Jubim ma reco ubino dupa m’ucamu ker iwi suru apar mir Israel. Ento ubimo Ahab ubino ku timo ma rac m’usagu mi jubim mange ceke. Egamu dhaku ma kura pare rac m’ubed uworo Baal. Nying’ dhakune ubino Yezabel. Ahab giku Yezabel giketho dhanu ma pol ucaku timo thier ni Baal, man gibed gisendo jubila pa Yehova man ginego kadok jumoko anega zoo. Dong’ Yehova utimo ang’o? Eoro jabila Eliya uter kwenda moko ni Ahab.

Eliya uwok uwacu ni ubimo Ahab nia calu m’ebetimo lembe ma reco, koth bicwii ngo i ng’om mir Israel. Pi oro ma kadhu adek, cam ucek ungo i ng’ombe, eno uketho kec upodho. I ng’eye, Yehova uoro Eliya kendo i bang’ Ahab. Ubimo Ahab uwok uwacu ni Eliya kumae: ‘Eni zoo tie lembe m’ibenyayu in! Tin ka koth ubecwii ngo, tie kosa peri.’ Eliya udwoko ire kumae: ‘Tie kosa para ngo. In re m’iketho koth ubecwii ngo pilembe ibeworo Baal. Waketim lembe moko ma binyutho nia ng’a ma tie Mungu mandha. Cok dhu dhanu mir Israel ceke man cok jubila pa Baal bende iwi got Karmel.’

Dhanu ugam ucokiri iwi got. Eliya uwacu kumae: ‘Wung’ii ng’atu acel ma wucopo woro. Tek Yehova tie Mungu mandha, wuwore. Ento tek Baal re m’utie mungu mandha, e wuwore. Watimu kumae: Jubila 450 pa Baal giyik lam migi man gilwong’ mungu migi. An de abiyiko lam man abilwong’o Yehova. Mungu ma bidwoko ku mac ci nwang’u etie Mungu mandha.’ Dhanu giyiyo lembe maeno.

Jubila pa Baal giyiko lam migi. Gilwong’o mungu migi duu, giwacu kumae: ‘E Baal, winj dwandwa do!’ Kinde ma gikuro kpe Baal ubedwoko ngo igi lembe, Eliya ucaku nywarugi. Ewacu kumae: ‘Saa moko nyo ebenindo aninda. Wulwong’e ma tek kara ecew.’ Jubila pa Baal gilwong’o Baal nitundo reto. Ento edwoko ngo igi lembe moko.

Eliya bende uketho lam pare iwi pemlam man ecoro pii iwi lamne. I ng’eye erwo i bang’ Yehova kumae: ‘E Yehova, ketim lembe moko kara dhanu m’upong’ keni ging’ey nia in re m’itie Mungu mandha.’ Ndhu ndhu nica, Yehova uoro mac kud i polo man uwang’u lam ceke. E dhanu gikok kumae: ‘Yehova re ma tie Mungu mandha!’ Eliya uwacu kumae: ‘Kud wuwek jubila pa Baal uringi!’ Cing’ nica, junego jubila pa Baal 450.

I ng’eye, afuru moko uwok nyanok iwi nam. Eliya uyero ni Ahab kumae: ‘Yamu ma tek ubebino koto. Yik magali peri man idok i pacu.’ E polo uyim man yamu ma tek ucaku koto. E koth ucaku cwii lee. Koth maeno ujigo dhu ceng’ m’urieny pi nindo ma dupa. Ahab uringo ma tek ku magali pare. Ento Yehova ukonyo Eliya uketho eringo ma tek nikadhu magali ngi! Nyo eno ubino ajiki mi peko pa Eliya? Wabineno.

Kinde ma Yezabel uwinjo nia junego jubila pa Baal, kwinyo umake ma rac. E eoro jucidh juyer ni Eliya kumae: ‘Urwo in de jubinegi calu m’inego jubila pa Baal.’ Lworo umondo i Eliya man eringo i langa. Erwo kumae: ‘Yehova, kero para udaru thum. Timba dong’ atho cen.’ Calu m’eol lee, ewok ebedo i the yen moko, e nindo ukwale.

Malaika moko ucewe man uwacu ire nyayoo yoo kumae: ‘Keai icam cam moko.’ Eliya uneno lungu kwen ma juketho iwi kidi ma lieth ku cupa mi pii i ng’ete. Eai malu, ecamu, emadhu pii man edok enindo kendo. I ng’eye, malaikane ucewe kendo man ewacu ire kumae: ‘Ai icam, kara inwang’ kero pilembe ibecidho i woth ma bor.’ Eliya uai man ecamu kendo. E ewotho ceng’ 40 ku diewor 40 nitundo i kum got Horeb. Kuca, ewok emondo i odicana moko pi ninindo. Ento Yehova uweco i bang’e man ewacu ire kumae: ‘Eliya, itimo ang’o keni?’ Eliya udwoko kumae: ‘Juisrael giworo ngo lembe ma ging’olo iri. Ginyotho pemlam man ginego jubila peri. Kawoni gimito gineg an de.’

Yehova uyero ni Eliya kumae: ‘Wok icidh icung iwi got.’ Ku kwong’a, yamu moko ma tek ukoto keca. I ng’eye, digidi ma dit uyengo piny man mir mac ucaku liel. Tokcenne, Eliya uwinjo dwal moko ma yoo ubeweco i bang’e. E eumo wang’e ku bongu pare man ecidh ecungo i dhu odicana. Yehova upenje kumae: ‘Iberingo ang’o?’ Eliya udwoko kumae: ‘Ani kenda re m’adong’ abetimo iri.’ Ento Yehova uyero ire kumae: ‘Idong’ ini kendi ngo. Dhanu mange elufu abiro (7000) de ginuti i Israel ma gibetimo ira. Cidh iketh Elica ni jabila ma bidong’ kakeri.’ E ndhu ndhu nica, Eliya ucidh utimo lembe ma Yehova ung’olo ire. Nyo iparu nia in de Yehova bikonyi kan ibetimo yeny pare? Eyo, ebikonyi. Wakenen lembe moko m’utimere ma nwang’u fodi koth udwogo ngo.