Nyithindho mir Israel giweko Yehova kendo man giworo mungu m’araga. Kinde ma Juamon gisendo nyithindho mir Israel man gikiedo i dhoggi, mungu m’araga ma gibino woro ukonyogi ngo nyanok de. Nyithindho mir Israel gineno can pi oro ma dupa. E i ng’eye, gikwayu Yehova kumae: ‘Wadubo iri. Ento wakweyi, bodhwa kud i cing’ judegi mwa.’ Juisrael ginyotho ayi gin m’acwiya migi man gicaku woro Yehova kendo. Yehova umaru ngo nia gimediri nineno can.

Juisrael ging’iyo Yeftha m’ubino ng’atu ma tek re m’utel wigi i lwiny ma gibecikiedo i dhu Juamon. Yeftha uyero ni Yehova kumae: ‘Kan iketho waloyo lwiny maeni, abeng’olo iri nia kinde m’abidwogo, ng’atu ma kwong’a ma biwok kud i ot para pi nijola, abimiye iri.’ Yehova uwinjo rwo pa Yeftha man eketho eloyo lwiny.

Kinde ma Yeftha udwogo i pacu, ng’atu ma kwong’a m’uwok pi nijole ubino nyaku pare m’acel kulong’. Ewok m’ebemiel man ebepadu vul. Yeftha utimo ang’o? Epoy i kum lembang’ola pare man ewacu kumae: ‘Kayo, nyara! Inyayu can lee i iya. Atimo lembang’ola moko ni Yehova. Pi nipong’o lembang’olane, acikara niori icidh itim i hema pare i Cilo.’ Ento nyaku pare uyero ire kumae: ‘Baba, kan itimo lembang’ola ni Yehova, kwayu ipong’e. Akweyi, wek acidh atim dwi ario iwi got karacelo kud anyira wada, e i ng’eye abicidho.’ Nyaku pa Yeftha utimo ni Yehova cuu mandha i hema pi dong’ kwo pare zoo. Kubang’ oro, nyir wadi gibed gicidh giliewe i Cilo.

Eli ma Jalam ma dit ubino kud awiya ma co ario; nying’ nyathinne acel ubino Hofni, ma kucelo ke Fineas. Gin ario zoo gibino julam i hema. Gibed giworo ngo cik pa Yehova man gibed gisendo dhanu mi tuko ngo. Ka nyithindho mir Israel gibino thiero lam ni Yehova, Hofni giku Fineas giting’o undhing’ ring’o ma beco igi. Eli uwinjo pi lembe m’awiya pare gibetimo, re ekwerogi ngo. Nyo Yehova uweko gimediri ku timo maeno?

Kadok Samwel ubino nyathin ni Hofni giku Fineas de, re elubo ngo lapor migi. Mutoro ubed unego Yehova i kum Samwel. Nindo acel kinde ma Samwel unindo, ewinjo dwal moko ubelwong’e. E eai eringo i bang’ Eli, man eyero kumae: ‘Anuti!’ Eli uwacu ire kumae: ‘Alwong’i ngo. Dok inindi.’ Samwel udok uvuto. I ng’eye dwalne ulwong’e kendo. Kinde ma Samwel uwinjo dwal maeno wang’ mir adege, Eli unyang’ nia Yehova re m’ubelwong’o Samwel. E eyero ni Samwel nia ka dwalne ulwong’e kendo, ewac kumae: ‘Yer, Yehova. Jatic peri ubewinjo.’

Samwel udok uvuto. I ng’eye, ewinjo dwal m’ubelwong’e kumae: ‘Samwel! Samwel!’ Edwoko kumae: ‘Yer, jatic peri ubewinjo.’ Yehova uyero ire kumae: ‘Wac ni Eli nia abecimiyo ire matira man ni juruot pare. Eng’eyo ma ber nia awiya pare gibetimo lembe ma reco i hema para, re ekwerogi ngo.’ Urwonde kugweno, Samwel uyabu dhugola mi hema calu m’ebed etimo nja. Ento lworo ubino nege nikoro lembe ma Yehova uyero ni jalam ma dit. E Eli ulwong’e man epenje kumae: ‘Woda, Yehova uyero ang’o iri? Kor ira lembe ceke.’ Samwel ugam ukoro lembene ceke ni Eli.

Kinde ma Samwel ubedongo, Yehova umedere nitelo wiye. Dhanu mi tung ng’om mir Israel ceke ging’eyo nia Yehova ung’iyo Samwel ubed jabila man japoklembe.