Ben-hadad m’ubimo mi Siria umedere asu nisayu nyithindho mir Israel kud ali. Ento saa ceke jabila Elica ubed upoyo ubimo mir Israel, uketho ebed epondo. E Ben-hadad ukeco nia mito emak Elica. Nindo moko, ewinjo nia Elica n’i adhura mi Dothan, e eoro juaskari mi Siria gicidh gimake.

Juaskarine gitundo i adhura mi Dothan ku diewor. Urwonde kugweno, jatic pa Elica uwok woko man eneno udul askari utieko adhura zoo. Lworo ugam umake, e ekok kumae: ‘Elica, wabitimo nenedi?’ Elica uwacu ire kumae: ‘Ju ma ni kudwa sagu ju ma ni kugi.’ I saa maeno, Yehova uyabu wang’ jatic pa Elica, e eneno magali mi mac mi lwiny upong’o wi gudi ceke m’utwodo adhura.

Kinde ma juaskari mi Siria gimito nimaku Elica, erwo kumae: ‘Yehova, akweyi, goygi ku corwang’.’ E mbwang’ kumeni, Yehova unyotho wigi, e ging’eyo ngo nia gini kani. Elica uyero igi kumae: ‘Wurwinyo, eni tie ngo adhura ma wubesayu. Wulub toka, abiterowu i bang’ ng’atu ma wubesayu.’ E gilubo tok Elica nitundo i Samaria, kaka m’ubimo mir Israel bedo i iye.

I ng’eye ka juaskari mi Siria gibin ginyang’ nia gin’i Samaria. Ubimo mir Israel upenjo Elica kumae: ‘Aneggi?’ Nyo Elica unwang’u nia eno tie tap saa mi culo kwor i kum dhanu maeno ma gimito gitime rac? Ungo. Elica uyero kumae: ‘Kud ineggi, ento mii igi cam man wek gidoki.’ E ubimo ugam uketho juyiko igi cemo ma dit man i ng’eye eweko gidok.

Yezabel ubino ku nyare moko ma nyinge Athalia, en de cwinye ubino rac ve cwiny min. I ng’eye, Athalia udoko dhaku p’ubimo mi Yuda. Kinde ma cware utho, wode ucaku nibimo. Kinde ma wode maeno de ugam utho, Athalia ukethere gire ni jabim mi Yuda. Eketho juneg ng’atu moko ci ma copo dok camu ker, kadok nyikwaye ma buu de, kara en re m’edok ubimo. Emito edargi pet. Dhanu ceke ubed ulwore alwora.

Yehoyada ma Jalam ma dit giku Yehocabeath ma dhaku pare gigam ging’eyo nia gin m’Athalia ubetimo utie rac. Pieno giketho kwo migi i ariti pi nikanu nyakwar Athalia moko ma nok ma nyinge Yoac. Gigwoke i hekalu.

Kinde ma Yoac udoko ku oro abiro, Yehoyada ucoko dhu judongo ma wijo man Julawi ceke, ewacu igi kumae: ‘Wukur dhugola ceke mir hekalu man kud wuwek ng’atu moko umondi.’ E Yehoyada uketho Yoac ni ubimo mi Yuda man eroyo jamker mi wic i wiye. Dhanu mi Yuda gikok kumae: ‘Ubimo kwo nja!’

Kinde m’Athalia m’ubimo ma dhaku uwinjo udul dhanu gibewoy i hekalu, eringo kuca. Saa m’eneno ubimo ma nyen, ekok kumae: ‘Wucamu gamba! Wucamu gamba!’ E judongo ma wijo gigam gimaku dhaku maeno ma cwinye rac, giwodhe woko man ginege. Jutimo ang’o pi nijigo lembe ma reco m’ebed ecwalu dhanu i iye?

Yehoyada uketho dhanu gitimo lembariba ku Yehova man ging’olo nia gibiworo Yehova kende. Yehoyada uketho dhanu urwombo pemlam pa Baal cen man girungo ayi gin m’acwiya ceke nziki nziki. Eketho julam ku Julawi gitim tic i hekalu kara dhanu ucak timo thier kendo ni Yehova i hekalu. Eketho jukur gikur dhugang’ kara dhanu m’ucido kud umond i hekalu. I ng’eye, Yehoyada ku judongo ma wijo gitero Yoac i kal man gikethe iwi komker. Anyong’a unego dhanu mi Yuda lee dit. Calu ma dong’ Athalia ma dhaku ma cwinye rac umbe man jukabu thier pa Baal de cen, kawoni dong’ dhanu gitie agonya nitimo ni Yehova. M’umbe jiji, ineno kite ma tegocwiny pa Yehoyada ukonyo ko dhanu dupa.