Dhanu ma pol giweko nicidho lubo ponji mi dini moko ci, kum ka gicidho ginwang’u ngo telowic mandha mi tipo kadok juk moko mandha pi peko migi. Ento, pirang’o ukwayu idikiri i coko mi Jukristo ma Jumulembe pa Yehova? Ibiwok nwang’u ang’o kuca?

Ibinwang’u mutoro mi bedo i kind dhanu m’umeri man m’udieng’ piri. I rundi mi jukwenda, Jukristo gibino ku cokri man gibed gitimo coko pi niworo Mungu, niponjo giragora man niketho cwinygi I kindgi. (Juebrania 10:24, 25) Calu gibed ginyutho mer i kindgi, ginwang’iri nia kitie i kind jurimo mandha, niwacu umego ku nyimego migi mi tipo. (2 Jutesaloniki 1:3; 3 Yohana 14) Wan bende walubo lapor migi man wanwang’u mutoro ma romrom ku migi.

Ibinwang’u bero mi ponjo nitio ku cik mir ukungu mi Biblia i kwo peri. Calu i rundi ma con,dhanu ma co, mon man awiya, ceke gicokiri karacelo. Juponji m’uromo pire gitio ku Biblia pi nikonyowa nineno kite ma wacopo nitio ku cik mir ukungu mi Biblia i kwo mwa ma kubang’ ceng’. (Poi mi Cik 31:12; Nehemia 8:8) Dhanu ceke copo ting’o cing’gi pi nikoro wec man dhanu ceke copo niwer, kum theng coko maeno moko tie ma juwer i ie man ma jukwayu dhanu uweci i ie. Eno tie kakare mi nyutho genogen mwa kamaleng’.​—Juebrania 10:23.

Ibinwang’u Mugisa mi bedo ku yioyic ma tek i bang’ Mungu. Jakwenda Paulo uyero ni cokri acel mi rundi pare kumae: “Ava nenowu benega dit, . . . Kara an ku wun de wajukra i kumwu, ng’atuman kum yioic pa wadi man kum pa wadi, mu ku para de.” (Jurumi 1:11, 12) Nicokiri karacelo ku juyic wadwa kubang’ ceng’ ne, ketho yioyic mwa doko tek man teng’owa bende ni medirwa asu asu nikwo ayi kwo m’urombo ku cik pa Mungu.

Pirang’o ngo ikeicidhi nidikiri i coko mi cokri mwa mi nindo m’ubino kara in giri ikeinen ku weng’i giri lembe nini ceke? Jubijoli kud amora. Coko mwa ceke utie mi mananu, jukwayu ngo nia ibol thier.

• Coko mwa mi cokri lubo lapor makani?

• Bero makani ma wacopo nwang’u wan giwa ka wacokra i coko mi Jumulembe pa Yehova?

Kadok ukwayu nia wakadh kud i lum, i thoi, i koth, i ng’ico kunoke i ceng’ m’urieny hai, wacokra i coko mwa mi Jukristo kubang’ nindo ne. Kadok gikwo i can kunoke giol ing’ei timo tic migi ma kubang’ ceng’, pirang’o Jumulembe pa Yehova gibed gi ii nicokiri karacelo ku juyic wagi?

Dikiri karacelo konyowa nibedo ma ber i kwiocwiny i kindwa. Jakwenda Paulo uyero pi dhanu ceke ma wadikra kugi karacelo i cokri mwa nia ng’atuman iye pidi pi wadi. (Juebrania 10:24) Thelembe mi wec maeno utie nia “wadieng’ cuu mandha,” niwacu ukwayu ni ng’eyo ng’atuman i kind umego ku nyimego mwa. Pieno, wec pa Jakwenda Paulo eno ubeketho cwinywa nia wabed wadieng’ pi jumange. Ka wabetimo kero ning’eyo juruot mange mi Jukristo wadwa, wabinwang’u nia jumoko i kindgi ubenyego ku peko m’urombo ku mwa man gibevoyo peko ne man nia gicopo konyowa ninyego bende ku peko mwa.

