Dilo pa Yehova umbe ku jutelwic ma juculo acula ku sente. Ento calu ubedo i rundi ma cokri mi Jukristo ucaku i ie acaka, tin bende juketho juliew kunoke judong cokri pi “nigwoko cokri pa Mungu.” (Tic mi Jukwenda 20:28) Judong cokri eno gitie dhanu ma co m’uteng’ni i tipo ma gitelo wi cokri man gigwoke ‘ku maru migi gigi ento ma jucung’ogi acung’a ngo kadok mi sayu nitimo kuloka de ngo, ento kud avane m’unegogi i wang’ Mungu.’ (1 Petro 5:1-3) Gitimo tic ang’o pi bero mwa?

Gidieng’ piwa man gigwokowa. Judong cokri telo wi cokri man gwoke i thenge mi tipo. Calu ging’eyo nia Mungu re m’umio igi tic maeno ma pire tek, judong cokri rwodho ngo arwodha iwi dhanu pa Mungu, ento gikonyowa ni bedo maber man kud anyong’a. (2 Jukorinto 1:24) Calu jakwac dieng’ akeca pi rombe pare acel acel, judong cokri gi ii ni ng’eyo ng’atuman acel acel mi cokri.​—Lembrieko 27:23.

Giponjowa ku kite mi timo yeny pa Mungu. Kubang’ yenga judong cokri telo wi coko ma tung’ tung mi cokri kara yioyic mwa ubek tek. (Tic mi Jukwenda 15:32) Jumaco maeno m’uworo Mungu i atira ginyutho lapor i tic mi rweyo lembanyong’a, girweyo kudwa man nitendowa i ayi ma tung’ tung’ mi tic ne.

Giketho cwiny ng’atuman acel acel i kindwa. Kara gidieng’ pi thenge mi tipo pa ng’atuman acel acel i kindwa, judong cokri copo niliewowa i pacu mwa kunoke i Ot Ker pi nimio iwa kony man nitielo cwinywa ni kadhu kud i lembagora.​—Yakobo 5:14, 15.

M’uweko tic ma gitimo i cokri, judong cokri dupa tie bende ku tic migi mi kum man ku rwom i udi migi, lembe maeno bende ubekwayu giwodh saa migi man gidieng’ pire. Pieno, calu umego eno timo tic ma tek, giromo ya waworgi.​—1 Jutesaloniki 5:12, 13.

• Tic mi judong cokri tie ang’o i cokri?

• Judong cokri dieng’ nenedi pi ng’atuman acel acel i kindwa?

Biblia uweco pi dhanu ma co ayi ario m’ubedieng’ pi tic ma tung’ tung’ i cokri, niwacu​—“juliew man jukony tic.” (Jufilipi 1:1) Wang’ ma pol, dhanu maeno ginwang’iri i wel ma cu pi nikonyo cokriman. Jukony tic timo tic makani pi bero mwa?

Gikonyo guriri mi judong cokri. Jukony tic tie dhanu ma co m’uteng’ni i tipo, ma jucopo geno man ma gimaku tic migi ku kero, jumoko tie aradu jumange ke wang’gi udaru teng’ni. Gitimo tic ma pigi tek ma jutimo nja i cokri, re tic migi tie ngo mi ponji. Eno konyo judong cokri niketho wigi ucungi iwi ponji man gwoko cokri.

Gitimo tic ma tung’ tung’ m’ukwayere. Ni jukony moko jumio tic mi jolo dhanu m’ubino i coko. Ni jumange ke jucopo mio tic mi tio ku jamb kokodwal, poko jemni (publication), neno wi lim mi cokri, poko ni umego ku nyimego kakare mi rweyo lembanyong’a i ie. Gikonyo bende tic mi gwoko man yiko Ot Ker. Judong cokri copo kwayu ibang’ jukony tic nikonyo umego ku nyimego m’udaru nitii. Jukony tic bedo ayika pi nitimo tic moko ci ma jumio igi, pieno umego ku nyimego i cokri mio igi woro pi tic ma tek ma gicikutimo.​—1 Timoteo 3:13.

Gitie lapor maber ni jukristo mange. Jung’io dhanu ma co ubed jukony tic pilembe ginyutho i kwo migi nia gitie ku kite kunoke kura ma beco mi tipo. Ka gitimo theng tic mi ponji ma jumio igi i coko, gitielo yioyic mwa. Gitie bende lapor maber i tic mi rweyo lembanyong’a, pieno giketho wan bende warweyo kud amora. Calu gidiko cing’gi ku judong cokri, giketho cokri ubed kud anyong’a man i acel. (Juefeso 4:16) Ing’ei nindo, gin bende gicopo romo nibedo judong cokri.

• Jukony tic utie dhanu ma co m’utie ku kite ma nenedi?

