Thek mi Yuda uweko Yehova wang’ udul pi nirwo ni mungu m’araga. Pi oro ma dupa, Yehova umedere nitimo kero pi nikonyogi. Eoro jubila ma tung’ tung’ pi nimiyo igi cimowang’, re giwinjo ngo. Kakare niwinjogi, gicayugi acaya. Yehova utimo ang’o pi nijigo timo migi mi rwo ni ayi gin m’acwiya?

Ubimo Nebukadnezar mi Babeli ubed uvoyo thekman acel acel. Wang’ ma kwong’a m’eloyo Yeruzalem, emaku ubimo Yehoiakin, judongo ma wijo, jurukara ku jubodho, man eterogi ceke i Babeli. Ecoko bende sente ceke mir hekalu pa Yehova. I ng’eye, Nebukadnezar uketho Zedekia ni ubimo mi Yuda.

I acaki, Zedekia uworo Nebukadnezar. Ento thek m’i ng’et Yuda man jubila mi ndra gicwayu wang’e nia ejai ni Babeli. Yeremia ucime kumae: ‘Kan ijai, jubinegowu, ndru bipodho i wiwu, man thong’om bipodho i Yuda.’

I ng’ey ma Zedekia ucamu ker pi oro abora, eng’iyo nijai ni Babeli. Ekwayu juaskari mi Misiri gikonye. I ng’eye, Nebukadnezar uoro juaskari pare pi nikiedo i dhu Yeruzalem, e gibin gitieko adhurane. Yeremia uyero ni Zedekia kumae: ‘Yehova uyero nia kan imiyiri i cing’ Babeli, in karacelo kud adhura ceke wubiboth. Ento kan ijai, dhanu mi Babeli gibiwang’u Yeruzalem man gibitwii.’ Zedekia udwoko ire kumae: ‘Abimiyara ngo!’

I ng’ey oro acel ku nusu, juaskari mi Babeli gibin girwombo gang’kidi mi Yeruzalem man gicwinyo mac i kum adhurane. Giwang’u hekalu, ginego dhanu dupa, man gitwiyo dhanu elufu swa.

Zedekia uwok kud i Yeruzalem man eringo, ento dhanu mi Babeli giriemo toke. Gimake ceng’ini ku Yeriko man gitere i bang’ Nebukadnezar. Ubimo mi Babeli uketho junego awiya ma co pa Zedekia i wang’e m’ebeneno. I ng’eye Nebukadnezar uketho juloyo wang’ Zedekia man jubole i kol nitundo etho de i kol. Ento Yehova ung’olo ni dhanu mi Yuda kumae: ‘I ng’ey oro 70, abidwokowu kendo i Yeruzalem.’

Lembang’o ma binwang’u aradu ma jumaku jutero i Babeli? Nyo gibimediri nigwoko bedoleng’ migi ni Yehova?

Kinde ma Nebukadnezar ucoko dhanu ma pigi tek mi Yuda edok kugi i Babeli, eketho jego pare ma nyinge Acpenaz unen wigi. Nebukadnezar ung’olo ni Acpenaz nia elond awobi moko ma kumgi yot man ma wang’gi leng’ kud i kindgi. Awobi maeno jubiponjogi pi oro adek. Ponjine bikonyogi kara gidok jutic ma pigi tek i ker mi Babeli. Awobine jubiponjogi ku somo piny, ku kiewo kwan man ku weco dhok mi Babeli. Ugam ukwayere nia gicam bende kit cam ma rom ku m’ubimo karacelo ku jego pare gicamu. Awobi ang’wenne ubino Daniel, Hanania, Micael man Azaria. Acpenaz umiyo igi nying’ ma nyen mi Babeli: Beltecazar, Cadrak, Mecak man Abed-nego. Nyo ponji maeno ma ginwang’u uketho giweko timo ni Yehova?

Awobi ang’wen maeno gikeco migi niworo Yehova. Ging’eyo nia gicikiri ngo nicamu cam p’ubimo, pilembe Cik pa Yehova uyero nia kit camne moko ubino gin m’ucido. Pieno giyero ni Acpenaz kumae: ‘Timba kud iketh wacam cam p’ubimo.’ Acpenaz udwoko igi kumae: ‘Ka wucamu ngo man ubimo ubin uneno nia weng’wu ve wang’ ju m’utwoyo, ebinega!’

Daniel ugam unwang’u paru moko. Eyero ni ng’atu m’ubeneno wigi kumae: ‘Kan ecopere, mii iwa kende kende dek ma col man pii pi nindo apar. I ng’eye, juporwa kud awobi ma camu cam p’ubimo.’ E ng’atu ma neno wigi ugam uyiyo.

I ng’ey nindo apar, Daniel karacelo ku jurimbe adek kumgi bino leng’ nisagu kum awobi mange ceke. Anyong’a unego Yehova lee dit pilembe giwore. Bende, emiyo rieko mi nyang’ i gin ma wok i wang’ man mi koro the lek ni Daniel.

Kinde ma somo mir awobi maeno uthum, Acpenaz uterogi i wang’ Nebukadnezar. Ubimo uweco kugi man enwang’u nia Daniel, Hanania, Micael man Azaria gibino riek man ging’eyo lembe lee nisagu awobi mange ceke. E eng’iyo awobi ang’wen maeno pi nitimo tic i kal pare. Ubimo bibepenjogi pi ning’eyo lembe ma pigi tek. Yehova uketho gidoko riek nisagu jururieko ceke p’ubimo ku weg ajoga de ceke.

Kadok nwang’u Daniel, Hanania, Micael man Azaria gibino i ng’om mange de, re wigi uwil ungo nia gitie dhanu pa Yehova. Nyo in de ibibepoy pi Yehova kadok nwang’u ibenweng’iri kaka ma junyodo peri gimbe i iye?