Dikiri karacelo konyowa nibedo ku ribri ma beco i kindwa. I coko mwa, wadikra karacelo ku dhanu ma wang’eira kugi kende kende ngo ento ku dhanu ma gitie bende jurimbwa mandha. Saa mange warombo karacelo pi ninambu kunoke nibedo i foyo. Wanwang’u bero ma kani ka wadikra karacelo kumeno? Ekonyowa nineno umego mwa ni dhanu ma pigi tek i kwo mwa man nimedo kero i mer mwa. Pieno, kan umego mwa ginwang’iri ku peko, watie ayika pi nikonyogi kum gitie jurimo mwa mandhandha. (Lembrieko 17:17) Ka wabedikra karacelo ku dhanu ceke mi cokri mwa, wanyutho nia “wabekungra [wabegwokra] i kindwa ng’atuman ku wadi.”​—1 Jukorinto 12:25, 26.

Wabeketho cwinyi nia ing’ii dhanu m’ubetimo yeny pa Mungu re m’ubed jurimoni. Ibinwang’u jurimo ma kumeno i kind Jumulembe pa Yehova. Kacopre, wakwayu nia kud iwek gin moko uceri nidikiri karacelo kudwa.

• Pirang’o dikiri karacelo i coko mi Jumulembe pa Yehova tie pi bero mwa giwa?

• Icopo maru ibin i coko mwa awene kara ing’ei cokri mwa?

Coko mi Jukristo mi rundi ma kwong’a ubed uketho i ie kende kende wer, rwo, man nisomo ku nimio paru ma tung’ tung’ iwi giragora ma juai jusomo. M’uweko maeno, lembe mange mbe ma jubed juketho i coko ne. (1 Jukorinto 14:26) Wan de watimo kumeno i coko mwa ceke.

Ponji mwa cungo iwi Biblia man konyowa i kwo mwa ma nja. Ceng’ soko kunoke ceng’ yenga, cokriman dikiri karacelo pi niwinjo Ponji m’ucungo iwi Biblia (Discours biblique) pi dakika 30, wec maeno nyutho iwa kite ma giragora mi Biblia copo konyowa i kwo mwa man kara wanyang’ cu nia wakwo i nindo manedi. Ka ng’atu m’ubeponjo ulwong’o giragora moko, wan ceke walubo i Biblia mwa giwa. Ing’ei ponji maeno, walubo Ponji mi “Ot Kur ma Wiw” (étude de la Tour de Garde) pi saa acel, ma waweco iwi lembe ma nwang’ere i Ot Kur ma Wiw mi ponji man ng’atuman copo culo wang’ penji kunoke nikoro wec. Ponji ne konyowa ning’eyo kite ma wacopo tio kudo ku telowic mi Biblia i kwo mwa. Juponjo lembe ma rom i cokriman i kind cokri mwa ma tung’ tung’ ma kadhu 110 000 iwi ng’om zoo.

Coko eno konyowa niyiko bodho mwa mi ponji ubed maber mandha. Wabed wacokara bende nindo acel ikind yenga saa mi reto kunoke uthieno, pi coko acel ma nyinge tie, Kwo man tic mwa mi Jukristu. Cokone tie ku thenge adek, man lembe mi ie nwang’ere i Buku mi coko mi kwo man tic mwa mi Jukristu, ma kubang’ dwi. Thenge mi kwong’o mi cokone tie, Lonyo ma nwang’ere i Lembe pa Mungu. Thenge maeno konyowa ninyang’ cuu i theng giragora moko mi Biblia ma walar wasomo iwang’e pi yenga zoo. Thenge m’ulubo mi coko maeno tie, Miiri zoo I tic mi rweyo lembanyong’a. Thenge maeno tie ku lanyuth matung’ tung’ iwi kite ma jucopo weco ko ku dhanu mange iwi lembe mi Biblia. Jamii juk mio juk moko iwi lanyuth maeno, pi nikonyowa wayik bodho mwa mi somo piny man mi weco. (1 Timoteo 4:13) Thenge ma tokcen mi cokone tie, Kwo mi Jukristu. I thenge maeno, wabed waponjo kite ma wacopo tio ko ku cik mir ukungu mi Biblia i kwo mwa ma kubang’ ceng’. Thengene tie ku penji man dwokowang’gi, pi nikonyowa wanyang’ ma thuth i Biblia.