• Jukony tic konyo cokri nenedi kara ewoth maber?

Giragora mi jugiriki mi jukristo uweco wang’ ma pol pi Barnaba giku jakwenda Paulo. Jumaco maeno gibino Juliew ma wotho awotha, gibed giliewo cokri mi rundi ma kwong’a. Pirang’o? Gibed gidieng’ akeca pir umego man gimito nia gibed maber i tipo. Paulo uyero nia etie kud ava ‘nidok kendo man niliewo umego’ pi nineno karam bedo migi. Ebedo ayika ni wotho woth ma bor akeca pi nicidho ketho cwiny umego. (Tic mi Jukwenda 15:36) Tin bende, juliew mwa ma wotho awotha gitie kud ava ma rom.

Gibino niketho cwinywa. Jaliew acel acel mi twodri liewo cokri ma tung’ tung’ ma romo 20 kumeni. Etundo i cokriman wang’ ario kubang’ oro man etimo yenga acel i ie. Umego maeno ku mon migi gicopo konyowa ku lembe ma tung’ tung’ ma gidaru ninwang’u i tic pa Mungu. Gi ii ning’eiri kud aradu man judongo, bende gitie ayika nicidho kudwa i tic mi rweyo lembanyong’a man nikonyowa ku telo wi ponji mwa mi Biblia. Juliew eno gitimo tic mi gwoko rombe pa Mungu karacelo ku judong cokri, giketho yioyic mwa bed tek kinde ma gimio ponji i coko man i coko ma dongo.​—Tic mi Jukwenda 15:35.

Gidieng’ piwa ceke. Juliew mi twodri dieng’ akeca i kum thenge mi tipo mi cokri. Gitimo coko karacelo ku judong cokri man jukony tic pi ning’io i mediri mi cokri man pi nimio igi juk iwi kite ma gicopo timo kudo tic migi maber akeca. Gikonyo juyab yo kara gibed ku matoke maber i tic mi rweyo lembanyong’a man gifoyo nineno kite ma jumanyen ubemondo bende i dilo pa Yehova man kite ma gibemediri kudo i tipo. Umego maeno ceke ng’atuman acel acel miire en gire pi nibedo “jatic wadwa, pi bero mwa.” (2 Jukorinto 8:23) Wacikra nilubo yioyic migi man kite ma gimoko kudo ikum lembe mandha.​—Juebrania 13:7.

• Juliew mi twodri liewo cokri ma tung’ tung’ pi thelembe makani?

• Icopo nwang’u kony nenedi ni kadhu kud i liew migi?

Ka peko wok i wi umego ku nyimego mwa ma Jumulembe pa Yehova, ndhundhu wamaku yub mi konyogi. Eno nyutho nia wamaru andhandha umego ku nyimego mwa. (Yohana 13:34, 35; 1 Yohana 3:17, 18) Wakonyogi nenedi?

Wamio sente. Kinde ma ndru ma dit ugam upodho i ng’om Yudea, Jukristo mi rundi ma kwong’a mi Antiokia gigam gioro sente pi nikonyo umego migi mi tipo. (Tic mi Jukwenda 11:27-30) Wan bende, ka wawinjo nia umego mwa i ng’om moko ubenwang’u peko, waoro igi giramia nikadhu kud i cokri mwa kara ukonygi i yeny migi mi kum.​—2 Jukorinto 8:13-15.

Wamiira giwa pi nicidho konyogi. Judong cokri ma ginwang’iri i kakare ma peko eno uwok i ie gitimo kero ni ng’eyo kakare ma ng’atuman mi cokri migi nwang’ere i ie kara ging’ei nia nyongo gin ceke ginwang’iri man ke gitie maber. Guriri mi mio kony copo telo wi tic mi cam, pii maleng, bongu, kabedo man yath. Jumulembe mapol m’utie ku bodho ma yeny ne tie, gimiiri gigi niculo sente migi pi nicidho konyo tic mi poko piny kunoke mi yiko udi mir umego ku mi Ker m’unyothre. Calu wakwo i acel i dilo pa Yehova, wanwang’u piopio piny ma yeny ne tie man dhanu ma copo mio kony ne. Kadok wabed wakonyo “dhanu ma tie juruot mwa mi yioyic” de, kan ecopre, wakonyo bende dhanu m’utie ngo jumulembe.​—Jugalatia 6:10.

Wajukogi ni kadhu kud i Biblia. Dhanu ma peko uwok i wigi gitie ku yeny mi jukojuk. Saa ma kumeno, waketho genogen mwa i bang’ Yehova, ma etie, “Mungu mi jukojuk ceke.” (2 Jukorinto 1:3, 4) Kud anyong’a, warweyo lembang’ola pa Mungu ma nwang’ere i Biblia ni dhanu ceke ma cwinygi tur. Wayero igi nia ceng’ni eni, Ker pa Mungu bibino daru peko ceke ma nyayu litho ku can i kumwa.​—Lembanyutha 21:4.

