Diewor moko, Nebukadnezar uleko lek ma ng’oyo ndiri. E elwong’o jururieko mi ng’om pare kara gituc ire thelembe mi lekne. Ento ng’atu acel de mbe m’i kindgi ma romo koro the lek pare. I ng’eye, ubimo uweco ku Daniel.

Nebukadnezar uyero ni Daniel kumae: ‘I lek m’aleko, aneno yen moko ma dit, edongo ma bor emulo kum polo. Yende romo nen kud i ng’om zoo. Ith yende leng’ man ecego nyinge dupa. Yedi yom i the tipone, man winyo de gigiero odgi i jange. I ng’eye, malaika acel uloro kud i polo. Ekok kumae: Ng’ond yende piny, lwer ithe de woko. Ento wek cudhone kud ulage i ng’om, man twii gwang’ mi cuma man mi mola i kume. Adunde yenne bilokere; ebiai ni adunde dhanu man ebidoko ni adunde yedi, man nindo abiro bikadhu i wiye. Dhanu ceke bing’eyo nia Mungu tie Jabim man ecopo miyo ker ni ng’atu ma iye yenyo.’

Yehova ugam unyutho the lekne ni Daniel. Kinde ma Daniel unyang’ i the lekne, ndiri ugam ung’oy i iye. Ewacu kumae: ‘E ubimo, nwang’u lek maeni utimere ndhu i kum judegini, ento lundo ebitimere i kumi. Yen ma dit ma jung’ondo utie in. Ker peri biweki man ibicamu lum tap calu yedi mi lum. Ento calu ma malaika uwacu nia juwek cudhone kud ulage udong’, ibidoko ubimo kendo.’

I ng’ey oro acel, Nebukadnezar ubino wotho iwi ot mi kal pare pi nineno leng’o mi Babeli. Ewacu kumae: ‘Wukenen adhura ma leng’ m’agiero. Wunen dwong’ para!’ Ma fodi eweco uthum de ngo ci, dwal moko uai i polo uwacu kumae: ‘Nebukadnezar, niai kawoni ker udaru weki.’

Ndhu ndhu saa nica, wii Nebukadnezar unyothere man edoko calu yedi mi lum. Jurieme kud i kal pare man ecaku kwo ku yedi. Yuk wii Nebukadnezar udongo boco boco calu yuk acur man lwete uwobo ve lwet winyo.

Kinde ma oro abiro ukadhu, wii Nebukadnezar ugam ulero man Yehova ukethe kendo ni ubimo mi Babeli. E Nebukadnezar uyero kumae: ‘Abepaku Yehova, Ubimo m’i polo. Kawoni ang’eyo nia Yehova utie Jabim. Ejwigo ju m’uting’iri man ecopo miyo ker ni ng’atu ma iye yenyo.’

I ng’ey oro moko, Belcazar udoko ubimo mi Babeli. E i diewor acel, ubimo ugam ulwong’o dhanu elufu acel ma pigi tek mi ng’om pare i agba, niwacu i nambu. Eng’olo ni jutic pare nia gikel kikombe mi mola ma kwar ma Nebukadnezar ucoko kud i hekalu pa Yehova. E Belcazar karacelo ku ju m’elwong’o gimadhu pigulok kud i kikombene man gipaku mungu m’araga migi. Mbwang’ kumeni, cing’ dhanu uwok man ucaku goro wec moko mi zungo i kor ot ma gibecamu i iye.

Cwiny Belcazar ung’abere ma rac. E elwong’o jururieko pare ceke man eng’olo igi kumae: ‘Ng’atu ma tek bituco the wec maeni, abikethe ni ng’atu mir adek ma pire tek i ker mi Babeli.’ Gipimo kpe, ento ng’atu moko acel de mbe m’i kindgi ma romo tuco thelembene. I ng’eye, min ubimo ubino man ewacu ire kumae: ‘Ng’atu moko nuti ma nyinge Daniel m’ubed utuco thelembe ni Nebukadnezar. Ecopo koro thelembe mi wec maeni iri.’

Daniel ugam ubino i bang’ ubimo. Belcazar uwacu ire kumae: ‘Tekene isomo wec maeni man ikoro thelembene, abimiyo iri gwang’ mi mola ma kwar man abikethi ni ng’atu mir adege ma pire tek i ker mi Babeli.’ Daniel udwoko ire kumae: ‘Ambe ku yeny mi giramiya peri, ento abikoro iri thelembe mi wec maeni. Nebukadnezar ma wuru uting’ere, ento Yehova ujwige. Ing’eyo ma ber gin ceke m’ugam uwok i kume, ento in de ikwero niworo Yehova man imadhu pigulok kud i kikombe mi mola ma kwar mir hekalu pare, uketho Mungu ugoro wec ma e: Mene, Mene, Tekel man Parsin. Thelembene utie nia Jumedi ku Jupersi gibivoyo Babeli man ibibedo ubimo kendo ngo.’

Ubed unen ve nia ng’atu moko mbe ma romo voyo Babeli i lwiny. Gang’kidi ma dhoge lee man pii ma thuc ugam utwodo adhurane tingili. Ento i diewor nica, Jumedi ku Jupersi gimaku adhurane. Kuro m’ubimo mi Persi uwiro wi pii kara juaskari pare gicopo idho nitundo i dhugola gang’ mir adhura. Kinde ma gitundo, ginwang’u dhugola gang’ ubedo ayaba! Juaskari gimaku adhurane, givoye ku lwiny man ginego ubimo. E Kuro ugam udoko ni jabim mi Babeli.

I kind oro acel, Kuro utwong’o kumae: ‘Yehova uwacu ira nia agom hekalu pare kendo i Yerusalem. Ng’atu moko ci m’i kind dhanu pare m’umaru nikonyo utie agonya nicidho.’ Pieno tap calu ma Yehova ular ung’olo, Juyahudi dupa gidok i Yeruzalem i ng’ey oro 70 niai ma jugam junyothe. Kuro uoro mola ma kwar ku kikombe mi mola ma tar man ajeni ma Nebukadnezar ugam ucoko kud i hekalu. Nyo ineno kite ma Yehova ugam utiyo ko ku Kuro pi nikonyo dhanu pare?