Ceng’ ma ibicidho i coko mwa, m’umbe jiji ibifoyo lee dit akeca kud ayi ponjiri mi Biblia ma ibinwang’u kuca.​—Isaya 54:13.

• Ponji mi Jumulembe pa Yehova kadhu nenedi?

• I kind ponji mwa zoo, icopo maru ku kwong’a ilar ibin i makani?

Nyongo idaru neno i cal ma tung’ tung’ i nyathibuku maeni kite ma Jumulembe pa Yehova gikendri kudo maleng’ man ku woro pi nicidho i coko mi cokri migi? Pirang’o wa Jumulembe pa Yehova wadieng’ akeca pi kite mi kendi man mi rukri mwa?

Pi ninyutho woro ni Mungu mwa. Wang’eyo nia Mungu neno ngo kende kende ayi ma yowoko. (1 Samwil 16:7) Ento, ka wabecokra pi niwore, mito mwa utie nia wanyuth woro ire man ni umego ku nyimego mwa. Ku lapor, ka jukwayu nia wacidh wacungi iwang’ Rwoth kunoke jadwong’ ng’om (Président), wacopo kendo man nirukra i kite ma mio ire woro pi dito pare. Romrom, kite mwa mi kendri kuno ke mi rukri kinde ma wabecokra i coko nyutho woro madit ni Yehova Mungu, “ubimo ma rondo ku rondo.” Bende kendi ku rukri mwa nyutho nia waworo kakare mwa mi timo thier ni Yehova.​—1 Timoteo 1:17.

Pi ninyutho nia wakwo ni makre ku cik mir ukungu mi Biblia. Biblia ketho cwiny Jukristo ni kendo i ayi m’ukwaire ma cu man nibedo nger calu dhanu “m’ulworo Mungu.” (1 Timoteo 2:9, 10) Nikendo i ayi m’ukwaire ma cu thelembe ne tie koc cen ikum kendi ma copo telo nen mi dhanu i kumwa, kendi ma copo cwalujo i awanya marac kunoke ma nyutho lembe moko marac i kumwa. Bende ni bedo ku paru ma nger copo konyowa ni ng’iyo bongu ma beco, niwacu bongu ma nya kumeno kumeno ngo kadok ma wel ng’iew ne lee akeca de ngo. Cik maeno mir ukungu ma wabelubo weko iwa kakare mi timo ng’iong’ic mwa giwa iwi kendi man rukri mwa. Kadok, wayero ngo wec acel de, ka wakendo kunoke warukra maleng’, wacopo “ruko lemponji pa Mungu na jalarmwa” man wacopo “yungo Mungu.” (Tito 2:10; 1 Petro 2:12) Pieno, ka wakendra maleng’ ku woro pi coko mwa, wacopo telo nen mi dhanu mange ikum thier pa Yehova.

Ento, kudiwek ayi kendi peri uceri ku cidho i coko i Ot Ker. Utie ngo nia bongu mwa ukwayu ubed ma wel ng’iew ne tek kwa kara ebed cu, maleng’ man ma jucopo wok kudo i wang’ dhanu.

• Kendi mwa pire tie tek rokani ka wabecidho ni timo thier ni Mungu?

• Cik makani mir ukungu ma telo wiwa i kum kendri kunoke rukri mwa?

Kan icikuponjo Biblia ku Jamulembe acel pa Yehova, ecicopre nia nyongo ibed ilar iyaru i lembe ma wubiponjo ne i wang’e. Bende, kara inwang’ bero lee, eber nia ibed ilar iyik coko iwang’e. Ibinwang’u matoke maber akeca kan iketho yiko coko ubed iri ni lembe ma nja.