• Ang’o ma ketho Jumulembe pa Yehova ginwang’u piopio kony pi nikonyo ju ma peko uwok i wigi?

• Wacopo juko dhanu ma peko wok i wigi nenedi?

Nindo ma nyanok i wang’ tho pare, Yesu ubino niweco ku julub pare ang’wen: Petro, Yakobo, Yohana man Andrea. Kinde ma ebino niewo pi lanyuth mi bedo nuti pare i nindo ma tokcen, epenjo penji acel ma pire tek akeca, eyero kumae: “Ng’a ma jamiru mandha ma riek de ma rwoth pare kethe wi juode, ya emi cemo migi i nindone?” (Matayo 24:3, 45; Marko 13:3, 4) Yesu mito ninyutho ni julubne nia ukwayu ngo gidieng’ pilembe en etie “rwoth,” migi man pieno ebiketho ju ma bibemio cam mi tipo ni julubne nja i nindo ma tokcen. Jamiru maeno tie ng’a?

Etie guriri mi julub moko mandha pa Yesu ma jung’iyo ku tipo. “Jamiru” eno tie Guriri M’utelo Wic mi Jumulembe pa Yehova. Emio cam mi tipo ni jurutic mange pa Yehova i nindone. Wajengra i wi jamiru maeno kum en re ma ebemedre ni mio iwa “cemo maka mwa i nindone.”​—Luka 12:42.

Eneno wi ot pa Mungu. (1 Timoteo 3:15) Yesu mio ni jamiru maeno rwom ma dit mi cungo iwi tic mi thenge ma nen mi dilo pa Yehova. Tic maeno tie nigwoko lim pa Kristo keni i ng’om, nitelo wi tic mi rweyo lembanyong’a, man niponjo ni kadhu kudi cokri mwa ma tung’ tung’. Pi nimio iwa cam m’uromo kudwa i nindone, ‘jamiru mandha man ma riek’ poko cam mi tipo nikadhu kud i buku ma tung’ tung’ ma watio kudo i tic mi rweyo lembanyong’a man nikadhu kud i coko mwa ma tung’ tung’.

Jamiru maeno tie mandha pilembe eponjo ponji mandha mi Biblia man eworo kubang’e kubang’e tic ma jumio i kore mi rweyo lembanyong’a, man bende etie riek pilembe egwoko lim pa Kristo i ng’om keni ku rieko. (Tic mi Jukwenda 10:42) Yehova mio mugisa i tic pare, uketho dhanu dupa gibeyiyo man gibediko cing’gi ku jamiru mandha man ma riek pi nimio cam mi tipo lee mandha ni dhanu.​—Isaya 60:22; 65:13.

• Yesu ketho ng’a m’ubed umi cam mi tipo ni julub pare?

• Pirang’o julwong’o jamiru nia en e mandha man ma riek?

I rundi mi jukwenda, ‘wend dhanu ma nyanok, niwacu jukwenda ku judong cokri i Yerusalem,’ re ma gibed gitimo tic calu guriri m’utelowic pi nimaku yub ma pigi tek pi cokri ceke mi jukristo wagi ma jung’io ku tipo. (Tic mi Jukwenda 15:2) Gibed gimaku yub karacelo m’umbe ni piemiri, pilembe iwang’ ni maku yub ne, gibed giyaru i giragora ma tung’ tung’ man gibed gilubo telowic pa tipo ma leng’ pa Mungu. (Tic mi Jukwenda 15:25) Guriri m’utelo wic ma kawoni de lubo lapor marom eno.

Mungu tio ku guriri m’utelowic pi nitimo yeny pare. Umego ma jung’io kutipo m’ubetimo tic i guriri m’utelowic giyaru i lembe pa Mungu cu mandha kinde ma gibemaku yub moko iwi kite m’umaku tic mwa uwoth kudo man iwi ponji. Gitie jumaco ma wang’gi teng’ni cu mandha. Kubang’ yenga gitimo coko pi niweco iwi yeny mir umego ku nyimego i ng’om zoo. Calu i rundi mi jukwenda, telowic mi Biblia wok ni kadhu kud i waraga kunoke juliew ma wotho awotha man nikadhu kud i yo mange de. Eno konyo dhanu pa Mungu niparu man ni timo tic i acel. (Tic mi Jukwenda 16:4, 5) Umego mi guriri m’utelowic gitelo wi tic mi yiko cam mi tipo, giketho cwiny Jumulembe ceke nia giketh tic mi rweyo lembanyong’a i kakare ma kwong’a man gineno bende wi tic mi mio rwom ma tung’ tung’ ni umego.

