Cwinyi bed tek nia Yehova weko dubo

1-2. Judubo m’uloko cwinygi ginwang’u kwiyocwiny ma kani? (Nen bende cal.)

UBIMO Daudi ung’eyo kite ma juwinjiri ko pi dubo ma jutimo con. (Zab. 40:12; 51:3; wec mi caku) Epodho i kosa moko ma lee dit i kwo pare. Re i ng’eye eloko cwinye i andha man Yehova uweko ire. (2 Sam. 12:13) Eno uketho enwang’u kwiyocwiny ma ng’atini nwang’u ka Yehova uweko dubo pare.—Zab. 32:1.

² Calu Daudi, wan de wacopo nwang’u kwiyocwing’ ma ng’atini nwang’u ka Yehova utimo ire kisa. Etie lembe ma tielo cwiny lee ning’eyo nia Yehova tie ayika niweko dubo mwa, kadok ma dongo; enoke tek waloko cwinywa i andha, watuco dubo mwa man wabeii ku kero mwa ceke kara kud wapodh i dubo ma rom! (Rie. 28:13; Tic. 26:20; 1 Yoh. 1:9) Bende etie lembe ma tielo cwiny ning’eyo nia eweko dubo mi magwei, dok bedo ve jutimo ngo dubone.—Eze. 33:16.

3-4. (a) Nyamego moko uwinjere nenedi i ng’ey batizo pare? (b) Wabiweco iwi lembang’o i thiwiwec maeni?

³ Saa moko lundo ebedo lembe ma tek ni ng’atini niyiyo nia Yehova uweko ire. Wakenen lembe ma Jennifer m’udongo i lemandha ukadhu kud i iye. Kinde ma fodi en aradu, emondo i timo ma reco man ecaku timo dubo i aponda. Oro moko i ng’eye, edwogo i bang’ Yehova man etimo mediri pi nilimo batizo. Eyero kumae: “I kwo para ma con abed amiyara zoo i sayu jukupiny, i lemsasa mi tarwang’, i meth ma drikadri man abino kwiny ma rac. Ang’eyo nia kan akwayu Mungu uwek dubo para man aloko cwinya, lam ma Kristu uthiero romo dwoka leng’. Ento ebino lembe ma tek niketho adundena uyii nia Mungu udaru weko dubo para.”

⁴ Nyo saa moko ebedo iri lembe ma tek niketho adundeni uyii nia Yehova uweko dubo peri ma con? Yehova ubemito wang’ey nia etimo iwa kisa man nia cwinywa ukwi calu Daudi. I thiwiwec maeni, wabineno nia pirang’o ukwayu cwinywa ubed tek nia Yehova udaru weko dubo mwa man gin ma copo konyowa niyiyo lembene.

PIRANG’O KWAYU CWINYWA BED TEK NIA YEHOVA WEKO DUBO?

5. Sitani ubemito wayii lembang’o? Kemii lapor.

⁵ Tek wayiyo nia Yehova uweko dubo mwa, wabipodho ngo i uwic ma Sitani uciko. Poy nia Sitani tie ayika nitimo gin moko ci kara eketh wawek nitimo ni Yehova. Pi nitundo i kum lembakeca maeno, ecopo ketho wapar nia watimo dubo ma wekere ngo. Wakewecu iwi lembe pa ng’atu moko mi Korintho ma jugam juwodho kud i cokiri pi lemsasa mi tarwang’. (1 Kor. 5:1, 5, 13) I ng’eye kinde m’eyewo dubo pare, Sitani umito nia umego ku nyimego mi cokiri kud giwek ire, niwacu kud gipim apima de nijole kendo i cokiri. Ebino mito ng’atu maeno m’uloko cwinye upar nia dubo pare romo wekere ngo man kara ejig nitimo ni Yehova “ni kum can pare m’akeca.” Lembakeca man bodho pa Sitani uwilere ngo. “Wang’eyo cuu bodho pare.”—2 Kor. 2:5-11.