Ng’i saa man kakare ma ibibedo i ie pi niponjo piny. Iparu nia saa makani ma icopo bedo i ie m’umbe gin m’acopo wingo wii? Nyongo con kugweno iwang’ caku tic peri, kunoke nyo uthieno nang’u dong’ awiya udaru nivuto? Kadok ibiponjiri pi saa na nyanok de, ke lar ing’i nia ibitimo saa adi man tim copo peri ceke ma kara lembe moko kud uceri. Nwang’ kakare ma woi umbe i ie, man wodh piny ceke ma copo langu wii. Pieno, neg radio, tevizio, man telefon. Nirwo iwang’ caku ponjo bikonyi kara wi wil kud adieng’acwiny ma tung’ tung’ mi kwo ma kubang’ nindo wek kara wii ucungi i kum lembe pa Mungu.​—Jufilipi 4:6, 7.

Keth ayi kunoke ried the paru ma dongo kara idwok wang’ penji i coko. Kukwonga, kesai ninyang’ i adundo i paru ma dongo dongo mi ponji ne. Nen kite ma thiwiwec ma thindothindo ucwaku kudo thiwiwec ma dit, bende nen cu cal acel acel man penji mi poyowic m’uketho peko iwi thiwiwec. Yokung’eye, som udukuwec (paragraphe) acel acel nang’u ibesayu dwokowang penji ma jugoro. Sai man som giragora ma jumio man par cu i wigi nia giragora eno ceke ucwaku nenedi wec ma dit. (Tic mi Jukwenda 17:11) Kan inwang’u dwokowang’ penji, keth ayi kunoke ried the wec ma pigitek kunoke wec ne zoo kara ukonyi ipoi iwiye. Ing’eye, saa ma ini i coko, kan imaru, icopo ting’o cingi pi nidwoko wang’ penji m’umbe nisomo asoma.

Kan ibed ilar iyiko lembe ma tung’ tung’ ma jubiweco iwiye kubang’ yenga i coko, ibimedo paru ma nyen lee i “kakan piny ma pigi thek” peri mi ng’eyong’ec mi Biblia.​—Matayo 13:51, 52.

• Icopo nibedo ku ng’io ma kani mi yiko coko?

• Icopo yikiri nenedi in giri kara iweci i coko?

Niai rundi ma con, Yehova mito juruotman ubed ku kakare mibedo karacelo pi ketho tenge migi mi tipo ubed tek man kara giketh ribri migi i ot ubed kago kago. (Poi mi Cik 6:6, 7) Pieno re m’uketho juruot mi Jumulembe pa Yehova gipangu nindo ku saa kubang’ yenga pi thier migi mi juruot ni Yehova. Saa maeno gibedo karacelo ma cwinygi kwio pi niweco iwi paru mi tipo m’urombo ku yeny mi ot migi. Kadok ikwo kendi kunoke in ikendi m’itie Jamulembe pa Yehova i ot mu, icopo pangu saa ma kumeno pi nicoro ceng’ni i vut Mungu nang’u ibeng’io i paru moko mi Biblia m’inyang’ ungo cu i ie.

Thier mi juruot tie saa mi coro ceng’ni i vut Mungu. ‘Cor ceng’i i vut Mungu, man ebicoro ceng’ni i vuti.’ (Yakobo 4:8) Watundo ni ng’eyo Yehova cu nang’u wabeponjo lembe iwi kite kunoke kura pare man iwi tic pare nikadhu kud i Biblia. Ayi ma yot mi caku thier mi juruot tie ni bedo ku saa pi nisomo Biblia karacelo ku dwal ma tek. Wucopo lubo program ma kubang’ yenga, mi coko mi kwo man tic mwa mi Jukristu. Ng’atuman copo nwang’u thenge ma ebisomo, man ing’eye wun ceke wucopo weco iwi lembe ma nyen m’unwang’u.