Guriri m’utelowic woro telowic pa tipo pa Mungu. Calu ju m’ubed utimo i guriri m’utelowic mi saa mi jukwenda, tin bende guriri m’utelowic jengre i kum telowic pa Yehova, Mungu ma dwong’ akeca, man Yesu Kristo ma etie wic mi cokri. (1 Jukorinto 11:3; Juefeso 5:23) Umego m’ubetimo tic i guriri m’utelowic gineniri ngo ni jutela pa dhanu pa Mungu. Gin ku Jukristo mange ma jung’io ku tipo, karacelo “gibemediri ni lubo nyathi-rombo [Yesu] kakare ceke ma ecidho i ie.” (Lembanyutha 14:4) Umego mi guriri m’utelowic gifoyo lee mandha ka waberwo pigi man pi tic ma gitimo.

• I rundi mi jukwenda, jukani m’ubed utimo tic i guriri m’utelo wic?

• Tin guriri m’utelowic lubo telowic pa Mungu i ayi ma nenedi?

Bethel tie nying mi dhu Juebrania ma thelembe ne tie “Ot pa Mungu.” (Thangambere 28:17, 19) Eno tie nying m’uromo andha nia julwong’ kudo udi ma tung’ tung’ ma Jumulembe pa Yehova gigiero i ng’om zoo, kakare ma jutelo ie wi tic mi rweyo lembanyong’a. Guriri m’utelowic timo tic i kabedo ne madit m’uloyo zoo ing’om. Kabedo maeno nwang’ere i New York, ing’om mir Amerika. Niai kud i kabedo ma dit akeca eno re ma guriri m’utelowic neno wi tic ma tung’ tung’ m’ubetimere i biro mi filial ma nwang’ere i ng’om ma pol. Dhanu ma timo tic i kabedo ma tung’ tung’ ma eno julwong’ogi juruot mi Bethel; julwong’ogi kumeno pilembe gikwo man gitimo tic karacelo, gicamu karacelo man giponjo Biblia karacelo i acel.​—Zaburi 133:1.

Bethel utie kakare ma segi ma juruot mi ie gimiiri gigi. I Bethel ceke, junwang’u co ku mon ma Jukristo ma gimiiri gigi pi nitimo yeny pa Mungu man niketho tic mi Ker ucidh i wang’e i saa ceke. (Matayo 6:33) Juculogi ngo acula, ento gin ceke jumio igi cam, kavuto, man sente ma nyanok kara ukonygi nipong’o yeny migi ma thindo thindo. I bethel, ng’atuman utie ku tic; jumoko timo i biro, jumange tedo cam, jukurucel ke timo i kusika ma tung’ tung’ ma juvuto i ie. Jumoko timo kakare ma juwodho ie buku, kakare mi lwoko bongu ku nigome, mi yiko jambtic m’unyothre, ku tic mange ma tung’ tung’.

I Bethel jutimo tic lee mandha pi nikonyo tic mi rweyo lembanyong’a. Thelembe mi kwong’o mi bedonuti mi bethel utie nia dhanu dupa akeca uponj lembe mandha mi Biblia. Wamak lapor mi nyathibuku maeni: ekiewere i the telowic pa Guriri m’Utelowic, ing’eye jugam juore kud Internet ibang’ ungu ma tung’ tung’ mi julok dhok i ng’om zoo. I ng’eye juwodhe niai kud i macin ma wodho karatasi pio pio akeca i Bethel. Tokcen, jugam juore i cokri ma kadhu 110 000 i ng’om zoo. Tic ceke maeni ma juruot mi Bethel timo utie ku thelembe mi tielo kum tic m’ukwayu jutim piopio ni kadhu tic mange ceke, niwacu, tic mi rweyo lembanyong’a.​—Marko 13:10.

• Jukani ma timo tic i Bethel man ke gikwo nenedi?

• Tic ma kani ma timere i Bethel man ke gitie ku thelembe ma kani?

Umego ku nyimego ma gitie juruot mi Bethel gitimo tic ma tung’ tung’ kara tic mi rweyo lembanyong’a ucidh i wang’e i ng’om moko acel kunoke nikadhu acel. Jumoko timo tic mi loko dhok, jumange ke gitimo tic kakare mi wodho gazeti, yiko ng’ei buku, kakare mi maku dwal ku cal mi video kunoke nineno wi tic mange mi ng’ombe.