6. Wacopo timo ang’o kara wakab kookoo ma dubo uberoyo i iwa?

⁶ Tek wayiyo nia Yehova uweko dubo mwa, wabikabu kookoo m’ang’eyang’o ubenuro kowa. Tekene wadubo, ang’eyang’o mondo i iwa. (Zab. 51:17) Eno tie lembe ma ber, pilembe pidocwinywa copo cwaluwa nitimo lembe m’ukwayere pi niyiko kura mwa. (2 Kor. 7:10, 11) Ento ka waketho wiwa zoo i kum kier mwa pi nindo ma lee i ng’ey ma wayewo dubo mwa, cwinywa romo tur. Ka wayiyo nia Yehova weko dubo, wabikabu kookoo ma dubo uroyo i iwa cen. I ng’eye wabitimo ni Yehova tap calu m’ebemito, niwacu ku pidocwiny ma leng’ man kud anyong’a ma dit. (Kol. 1:10, 11; 2 Tim. 1:3) Dong’ waromo ketho adundewa uyii nia Yehova uweko dubo mwa nenedi?

ANG’O MA COPO KONYI NIYIYO NIA ANDHA YEHOVA UWEKO DUBO PERI?

7-8. Yehova ukoro pire nenedi ni Musa, man eno ubetielo cwinywa nenedi? (Ai 34:6, 7)

⁷ Nyam i lembe iwi kite ma Yehova ukoro ko pire gire. Ku lapor, kenen lembe ma Yehova uyero ni Musa iwi Got Sinai.a (Som Ai 34:6, 7.) Kadok nwang’u Yehova utie ku kite dupa ma beco de, re enwang’u nia etie ber nikoro ni Musa nia etie “Mungu ma jakisa man ma jabero.” Nyo Mungu ma kumeno copo cerere nitimo kisa ni jatic pare m’uyewo dubo pare i andha? Ungo! Ka nwang’u etimo kumeno, nwang’u etie ng’atu ma rac ma kisa mbe i iye. Yehova copo bedo ngo kumeno nyanok de.

⁸ Cwinywa copo bedo tek nia kinde ma Yehova ubeyero nia eweko lembe, nwang’u eyero lemandha, kum ecwayu ndra ngo. (Zab. 31:5) Pieno, etie tap ve m’eyero. Dong’ tekene etie tek iri niyiyo nia Yehova uweko iri dubo moko m’itimo con, kepenjiri kumae: ‘Nyo andha ayiyo nia Yehova tie Mungu ma jakisa, ma jabero man ecerere ngo niweko dubo ni ng’atu moko ci m’uloko cwinye? Dong’ acopo yiyo ngo nia eweko ira de?’

9. Weko dubo thelembene tie ang’o? (Zaburi 32:5)

⁹ Nyam i lembe iwi gin ma Yehova uketho ju ma gikiewo Biblia giyero iwi kite m’eweko ko dubo. Ku lapor, kenen lembe ma Daudi m’ukiewo theng Biblia moko ukoro iwi kite ma Yehova weko ko dubo. (Som Zaburi 32:5.) Daudi uyero kumae: “Iweko kosa para man dubo para.” Wec mi dhu Juebrania ma juloko nia “niweko” thelembene copo bedo “niting’o,” “nikabu cen,” kunoke “niyeyo.” Kinde ma Yehova uweko dubo pa Daudi, udog ubedo ve eting’o dubone, eyeyogi man eterogi bor. E Daudi ugam unwang’u kwiyocwiny pilembe kookoo m’akeca mi dubo m’etimo uthum. (Zab. 32:2-4) Wan de wacopo nwang’u kwiyocwiny ma kumeno. Kinde ma wayewo dubo mwa i andha, ukwayu ngo wamedara nibedo ku kookoo pi dubo moko ma dong’ Yehova udaru ting’o, eyeyogi man eterogi bor kudwa.

10-11. Wec ma nia Yehova tie “ayika niweko lembe” ubeponjowa ku lembang’o i wiye? (Zaburi 86:5)