Thier mi juruot tie saa ma kara juruot ceke ubed ku ribri ma ceng’ni ceng’ni i kindgi. Kind nico ku dhaku, junyodo kud awiya, bedo ceng’ni ceng’ni ka gibeponjo Biblia karacelo i ot migi. Saa mi thier mi juruot ucikere ni bedo saa mir anyong’a, mir akwiyacwiny, saa ma ng’atuman i ot kuro kud ava. Junyodo copo ng’io lembe ma gibiweco iwiye pi konyogi i ot migi ni makere ku oro mir awiya migi. Gicopo tiyo ku paru ma nwang’ere i gazeti Munara wa Mulinzi man Amuka! Kunoke ma nwang’ere i kusika mwa mir internet, jw.org. Wucopo weco iwi peko ma awiya mu nwang’iri kudo i somo man nikonyogi ku kite ma gicopo nyego ko kupeko maeno. Wucopo neno program mi televizio mi JW (tv.jw.org) man ing’eye, niweco i wie karacelo. Wucopo ponjo wer ma jubiwero i coko man nipangu bende kakare moko mir anyong’a man mi nambu karacelo ing’ei thier mi juruot mu.

Saa maeno ma wubebedo kudo i ot mu kubang’ yenga pi nitimo thier karacelo ni Yehova bikonyo juruot ceke ni nwang’u mutoro i ponjo lembe pa Mungu man ebipoko mugisa iwi kero ma wubetimo.​—Zaburi 1:1-3.

• Pirang’o wabed wapangu saa pi nitimo thier mi juruot?

• Junyodo copo timo ang’o kara saa mi thier mi juruot ubed saa mir anyong’a ni dhanu ceke mi ot?

Pirang’o dhanu maeni tie kud anyong’a kumeni i kindgi? Pilembe gibecokri i coko mwa acel ma dit i kind mange. Calu jutic pa Mungu mi rundi ma con, m’ubed ucokri wang’ adek kubang’ oro pi niwinjo ponji, wan bende wabed wakuro kud ava ma lee dit akeca coko mwa ma dongo dongo. (Poi mi Cik 16:16) Kubang’ oro, watie ku coko ma dongo dongo adek: coko ma dit mi twodri, pi bang’ acel acel wang’ario kubang’oro, man coko ma dit mir adhura pi bang’ adek. Bero ang’o ma wabed wanwang’u i coko ma dongo dongo eno?

Coko ma dongo dongo eno ketho mer mwa mir umego bedo tek. Calu Juisrael gibedo kud anyong’a niyungo Yehova “i kind cokri m’udikiri karacelo,” wan bende wafoyo ni timo thier ire karacelo i coko ma dongo dongo. (Zaburi 26:12; 111:1) Coko ma dongo dongo eno mio iwa kakare mi rombo karacelo man mi dikra ku jumulembe wadwa mi cokri mange kunoke mi ng’om mange. I saa mi dieceng’ wabedo kuyom, ng’atuman camu cam ma ebino kudo i kakare mi coko ma dit eno. Bedo karacelo kud umego i saa maeno konyowa kara mer mwa karacelo kugi umedre. (Tic mi Jukwenda 2:42) I coko mwa ma dongo dongo, wan giwa waneno ku wang’wa kite ma mer uribo kudo ‘dikri mwa mir umego i ng’om ngung’.’​—1 Petro 2:17.

Coko ma dongo dongo eno konyowa ni teng’ni i tipo. Kinde ma Juisrael gibed gicokri i coko ma dongo dongo, gibed ginwang’u bero lee kum “ginyang’ i kum lembe” ma jubed jusomo man jukoro thelembe ma jusomo ne. (Nehemia 8:8, 12) Wan bende, anyong’a negowa akeca ka wabenwang’u ponji i coko mwa ma dongo dongo. Lembe ceke ma juweco i wiye kubang’ ceng’, ucungo iwi ponji mi Biblia. Ni kadhu kud i lwobowec, wec matung’ tung’ m’ulubiri i kum thiwiwec ma dit acel, man bende lanyuth mi lembe m’utimere, waponjo kite mi timo yeny pa Mungu i kwo mwa. Wabed wanwang’u kethocwiny kinde ma wabewinjo kite ma juic wadwa gikoro kudo kite ma ginyego ku peko mi kajik ceng’ eni m’uketho yioyic migi i ariti. Tuko m’ucungo iwi Biblia (Drame) ma waneno i coko ma dongo dongo eno konyowa ninyang’ akeca iwi lembe ma wabed wasomo i Biblia man ponjowa ku gin m’umaku watim i kwo mwa. Bende i coko maeno ma dongo dongo, dhanu limo babutisi pi ninyutho nia githieriri ni Mungu pi nitimo yeny pare.