Judongo mi Biro mi Filial neno wi tic. Guriri m’utelo wic ketho judong cokri adek kunoke nikadhu ma giromo pire pi nibedo Judong Biro mi filial kara gicung iwi tic ma tung’ tung’ i ng’om moko. Umego maeno mi biro mi filial ginyutho ni guriri m’utelo wic kite ma tic ubewotho ko i ng’om ma gineno wie, man bende peko ceke ma copo wok. Lembe ma ginyutho eno konyo guriri m’utelo wic ning’eyo lembe ma jucopo weco i wiye i buku man gazeti ma tung’ tung’, i coko mi cokri man coko ma dongo dongo mi nindo m’ubino. Guriri m’utelo wic oro wang’ ma pol umego ma julwong’o Juor mi kabedo ma dit i biro mi filial kara giliew filial ma tung’ tung’. Juor maeno gimio juk ma judongo mi biro mi filial tie kudo ku yeny kara gitim tic migi maleng’. (Lembrieko 11:14) Kinde ma Jaor mi kabedo madit ubeliewo filial, emio ponji kara umego ku nyimego m’ukwo i filial eno ginwang’ tielocwiny.

Biro mi Filial konyo cokri ma tung’ tung’ mi ng’ombe. Umego ma timo tic i biro mi filial ging’io i waraga ma juliew oro pi nipenjo ka nyongo jucopo caku the cokri mange ma nyen. Gicungo bende iwi tic mi Juyab yo, Jumisioner man Juliew ma wotho awotha ma gitimo tic i kabedo ceke m’utie i the loc pa biro mi filial eno. Gipangu lembe kara jutim coko ma dongo; gicungo bende i kum tic mi giedo mi Ot Ker ma nyen ,man nineno nyongo juoro buku ku gazeti i cokri ma tung’ tung’ ni makre ku yeny mi cokriman. Tic ceke m’utimere i Biro mi Filial konyo kara tic mi rweyo lembanyong’a utimere kubang’e kubang’e.​—1 Jukorinto 14:33, 40.

• Judongo mi Biro mi Filial konyo Guriri m’Utelo wic nenedi?

• Tic ma kani ma timere i Biro mi Filial?

Kara watim kero mwa ceke pi nirweyo “lembanyong’a” ni “thek ceke ku suru ku dhok man dhanu”, wabed wawodho jemni ma tung’ tung’ i dhok ma kadhu 750. (Lembanyutha 14:6) Watundo nitimo tic maeno ma lee nenedi? Watime ku kony mi ungu mi jugor m’uai i ng’om ma tung’ tung’, man bende ungu moko mi julok dhok ma gimiiri gigi​—gin ceke gitie Jumulembe pa Yehova.

Jular jukiewo lembe ma jubiloko ne kud Anglais. Guriri m’utelo wic neno wi tic mi biro mi gor i kabedo mwa ma dit pi ng’om zoo. Biro maeno telo wi tic mi jugor ma gitimo tic niai kud i kabedo mwa ma dit man i biro mi filial moko. Bedo ku jugor niai kud i ng’om ma tung’ tung’ konyowa nikiewo lembe ma bikonyo dhanu mi ng’om ma tung’ tung’ man ma bifoyo i dhanu dupa.

Ing’eye juoro lembe ma judaru nigoro ne i bang’ julok dhok. I ng’ei yaru man yiyo lembe ma jugoro, juoro lembe ne i bang’ ungu mi julok dhok i ng’om zoo nikadhu kud i Internet. Julok dhok eno giloko lembe ne, gineno cu nia nyongo lembe ma giloko ne urombo ku mir Anglais, man ing’eye gisome cu kara ginen nia lembe ma giloko ne jucopo nyang’ i ie man ka nyongo erombo ku cik mi dhok migi. Julok dhok eno gitimo kero pi nitio ku “wec ma tap man mandha” m’ukoro i andha i dhok migi thelembe mi wec mir Anglais.​—Eklizia 12:10.

Ordinater konyo kara tic maeno utimere piopio. Ordinater copo ngo nitimo tic kakar umego ku nyimego m’ugoro lembe kunoke m’uloko dhok. Ento, tic maeno copo timere piopio ka gibetio ku buku ma koro thelembe mi wec ma dongo man jambtic mange ma nwang’ere i ordinater. Jumulembe pa Yehova uyiko jambtic moko ma julwong’o MEPS. Jambtic maeno konyo nikiewo lembe i dhok dupa mandha, man niketho cal m’urombo ku lembe ne, bende nipangu piny ma jukiewo ne maleng’ i wang’ niore kara macin uwodhe edok ni buku.

Pirang’o watimo kero niloko buku mwa i dhok dupa uketho i ie bende dhok ma dhanu ma wendgi nok kende re ma weco? Thelembe ne utie nia Mungu umaru ‘kwond dhanu ceke utund niboth man ninwang’u ng’eyong’ec mi lemandha.’​—1 Timoteo 2:3, 4.

• Kara jutund niwodho jemni mwa, tic ma kani ma jubed jutimo?

