Macikara tie calu nanga ma ketho gamiri peri cungo ma tek i saa mir avuvu
PI JU M’UGAMIRI
1 Wor macikara mi gamiri peri
THELEMBENE TIE ANG’O?
Nico man dhaku ma gibeworo macikara mi gamiri migi gineno gamirine ni gin ma kwayu ngo ulal, man eno ketho gikwo ma cwinygi ukwiyo. Ng’atuman m’i kindgi bedo ma cwinye tek nia jadhoge bibedo asu i gamiri migi, kadok saa ma peko ma lee uwok.
Jumoko gibedo asu i gamiri migi ndhu pir acel, pilembe jurimbgi, jutic wagi man wedi migi gibemaru ngo nia gilal gamiri migi. Ento etie ber dit ka mer man woro re m’ubecwalujo nibedo asu i gamiri.
CIK MIR UKUNGU MI BIBLIA: “Nico bende ucikere ngo niweko dhaku pare.”—1 Jukorintho 7:11.
“Kan ibeworo macikara mi gamiri peri, eno biketho ikier ungo nyaswa swa. Ibitimo kisa piyo piyo man ibikwayu kisa de piyo piyo. Ibineno peko ni lembe ma bewok ento ungo ni thelembe ma copo ketho wulal gamiri mwu.”—Micah.
PIRANG’O UKWAYU NIBEDO ASU I GAMIRI?
Kinde ma ka peko uwok, ju m’ugamiri ma gimoko ngo i kum macikara migi mi gamiri gicaku wacu nia ‘wan ukethere ngo nia wabed karacelo’ man gicaku sayu yore mi lalu gamirine.
“Dhanu ma pol gimondo i gamiri ma nwang’u ‘gitie dong’ ku paru mange i wigi’ nia ka lembe uwok uwotho ngo cuu ci, gibilalu gamirine cen. Tekene ng’atini ubemondo i gamiri m’ebeparu pi yore mi lalu gamirine, nwang’u macikara migi udaru nyothere niai i acaki.”—Jean.
ICOPO TIMO ANG’O?
KE PIM LEMBE MA E
Kinde ma dong’ wubeteluru. . .
Nyo ibed icaku paru nia pirang’o wugemuru wukude?
Nyo ibed icaku paru nia nwang’u wukwo wuku ng’atu mange m’uweko jadhogi mi gamiri?
Nyo ibed iyero lembe ma calu ve, “abiweki cen” kunoke “acisayu ng’atu mange m’ufoyo kuda”?
Kan idwoko nia eyo i wang’ penjine acel kunoke ma dupa, ng’ei nia eno re m’utie saa m’ukwayu itiel macikara mi gamiri peri.
WUWECI WUKU JADHOGI MI GAMIRI IWI PENJI M’ULUBO E:
Nyo kadhiri mi macikara mwa mi gamiri ubejwiki? Tekene kumeno, pirang’o?
Waromo maku yub ma kani niai kawoni eni pi nitielo macikara mwa?
JUK MA TUNG’ TUNG’
Bed ikiew wec moko mi mer ni jadhogi mi gamiri
Keth foto pa jadhogi mi gamiri kaka m’itimo i iye tic pi ninyutho nia imoko i kum macikara mwu
Bed ilwong’ jadhogi mi gamiri ku bang’ nindo kinde ma in’i tic kunoke kan itiye kendi
CIK MIR UKUNGU MI BIBLIA: “Gin ma Mungu uribo karacelo, dong’ dhanu kud upok kindgi.”—Matayo 19:6.