• Pirang’o coko ma dongo dongo tie iwa kakare maber mi bedo kud anyong’a?

• Bero ang’o ma wabed wanwang’u ka wabecokra i coko ma dongo dongo?

Nindo ma nanok kende iwang’ tho pare, Yesu ular uyero kumae: “Man lembanyong’a maeni mi Ker jubiyero ing’om ng’ung’ ni lembatuca ni thek ceke; ekajik bilund wok.” (Matayo 24:14) Ento nang’u tic maeno mi rweyo pi Ker ing’om zoo, copo timere nenedi? Nang’u jubelubo lapor ma Yesu uweko kinde ma ebino iwi ng’om.​—Luka 8:1.

Wa ii ninwang’u dhanu i pacu migi. Yesu uponjo julubne nirweyo lembanyong’a ot ku bang’ ot. (Matayo 10:11-13; Tic mi Jukwenda 5:42; 20:20) Jurwei-injili ma kwong’a eno, jugam jumio igi kabedo m’ukwayu girwei i ie. (Matayo 10:5, 6; 2 Jukorinto 10:13) Tin bende, tic mwa mi rweyo piker upangre maber man kubang’ cokri utie ku kabedo ma erweyo i ie. Eno konyowa ni woro cik pa Yesu ma nia “juyer ni dhanu man jutuc igi.”​—Tic mi Jukwenda 10:42.

Warweyo i kakare ceke ma dhanu copo nwang’ire i ie. Yesu weko iwa lapor mange. Ebed erweyo ni dhanu i kakare ma dhanu mwang’ire lee i ie calu ve i dhunam, kunoke idhu kulo m’atong’a. (Marko 4:1; Yohana 4:5-15) Wan bende, waweco ku dhanu iwi Biblia kakare ceke ma gicopo nwang’iri i ie, i dhu ndaki, kakare mi lwor, kakare ma jumaku ie mutukari kunoke pikipiki, kadok nikadhu kud i telefon. Bende, ka kakare nen, warweyo ni judhugola mwa, jurutic wadwa, awiya wadwa mi somo, man wat mwa. Calu wabed watio ku yo ceke mi rweyo lembanyong’a, dhanu lee dit i ng’om zoo gibewinjo ‘lembanyong’a mi both.’​—Zaburi 96:2.

Nyongo ing’eyo ng’atu moko ma icopo yero ire pi lembanyong’a mi Ker man pi bero ma ebinwang’u i nindo m’ubino? Kud ikan lembe mi genogen nini iri kendi. Yere ni jumange saa moko ci ma ineno nia eber nitimo kumeno!

• Lembanyong’a ma kani m’ukwayu jular juyer be?

• Jumulembe pa Yehova gilubo nenedi yore ma Yesu ubed utio kudo pi nirweyo lembanyong’a?

Wang’ mapol jutio ku wec ma jayab yo (painia) pi ninyutho ng’atu ma becidho ni lar neno wi ng’om moko man niyiko yo kara dhanu mange giwoth i ie. Wacopo yero nia Yesu ubino jayab yo pilembe juore i ng’om kara ebin etim tic mi thiero kwo man mi yabu ni dhanu mange yo mi nwang’u both. (Matayo 20:28). Tin julubne ubekwanyu ba tiende kum ni makre ku copo migi gitimo saa dupa pi ‘ketho dhanu dok julub.’ (Matayo 28:19, 20) Jumoko mi kindgi umaku tic pa jayab yo pi nilubo Yesu.