• Pirang’o waloko buku mwa i dhok dupa akeca?

Kubang’ oro dilo mwa wodho man poko milioni dupa akeca mi Biblia ku buku mange mi mananu. Wagiero man wayiko udi mi Ker man biro mi filial. Wamio sente ni juruot mi Bethel ku jumisioner kara ukonygi i yeny migi ma tung’ tung’ man wamio kony kinde ma peko moko uwok kakare moko. Saa moko icopo penjiri kumae: ‘Re sente mi timo lembe maeno zoo junwang’u kani?’

Wamio ngo apaje, kadok nibolo thier man watimo ngo bola. Kadok watio ku sente lee akeca pi niketho tic mwa mi rweyo lembanyong’a ucidh i wang’e, wakwayu ngo sente i bang’ dhanu. Oro daru kadhu 100 niai ma gazeti mir arionde mi Ot Kur ma Wiw ugam uyero ya watie ku yioyic nia Yehova re m’ucungo i kum tic mwa man nia “wabibekadhu ngo i bang’ dhanu pi nikwayu ya jukonywa”​—Fodi watimo ngo kumeno kadok wang’ acel de!​—Matayo 10:8.

Tic mwa ma tung’ tung’ ucungo iwi giramia ma ku berocwiny. Dhanu dupa maru tic mwa mi ponjo Biblia, pieno gimio giramia kara ukony kor tic ne. Jumulembe pa Yehova bende gimio kud anyong’a saa migi, kero migi, sente migi man piny mange de kara yeny pa Mungu utimere i ng’om zoo. (1 Lemkei 29:9) I Ot Ker man i coko mwa ma dongo dongo, junwang’u sondu ma tung’ tung’ mi giramia; dhanu ceke m’umaru nimio giramia gicopo niroye i sondu maeno. Kunoke jucopo mio giramia nikadhu kud i kusika mir Internet, jw.org. Wang’ ma pol, dupa mi ju ma bemio giramia eno, gitie dhanu ma sente migi lee ngo, calu dhaku ma jacan ma cware tho ma Yesu uyungo pilembe ebolo sente ma nok ario i kakan piny. (Luka 21:1-4) Pieno, nja ng’atu moko ci copo ‘koyo piny i kakan piny’ pare kara emi “calu ekeco ku i adundene.”​—1 Jukorinto 16:2; 2 Jukorinto 9:7.

Wang’eyo m’umbe jiji nia Yehova bimedre nicwalu adunde dhanu m’umito ‘niyunge ku piny migi ma pigi tek’ kara ukony tic mi Ker, man pieno, niketho yeny pare utimere.​—Lembrieko 3:9.

• Pirang’o dilo mwa ukoc ku dini mange?

• Jutio ku giramia ma ku berocwiny pi nitimo ang’o?

Ot ma Jumulembe pa Yehova tio kudo pi nitimo thier julwong’o Ot Ker pilembe i ot maeno, giweco akeca iwi Ker pa Mungu, ma etie ponji ma pire thek akeca i Biblia. Bende, kinde ma Yesu ubino nirweyo lembanyong’a, thiwiwec pare ubino Ker pa Mungu.​—Luka 8:1.

Ot Ker utie kakare mandha ma jutimo i ie thier. I Ot Ker re ma umego ku nyimego ginwang’u telowic pi nicidho rweyo lembanyong’a mi Ker. (Matayo 24:14) Dongo man ayi mi gier mi Udi Ker eno ubed ukoc. Gitie ngo udi ma dongo dongo akeca man jugomogi ngo kadok nirukogi i ayi ma zungo ic akeca. Cokri acel kunoke cokri dupa copo tio ku Ot Ker acel. I oro ma nok m’ukadhu, wagiero elufu dupa mi udi ma nyen mi ker (kago udi ker abic kubang’ ceng’) pilembe cokri ubemedo ninyai man jurwei bende. Sente mi gomo udi maeno ceke beai kani?​—Matayo 19:26.

Jugierogi ku sente mi giramia pi giedo mi Udi Ker i ng’om zoo. Juoro sente maeno i biro mi filial. Niai kuca re ma jumie ni cokri m’utie ku yeny pa sente pi nigiero kunoke niyiko ot migi mi ker.

