I ng’ey oro moko, nyithindho mir Israel giweko Yehova kendo man gicaku timo ni mungu m’araga. E pi oro abiro, Jumidian giyaku lim mi nyithindho mir Israel man ginyotho cam migi. Juisrael gibed gipondo i odi ng’om man i odi cana kara Jumidian kud unwang’gi. Calu ma kwo udoko tek igi, gikwayu Yehova ukonygi. E Yehova uoro malaika pare acel i bang’ jalawobi moko ma nyinge Gideon. Malaika uyero ire kumae: ‘Yehova ung’ii kara ibed jaaskari ma tek.’ Gideon upenje kumae: ‘An m’atie gin moko de ngo e, abibodho nyithindho mir Israel nenedi?’

Gideon bing’eyo nenedi nia Yehova ung’iye? Epedho adila urombo woko man ekwayu Yehova kumae: ‘Kan urwo kugweno abinwang’u nia thoi ujomo adila maeni kende ma ke ng’ete ceke uthwo kaw, e abing’eyo nia ibemito abodh Israel.’ Urwonde kugweno, thoi ujomo adilane ceke, ento ng’om uthwo kaw i ng’ete! Re Gideon ukwayu Yehova kendo nia urwonde eketh thoi ung’ier i ng’et adilane ceke, ento adilane ubed m’uthwo. Kinde ma lembe maeno de utimere, Gideon uyiyo nia andha Yehova ung’iye. Ecoko juaskari pare pi nicikiedo i dhu Jumidian.

Yehova uyero ni Gideon kumae: ‘Abiketho nyithindho mir Israel gibiloyo. Ento calu ma juaskari gitie dupa, saa moko wucopo paru nia wuloyo lwiny ku tego mwu giwu. Wac ni juaskari nia ng’atu ma lworo ubenege udok i pacu.’ E juaskari elufu pier ario wi ario (22000) gidok. Juaskari elufu apar (10000) re m’udong’. Yehova uyero kendo kumae: ‘Fodi asu wend juaskari tie lee. Lor kugi i dhu kulo, man keth gimadh pii. Ju ma gibimadhu pii ma giwotho neno ka nyo adui ubebino re m’ibicidho kugi i lwiny.’ Dhanu 300 re m’uwok umadhu pii ma gibewotho neno ka nyo adui ubebino. Yehova ung’olo nia dhanu ma nok eno biloyo juaskari elufu dak acel pier adek wi abic (135000) mi Midian.

Cing’ nica kud uthieno, Yehova uyero ni Gideon kumae: ‘Saa mi kiedo i dhu Jumidian uromo; wucidh i kumgi!’ Gideon umiyo agwara i cing’ dhanu pare man cupa ma dongo ma gicwinyo mac gikanu i igi. Eyero igi kumae: ‘Wunena man wutim calu m’abetimo.’ Gideon ukudho agwara pare, eng’enyo cupa m’emaku i cinge, eting’o mac malu, man ekok kumae: “Palamularu pa Yehova man pa Gideon.” Juaskari 300 ceke gitimo kumeno. Ndiri ugam umaku Jumidian man gikwong’o ringo swa. Ndiri ma lee m’umakugi uketho gicaku negiri i kindgi. Wang’uni de Yehova ukonyo Juisrael niloyo judegi migi.

Jaisrael moko ma nyinge Elkana ugamu mon ario: acel nyinge bino Ana, ma kucelo ke Penina; egam emaru Ana nisagu Penina. Penina unyolo awiya dupa, ento Ana ubino mbe kud awiya. Eno uketho Penina ubed unyware saa ceke. Kubang’ oro, Elkana ubed ucidho ku juruot pare zoo pi niworo Mungu i hema mi cokiri i Cilo. Nindo acel saa ma gini kuca, Elkana uneno nia Ana ma nyaramara pare utie ku can ma lee i iye. E ewacu ire kumae: ‘Kud iwaki Ana. An a won ot peri anuti. Ameri.’

I ng’eye, Ana ucidho ang’et nyanok pi nirwo. Ekwayu Yehova ku piwang’e nia ekonye. Eng’olo ni Yehova kumae: ‘Yehova, kan imiyo ira nyathin ma nico, abimiye iri, man ebitimo iri i kwo pare zoo.’

Eli ma Jalam ma dit uneno Ana ubewak nyaling’ ling’, e eparu nia emer ku kong’o. Ana uyero ire kumae: ‘Ungo rwoth para, amer ungo. Atie ku lembe moko ma lee m’ubesendo wiya, man abekoro lembene ni Yehova.’ E Eli unwang’u nia eweco swa, man eyero ni Ana kumae: ‘Dong’ Mungu umii iri gin m’ibemito.’ E cwiny Ana ukwiyo man edok i pacu. Oro acel de ngo i ng’eye ci Ana unyolo nyathin ma nico, man ecaku nyinge Samwel. M’umbe jiji, anyong’a unego Ana lee dit.

Wi Ana uwil ungo i kum lembang’ola m’etimo ni Yehova. Kinde m’ekwiro Samwel ku cak, etere i hema mi cokiri kara etim ni Mungu kuca. Ana uwok uyero ni Eli kumae: ‘Eni tie nyathin m’agam arwo pire ca. Amiye kara etim ni Yehova i kwo pare zoo.’ Elkana giku Ana gibed giliewo Samwel kubang’ oro, man gibed gitero ire kanzu ma bote mbe. I ng’eye, Yehova udok umiyo awiya mange ma co adek ku ma nyir ario ni Ana.