I Nineve ma tie adhura mir Asiria, dhanu ubed utimo lembe ma reco. Pieno Yehova uoro Yona ma jabila pare ucidh unyuth ni dhanu mi Nineve nia giwek kura man timo migi ma reco. Re Yona uringo bor kaka mange, emondo i yei m’ubecidho i Tharsis.

Kinde ma giwok iwi nam, yamu ma tek utuk i wigi man lworo umaku jutic mi yei ceke m’ubino i yei. Gikwayu mungu migi m’araga man giyero kumae: ‘Pirang’o lembe maeni uwok i wiwa?’ E Yona uwacu igi kumae: ‘Tie kosa para. Aberingo pilembe amito ngo atim lembe ma Yehova uora acidh atim. Wubola i nam, e yamu maeni bicungo iwu.’ Jutic mi yei gimito ngo gibol Yona i pii, ento ererogi nia gibole. Kinde ma gibole i nam, yamu ugam ucungo.

Yona uparu nia ebecitho. Kinde m’ebemwony i the nam, ecaku rwo i bang’ Yehova. E Yehova uoro rec moko ma dit ubin umwonye, ento kadok rec umwonyo Yona de, re etho ngo. Kud i cindi rec, Yona ukwayu Mungu, eyero ire kumae: ‘Ang’olo nia abiwori nja.’ Yehova ugwoko Yona i cindi rec pi ceng’ adek man i ng’eye eketho recne ucidh ung’oge iwi ng’om m’uthwo.

I ng’ey ma Yehova ubodho Yona, nyo dong’ ecikere ngo nicidho i adhura mi Nineve? Ungo. Yehova uyero kendo ni Yona nia ecidhi kuca. I saa maeni Yona ugam uworo dwande. Ecidho i Nineve man etwong’o ni dhanu ma timo migi reco mir adhura maeno kumae: ‘I ng’ey nindo 40, jubirwombo Nineve.’ E lembe moko mi zungo utimere: dhanu mir adhura mi Nineve giwinjo atwong’a maeno man giwilo timo migi ma reco. Ubimo mi Nineve uyero ni dhanu pare kumae: ‘Wukway Mungu ma tek man wulokuru kud i yo mwu ma rac. Saa moko nyo Mungu binegowa ngo.’ Kinde ma Yehova uneno nia dhanu mir adhura mi Nineve giwilo timo migi, enyotho ngo adhurane.

Ng’eicwiny umaku Yona pilembe Mungu unyotho ngo adhura mi Nineve. Kepar nyanok: Yehova unyutho cirocir man kisa ma yawe mbe ni Yona, re Yona ubino mbe ku kisa i kum dhanu mi Nineve. Ento ewok kud i adhura man ecidh ebedo i the tipo bombo kunoke vombo ma lembe ubeton i iye. I ng’eye, bombone uthwo, e ng’eicwiny uopo i Yona dong’ magwei. Yehova uyero ire kumae: ‘Ilund ibedieng’ pi bombo maeni nisagu pi dhanu mi Nineve. Giboth pilembe atimo igi kisa.’ Yehova umito miyo ire ponji ma kani? Pi dhanu mi Nineve ubino tek nisagu yen kunoke uboko moko ci.

Juasiria gigam gimaku ker mi suru apar mir Israel. Kawoni Senakerib m’ubimo mir Asiria ubemito emak bende ker mi suru ario mi Yuda. Ekwong’o maku adhura mi Yuda acel acel. Ento adhura m’ebino yenyo dit nia emaki ubino Yeruzalem. Wii Senakerib ulund uwil nia Yehova ubegwoko Yeruzalem.

Hezekia m’ubimo mi Yuda umiyo sente ma lee ni Senakerib kara kud enyoth adhura mi Yeruzalem. Kadok nwang’u Senakerib ugamu sente p’ubimo mi Yuda de, re asu eoro juaskari pare ucidh umak Yeruzalem ku lwiny. Ndiri ung’oy i dhanu mir adhura mi Yeruzalem, pilembe Juasiria gibemediri nicoro ceng’ini mandha. E Hezekia uyero ni dhanu kumae: ‘Lworo kud unegwu. Andha Juasiria gi tek, ento Yehova biketho wabidoko tek nisagugi.’

Senakerib uoro Rabcake i adhura mi Yeruzalem kara ecidh epik lworo i dhanu. Kinde ma Rabcake utundo, ewok ecungo i dhugang’ mir adhura man ekok kumae: ‘Yehova copo konyowu ngo. Kud wuwek Hezekia uwondwu; mungu moko mbe ma romo bodhowu kud i cingwa.’

Hezekia ukwayu Yehova unyuth ire gin m’ecopo timo. Yehova udwoko ire kumae: ‘Lembe ma Rabcake uyero kud unyay lworo i ii. Senakerib bimaku ngo adhura mi Yeruzalem.’ I ng’eye, Senakerib uoro waraga moko ni Hezekia. Ekiewo i waragane kumae: ‘Miyiri ira. Yehova copo bodhi ngo.’ Hezekia urwo i bang’ Yehova kumae: ‘Wakweyi, Yehova, bodhwa, kara dhanu mi ng’om ceke ging’ey nia in i kendi re m’itie Mungu mandha.’ Yehova udwoko ire kumae: ‘Ubimo mir Asiria bimondo ngo i Yeruzalem. Abigwoko adhura para.’

Senakerib ubino geno nia i ng’ey nindo ma nok kende ci ebimaku adhura mi Yeruzalem. Ento i diewor acel, Yehova uoro malaika pare acel kaka ma Juasiria gigonjo i iye i ng’ey adhura. E malaikane unego juaskari elufu dak acel pier abora wi abic (185000)! Juaskari ma tek p’ubimo Senakerib githo tup. E calu ma dong’ gin ma Senakerib romo timo mbe, edok i pacu pare ma wiye thum. Yehova ugwoko Hezekia man adhura mi Yeruzalem tap calu m’elar eng’olo. Ka nwang’u in de ibino i adhura mi Yeruzalem, nyo nwang’u iromo ketho genogen peri iwi Yehova?