¹⁰ Som Zaburi 86:5. I giragora maeni Daudi uyero nia Yehova tie “ayika niweko lembe.” Kithabu moko ma koro i Biblia m’ukoro i wec maeno uyero pi Yehova kumae: “[Etie] ‘Jaweklembe’, eno tie ‘kura’ pare.” Pirango niweko lembe utie kite pa Yehova? Theng versene m’ulubo ukoro pire kumae: “Mer peri ma lokere ngo tie lee dit ni dhanu ceke ma gibelwong’i.” Calu ma waponjo i thiwiwec m’ukadhu, mer ma lokere ngo cwalu Yehova nimoko kikiki man rondo ku rondo i kum jutic pare ma gibegwoko bedoleng’ migi ire. “Ebitimo kisa yot yot” ni judubo ceke ma giyewo dubo migi nikum mer pare ma lokere ngo. (Isa. 55:7, kmt.) Dong’ tekene etie tek iri niyiyo nia Yehova weko dubo, kepenjiri kumae: ‘Nyo andha ayiyo nia Yehova tie ayika niweko dubo ni dhanu ceke ma giloko cwinygi man ma gikwayu kisa i bang’e? Dong’ nyo acopo yiyo ngo nia eweko ira kinde m’akwaye etim ira kisa?’

¹¹ Wacopo nwang’u jukocwiny tekene wang’eyo nia Yehova nyang’ cuu nia watie judubo. (Zab. 139:1, 2) Wakenenu lembe ma Daudi uyero i Zaburi mange man kite ma lembene copo konyo kowa niyiyo nia Yehova weko dubo mwa.

WII KUD UWIL I KUM GIN MA YEHOVA POY I KUME

12-13. Nimakere ku Zaburi 103:14, Yehova poy i kum lembang’o, man lembene cwale nitimo ang’o?

¹² Som Zaburi 103:14. Daudi uyero nia Yehova “poy nia wan utur.” Ku wec maeno, Daudi ukoro thelembe acel m’uketho Yehova tie ayika niweko lembe ni jutic pare ma giyewo dubo migi: Eng’eyo nia watie ku kum mi dubo. Pi ninyang’ ma ber i lembe maeno, wakeng’iyu cuu i lembe ma Daudi uyero.

¹³ Daudi uyero nia Yehova ‘ung’eyo cuu kite ma wacwiyara ko.’ Ecwiyo Adamu “kud utur mi ng’om” man eng’eyo cuu nia kadok dhanu ma gimbe ku dubo de gitie ku mupaka moko ma gicopo kadhu ngo. Ku lapor gicikiri nicamu, ninindo man niyuyo. (Tha. 2:7) Ento kinde m’Adam giku Eva gidubo, dhanu udoko utur dong’ i ayi mange. Calu ma watie nyikwaygi, wadoko ku kum mi dubo, eno cwaluwa nitimo lembe ma reco. Yehova jik kende kende ngo ning’eyo nia wa judubo. Daudi uyero nia “epoy” nia wa judubo. Wec mi dhu Juebrania ma jutiyo ko kakeni nyutho nia saa ceke kisa nege i kumwa. I adundo, wacopo yero wec pa Daudi eno kumae: Yehova ung’eyo nia wacopo kier saa moko; dong’ kinde ma wakier, kisa nege i kumwa man eweko iwa dubo mwa tekene waloko cwinywa i andha.—Zab. 78:38, 39.

14. (a) Daudi ukoro nia Yehova weko dubo mwa nenedi? (Zaburi 103:12) (b) Lapor pa Daudi ubenyutho nenedi nia Yehova weko dubo mi magwei? (Nen sanduku ma thiwiye tie “Yehova weko lembe man wiye wil i kume.”)

¹⁴ Ang’o mange ma copo ketho cwinywa bedo tek nia Yehova uweko iwa? (Som Zaburi 103:12.) Daudi uyero nia ka Yehova uweko iwa, eketho dubo mwane bor “calu ma yo nyangu bedo bor ku yo reto.” Yo nyangu tie bor lee dit ku yo reto, kaka ario maeno gicopo rombo ngo i kindgi. Eno ubenyutho iwa lembang’o iwi dubo ma Yehova udaru weko? Buku moko ma koro i lembe mi Biblia ukoro i wec maeno kumae: “Tekene jukabu dubo moko jutero bor kumeno, dong’ cwinywa copo bedo tek nia ng’wice, babang’e, man kadok poy pire de bedo mbe.” Kepoy nyanok: ng’wic piny copo dwogo lembe moko iwi ng’atini. Ento kinde ma Yehova uweko dubo, edog ebedo ve bang’ ng’wic dubone de dong’ umbe ma copo dok poyo wiye i kume kadike ma cwale emii iwa matira.—Eze. 18:21, 22; Tic. 3:19.

