Yehova uyero ni Samwel kumae: ‘Cidh i pacu pa Yese. Kud i kind awiya pare ma co, ng’atu acel bidoko ubimo mir Israel.’ E Samwel ucidho i pacu pa Yese. Kinde m’eneno wod Yese ma kayu, eparu yor i iye kumae: ‘Jalawobi maeni re m’ucikere nibedo ubimone.’ Ento Yehova uyero ni Samwel nia tie en ungo. Yehova uwacu kumae: ‘An aneno gin ma n’i adunde ng’atini, ento ungo gin ma ni yo woko kende.’

Yese ukelo awiya pare mange ma co abusiel. Ento Samwel uwacu kumae: ‘Yehova ung’iyo ngo ng’atu acel de kud i kindgi. Awiya peri mange ma co umbe?’ Yese udwoko kumae: ‘Edong’ woda ma cogo ma nyinge Daudi. Ebekwayu rombe para.’ Saa ma Daudi utundo, Yehova uyero ni Samwel kumae: ‘Eni eno!’ Samwel ugam ukonjo mo iwi Daudi pi niwire kara edok ubimo iwi Israel.

Nindo moko i ng’eye, nyithindho mir Israel gicidho nikiedo lwiny i dhu Jufilisti. Jaaskari moko ma jarukara ubino i thenge mi Jufilisti; nyinge ubino Goliath. Kubang’ nindo ebed ecayu Juisrael ma nwang’u ebekok kumae: ‘Wuor ng’atu acel m’i kindwu ubin wakied kude. Kan eloyo, wabibedo jutic mwu. Kan aloyo ke wubibedo jutic mwa.’

Daudi ugam ukelo cam ni umego pare ma gibino kaka ma juaskari mir Israel gigonjo i iye. Saa m’etundo, ewinjo wec pa Goliath, man eyero kumae: ‘Abikiedo i dhoge!’ Ubimo Saul uwacu kumae: ‘In fodi itie nyathin.’ Daudi udwoko ni ubimo kumae: ‘Yehova bikonya.’

Saul uronyo jamlwiny pare i kum Daudi, ento Daudi uyero kumae: ‘Acopo kiedo ngo ku jamlwiny maeni i kuma.’ Daudi uting’o lacur pare man eloro i kulo. Ewok eng’iyo kidi abic ma kumgi foth man ekethogi i usau pare. E Daudi uringo yor i bang’ Goliath. Goliath ukok kumae: ‘Nyathi jal, kadh i bang’a kwe. Abimiyo ring’kumi ni winyo mi polo man ni yedi mi lum.’ Wec maeno unyayu ngo lworo i Daudi. En de ekok kumae: ‘Ibebino i bang’a ku palamularu man ku tong’, ento an abebino i beng’i ku nying’ Yehova. Ibebino kiedo lwiny i dhogwa ngo, ento i dhu Mungu. Dhanu ceke ma gini keni gibineno nia Yehova utie ku tego nisagu palamularu man tong’. Yehova bimiyowu i cingwa.’

Yehova ukonyo Daudi. Daudi uketho kidi i lacur, man eng’ure ku kero pare zoo. Kidine ucidh umaku terwang’ Goliath. E Goliath upodho bir. Jufilisti gigam giringo pi nibodho kwo migi. Nyo in de igeno Yehova calu Daudi?

I ng’ey ma Daudi unego Goliath, ubimo Saul ukethe ni jadit mi juaskari pare. Daudi uloyo lwiny dupa; e pire uyik lee. Saa ceke ma ka Daudi giloko kud i lwiny, jumamon gijologi ku miel ma nwang’u gibewer kumae: ‘Saul unego elufu acel, Daudi ke unego elufu apar!’ Kumira ucaku nego Saul i kum Daudi, man emito enege.

Daudi ubino jabodho mi goyo adungu. Nindo acel, kinde ma Daudi ubegoyo adungu ni ubimo Saul, Saul ucobe vii ku tong’. E tong’ne umondo truk i kor ot. I ng’eye, Saul upimo wang’ dupa ninego Daudi. Saa ma Daudi uneno kumeno, egam eringo man ecidh epondo i langa.

Saul ucoko juaskari elufu adek (3000) man gicidho nisayu kaka Daudi. Giwok gimondo i odicana kaka ma Daudi upondo i iye karacelo ku dhanu m’ewotho kugi. Dhanu pa Daudi giwacu kumae: ‘Saa mi nego Saul uforomo iri eni, kud iweke!’ Daudi ukwalu tiende nyayoo yoo, ecidh ethumo dhu bongu pa Saul. Saul unyang’ de ngo. I ng’eye, cwiny Daudi upido pilembe enwang’u nia ekoso woro ni ubimo ma Yehova uwiro. Eyiyo ngo nia dhanu pare gineg Saul. Kinde ma Saul uwok kud i odicana, Daudi ulwong’o toke man ewacu ire kumae: ‘Ineno, nwang’u tin eni anegi.’ Re Saul umedere asu nisayu kaka Daudi kara enege.

Diewor moko, Daudi gikud Abicai ma wod nyamin gicidh gimondo i kagonjo pa Saul ku juaskari pare. Giwok ginwang’u Abner m’ubino kuro kum Saul de unindo. Abicai uwacu ni Daudi kumae: ‘Eni e, wek anege cen!’ Daudi udwoko ire kumae: ‘Yehova re ma biculo wang’ lembe ma Saul ubetimo. Wating’ tong’ pare ku cupa pare mi pii re ma wacidhi ko.’

Daudi ugam uidho iwi got moko ceng’ini keca, kaka m’ecopo neno kagonjo pa Saulgi kud i iye. Ekok kumae: ‘Abner, pirang’o igwoko ngo ubimo peri? Tong’ pa Saul ku cupa pare mi pii ni kani?’ Saul ung’iyo dwand Daudi, e ewacu ire kumae: ‘Nwang’u icopo nega anega zoo, re iweka. Ang’eyo nia in re m’ibibedo ubimo mir Israel kakara.’ Saul ugam udok i pacu pare. Ento ng’atu moko ubino nuti i ot pa Saul m’udagu ngo Daudi.