Umego ku nyimego mir ayi kwo ceke re ma gimiiri pi nigiero Udi ne m’umbe cul. I ng’om ma pol, junwang’u Ungu ma tung’ tung’ mi Jugom Udi Ker. Jugom udi ma giai i ng’om ma woko karacelo kud umego mange ma gitie anyoli mi ng’ombe ma gimiiri gigi, ka gidaru nigomo ot ne i cokri acel, gicidho i cokri mange i ng’om ma rom, kadok i kabedo ma bor, pi nikonyo cokri mi kabedo ne ku giedo mi Ot Ker migi. I ng’om mange, juketho Jumulembe ma giromo pire pi nicungo iwi tic mi giedo man niyiko Udi Ker i ng’om moko kende kende. Kadok umego mapol ma niai kud i kakare mange m’utie ku bodho gimiiri cu mandha pi nikonyo tic i kakare ma jubegiero i ie Ot Ker i kakare moko, umego ku nyimego mi cokri ma keca re ma gikonyo tic ne, gin re ma wendgi lee ni kadhu jum’ubino nikonyogi. Tipo pa Yehova man miiri kud amora man adunde zoo mi dhanu pa Mungu re ma ketho tic maeno mi giedo mi Udi Ker utimere.​—Zaburi 127:1; Jukolosai 3:23.

• Pirang’o julwong’o kakare mwa mi thier nia utie Udi ker?

• Ang’o ma konyowa kara watund nigiero udi Ker i ng’om zoo?

Ot Ker acel acel mi Jumulembe pa Yehova uyeyo nying maleng’ pa Mungu. Pieno, gwoko Ot Ker ubed maleng’, ma foyo ijo man m’umbe ku susu utie rwom ma ber man eno tie thenge acel ma pire thek mi thier mwa ma leng’ ma watimo ni Yehova. Umego ku nyimego ceke copo dikiri pi nitimo tic maeno.

Ing’ei coko wamiira pi niweko Ot Ker udong’ maleng’. I ng’ei cokoman, umego ku nyimego gimiiri pi niweyo kud anyong’a Ot Ker. Wang’ acel ku bang’ yenga julwoke alwoka man juwodho susu ceke kud i ie. Jadwong’ cokri kunoke jakony tic acel copo telo wi tic maeno; wang’ ma pol etie ku karatasi m’unyutho lembe ma tung’ tung’ m’ukwayere jutim. Ni makre ku yeny m’utie, umego ku nyimego gimiiri niweyo ot, nilwoke, niwodho susu, ni pangu kom maleng’, nilwoko kabini man niketho yath mi nego ukudi i ie, nilwoko dirisha ku kiew, niwang’u susu, niyiko kum ot ma yowoko man ni yiko lela. Wang’ acel kumeni kubang’ oro, jupangu nindo acel pi nitimo tic ma dongo dongo niwacu niyiko cu mandha Ot Ker ubed maleng’. Wacopo ponjo awiya mwa bende niworo kakare mwa mi timo thier; pieno, wacopo cidho kugi i ot ker i nindo mi ketho leng’o kara gin bende gidikiri i tic ne.​—Eklizia 5:1.

Dik cingi i kum tic mi yiko Ot Ker. Kubang’ oro, juneno kilili kum Ot Ker pi ning’eyo nyongo kakare moko tie m’unyotre kara juyiki; copo bedo thenge ma yor i ie kunoke yo woko. Ka jutimo kumeno Ot Ker bedo agwoka maleng pi nja; man ekonyo kara kud jubin junyoth sente ma lee akeca mi mananu. (2 Lemkei 24:13; 34:10) Ot Ker ucikre nibedo maleng’ pilembe etie kakare ma watimo i ie thier ni Mungu mwa. Ka wabedikra i tic maeno, wanyutho nia wamaru Yehova man nia waworo kakare mwa mi thier. (Zaburi 122:1) Bende Ot Ker maleng’ man ma tie agwoka telo nen mi dhanu i kum thier mwa.​—2 Jukorinto 6:3.

• Pirang’o ukwayu ngo wawenj kakare mi thier mwa?

• Yub ma kani m’umakre pi nigwoko Ot Ker mwa ubed maleng’?

Nyo imaru nisayu lembe moko i buku mwa kara umed ng’eyong’ec peri iwi Biblia? Nyo imaru ning’eyo lembe lee iwi giragora, iwi ng’atu, iwi kabedo kunoke iwi piny moko ma juweco pire i Biblia? Kunoke nyongo idaru penjiri ka nyongo lembe pa Mungu copo konyi ninyego kud adieng’acwiny moko m’itie kudo? Ka kumeno, icopo tio ku kapang buku (bibliothèque) mi Ot Ker.

Ecopo konyi kara inwang’ lembe ma tung’ tung’ i buku dupa. Saa moko nyo imbe ku buku ceke mi Jumulembe pa Yehova m’ukoro i Biblia idhok peri. Ento kapang buku mi Ot Ker utie ku buku dupa manyen. Bende jucopo nwang’u i ie lok ma tung’ tung’ mi Biblia, buku mi koro i wec ma dongo, ku buku mange ma copo konyo nisayu lembe. Icopo tio ku buku ma nwang’ere i kapang buku eno iwang’ coko kunoke ing’eye. Ka ordinater ma pi kapang buku utie i ie, jucopo royo i ie Watchtower Library. Eno tie jambtic moko mi yamu m’utie ku buku ceke mi Jumulembe pa Yehova; tio kude tie yot, man ecopo konyi ni sayu lembe, wec kunoke giragora moko.

