiedo i dhu Jugibeon. Yocuwa ku juaskari pare giwotho diewor traka pi nicibodho Jugibeon. Urwonde apoka, gicaku kiedo lwiny. Jukanan gicaku ringo swa. Ento kaka moko ci ma giringo i iye, Yehova ubolo lungu pei ma dongo i wigi. I ng’eye, Yocuwa ukwayu Yehova uketh ceng’ ucungi kakare. Pirang’o Yocuwa ukwayu nia ceng’ ucungi ma ke nwang’u i wang’e fodi ceng’ ucungo ngo e? Pilembe egeno Yehova. E ceng’ umwony ungo nitundo ma Juisrael giloyo jubim mi Kanan kud udul mony migi pet.