15. Wacopo timo ang’o ka kookoo ubewekowa ngo pi dubo moko ma watimo coni?

¹⁵ Wec pa Daudi ma nwang’ere i Zaburi 103 copo konyowa nenedi niyiyo nia Yehova weko dubo mwa? Tek kookoo mi dubo m’itimo con ubesendi, iromo kepenjiri kumae: ‘Nyo wiya ubewil i kum gin ma Yehova poy i kume, nia eng’eyo ya a jadubo man nia eweko lembe ni jadubo m’uloko cwinye calu ani? Bende nyo abepoy i kum gin ma Yehova ung’iyo niwil i kume, niwacu dubo m’edaru weko dong’ emiyo ngo matira kendo pire?’ Yehova ketho ngo wiye i kum dubo ma watimo con. Wan de mito ngo waketh wiwa i kume. (Zab. 130:3) Tek wayiyo nia Yehova uweko dubo mwa, e wabibedo ku copo mi weko lembe iwa bende man wabimedara nitimo ire.

16. Kemii lapor moko m’unyutho nia etie lembe mir ariti niweko kookoo mi dubo ma watimo con usendwa asu. (Nen bende cal.)

¹⁶ Wakemak lapor ma e: Niweko kookoo mi dubo ma watimo con usendwa ubedo ve ng’atu m’uberingo ku mutukari, m’ulund uketho wang’e zoo i kieu ma juneno ko lembe m’i ng’eyjo. I andha, etie ber nibebolo wang’jo wang’ acel acel i kieu maeno pi niuro ariti ma n’i yor i ng’eyjo. Ento kara imediri ma ber i weng’i, icikiri niketho wii cuu i kum yo m’i weng’i. I ayi ma rom eno, tek wabecuku neno wang’ acel acel kosa ma watimo con, wabinwang’u ponji i kumgi man wabimaku yub ma tek kara kud wapodh kendo i kosanegi. Ento ka waketho wiwa zoo i kumgi, kookoone biketho wabitimo ngo ni Mungu i ayi ma cuu. Pieno, ukwayu wamedara niketho wiwa zoo i kum yo ma n’i wang’wa. Wa n’i yo m’ubeterowa i kwo ma rondo ku rondo i ng’om ma nyen ma Mungu ung’olo, kaka ma “wijo bipoy ungo” i iye i kum lembe ma reco.—Isa. 65:17; Rie. 4:25.

MEDIRI NIKETHO ADUNDENI UYII

17. Pirang’o ukwayu wamedara niketho adundewa uyii nia Yehova umaruwa man nia eweko dubo mwa?

¹⁷ Ukwayu wamedara niketho adundewa uyii nia Yehova umaruwa man nia eweko dubo mwa. (1 Yoh. 3:19) Pirang’o? Pilembe Sitani bimedere niketho wayii nia Yehova copo maruwa ngo man nia eromo weko ngo dubo mwa. Kadok nwang’u etii ku yo ma kani de, re lembakeca pare tie acel: Niketho wawek nitimo ni Yehova. Kudi wiwa uwil nia Sitani bimedere nitimo lembuno ku kero pare ceke pilembe eng’eyo nia nindo udong’ ire nyanok. (Nyu. 12:12) Kud wawek evoywa!

18. Icopo timo ang’o kara adundeni uyii nia Yehova umeri man nia etie ayika niweko dubo peri?

¹⁸ Kara iyii nia Yehova umeri, tii ku lembe ma tung’ tung’ ma waweco i wigi i thiwiwec m’ukadhu. Pi niketho adundeni uyii nia Yehova tie ayika niweko dubo peri, nyam i lembe iwi kite m’ekoro ko pire gire. Nyam bende i lembe iwi gin m’eketho ju ma gikiewo Biblia giyero iwi kite m’eweko ko dubo. Wii kud uwil nia Yehova ung’eyo cuu nia itie ku kum mi dubo man nia ebitimo iri lembe ku kisa. Poy nia kan eweko lembe, eweke mi magwei. E kumeno in de ibibedo ku tegocwiny ma rom ku pa Daudi iwi kisa pa Yehova man ibiwacu kumae: “Afoyi, Yehova, pilembe ‘iweko kosa para man dubo para’!”—Zab. 32:5.