Ekonyo awiya mi somo ma gitie ku thengponji i coko mi Kwo man tic mwa mi Jukristu. Icopo tio ku kapang buku mi Ot Ker pi niyiko theng ponji ma jumio iri. Jatel wi coko mi kwo man tic re ma neno wi kapang buku maeno. Ecikre nineno nyo buku ma nyen utie i kapang buku eno man nyo jupangugi ma leng’. En kunoke umego m’ucikuponjo kudi Biblia re ma gicopo nyutho iri kite mi sayu lembe ma jutie kudo ku yeny. Ento, ukwerere magwei niwodho woko buku mi kapang buku mi ker kunoke nidok kudo i pacu. Bende wacikra niyabu buku ne maber, kara kud enyothre, man ukwere nikiewo i buku eno kadok nyanok de.

Biblia yero nia kara wanwang’ ‘ng’eyong’ec mandha pa Mungu’, wacikra nibedo kud ava mi saye calu ‘piny makana m’upondo.’ (Lembrieko 2:1-5) Ka pang buku mi Ot Ker copo konyowa nicaku sayu ng’eyong’ec eno.

• Jambtic ma kani ma wacopo nwang’u i kapang buku mi Ot Ker kara ukonywa nisayu lembe ma tung’ tung’?

• Jukani ma copo konyi kara ing’ei kite mi sayu lembe m’itie kudo ku yeny i kapang buku mi Ot Ker?

Yesu Kristo yero ni julubne kumae: “Wek der mu urieny iwang’ dhanu; kara ginen tic mu ma ber, giyung wegwu de ma ni i polo.” (Matayo 5:16) Pi nipongo giragora maeno, watio maleng’ mandha ku jambtic mi wi yamu, uketho i ie Internet. Kusika mwa mir Internet tie jw.org. Icopo nwang’u i ie lembe iwi tic mi Jumulembe pa Yehova man bende iwi yioyic mwa. Lembang’o ma nwang’ere i ie?

Dwokowang’ mi Biblia i penji ma dhanu dupa bepenjo. I ie icopo nwang’u dwokowang’ penji ma pigi tek ma dhanu gibed gipenjo wang’ ma pol. Ku lapor, trakt Nyo, masendi bithum nindo moko dee? man trakt Nyo jum’utho gicopo kwo kendo andha? nwang’iri i Internet i dhok ma kadhu 600. Icopo bende ninwang’u Biblia Tafsiri ya Ulimwengu Mpya (Biblia Lok mi Ng’om ma Nyen) i dhok ma kadhu 130, man buku mange ma konyowa ni ponjo Biblia, calu Biblia Inafundisha Kabisa Nini? (Biblia Ponjo Ang’o Mandha?) man gazeti Munara wa Mulinzi (Ot Kur ma Wiw) ku Amuka! (Cew!). Iromo somo kunoke niwinjo girasoma maeno ma pol kud iwi yamu kunoke nitokogi i ayi ma tung’ tung’ calu ve MP3, PDF, kunoke EPUB. Icopo bende niwodho iwi karatasi buku kunoke gazeti ni ng’atu moko m’ufoyo i dhok pare! Video mi buku moko nwang’ere bende i dhok dupa mi dhanu m’uding’ kud ajuba (dhanu ma buba). Icopo wodho kunoke nitelo som mi Biblia, tuko mi Biblia, man wer ma beco ma icopo winjo saa ma iyom i ie.

Lemandha iwi Jumulembe pa Yehova. I kusika mwa mir Internet, junwang’u bende video iwi tic mwa mi ng’om zoo, lembe ma dongo dongo iwi Jumulembe pa Yehova, man tic mwa mi mio kony i saa ma peko wok i ie. Bende i kusika mwa, icopo nwang’u lembe iwi coko mwa ma dongo dongo m’ubino man kabedo mi biro mi filial ma tung’ tung’.

Ni kadhu kud i yo maeno, waketho der mi lemandha urieny ni tundo kakare ma bor mi ng’om. Dhanu mi kakare ceke, kadok i ng’om mir Antarktik, ginwang’u der ma eno. Waberwo nia ‘Lembe pa Yehova umedre i wang’e pio pio’ i ng’om zoo pi dwong’ pa Mungu.​—2 Jutesaloniki 3:1.

• Kusika mwa mir Internet jw.org konyo dhanu dupa nenedi niponjo lemandha?

• Icopo maru nisayu lembe ma kani i kusika mwa mir Internet?