Jayab yo tie jarwei lembanyong’a mi saa ceke. Jumulembe pa Yehova ceke tie jurwei lembanyong’a. Ento, jumoko i kindgi umaku yub i kwo migi nibedo juyab yo ma nja; niwacu niberweyo pi saa 70 kubang’ dwi. Kara gipong’ wend saa maeno, dupa mi kindgi timo tic mi kum ma copo camu ngo saa migi kpo. Jumange ung’io migi nibedo juyab yo ma segi kara gibed gicidhi i kakare ma yeny mi jurwei lembanyong’a mi ker utie i ie; pieno, kubang’ dwi girweyo pi saa 130 kunoke nikadhu. Juyab yo foyo ni kwo ayi kwo ma yot, ma nang’u ke gitie ku genogen nia Yehova bipong’o yeny ma pire tek i kwo migi. (Matayo 6:31-33; 1 Timoteo 6:6-8) Ju ceke m’umbe ku copo mi bedo juyab yo ma nja kunoke ma segi gicopo timo calu Juyab yo ma jukony i nindo ma gimaru, pieno, gimedo tic migi mi rweyo lembanyong’a pi nitimo saa 30 kunoke 50 kubang’ dwi.

Maru Mungu man maru dhanu re ma cwalujo nibedo jayab yo. Calu Yesu, wan bende wabeneno kite ma dhanu utie kudo ku yeny mi kony mi tipo. (Marko 6:34) Ento watie ku ng’eyong’ec ma copo konyogi maber niai tin, ng’eyong’ec ma copo mio igi genogen ma tek mi kwo mi nindo m’ubino. Maru yor ibang’ dhanu mange re ma cwalu jayab yo nithiero ku bero cwiny saa pare man tego pare pi nikonyo jumange kara ging’ei Mungu. (Matayo 22:39; 1 Jutesaloniki 2:8) Ka jayab yo timo kumeno, yioyic pare doko tek, ebedo ceng’ni ceng’ni ku Mungu, man enwang’u anyong’a lee mandha i kwo pare.​—Tic mi Jukwenda 20:35.

• Jayab yo tie ng’a?

• Ang’o ma cwalu jurwei moko nibedo juyab yo ma nja kunoke ma segi?

Niai con, somo mi theokrasi tie lembe ma pire tek akeca i bang’ Jumulembe pa Yehova. Jucaku the somo masegi ni dhanu ceke m’uwodho saa migi ceke pi tic mi rweyo lembanyong’a mi Ker kara gicopo nitimo ‘tic migi kakare kakare.’​—2 Timoteo 4:5.

Somo mi tic mi juyab yo. Ka jayab yo ma nja udaru nitimo oro acel i tic pare ma eno mi saa ceke, jukiewo nyinge i somo mi juyab yo ma timo nindo abusiel ma ekadhu ke i Ot Ker ma bor ungo akeca ku kakare ma ebedo i ie. Thelembe mi somo eno tie nikonyo jayab yo eno kara ecor ceng’ni ku Yehova, enwang’ matoke maber akeca i ayi ceke mi tic mi rweyo lembanyong’a, man emedre asu nitimo tic maeno i atira.

Somo mi Jurwei-Injili mi ker. Somo maeni timo dwi ario, man etie pi niponjo juyab yo ma gidaru ning’iyo i tic ne man ma gimaru niweko pacu migi kara gicidh gitim tic ne kakare moko ci ma yeny utie i ie. Lembe maeno nyutho nia gibeyero kumae: “anuti eni ora!” nang’u ke gibelubo kudo lapor pa Yesu, ma etie jarwei injili madit m’usagu zo. (Isaya 6:8; Yohana 7:29) Kara ecidh nikwo bor ku pacu ma tugi ukwayu ebed ayika nikwo ayi kwo ma yot. Suru, lietho kuno ke ng’ico, cam mi kakare ma ebicikwo i ie copo koc ku ma eng’iyo kudo. Ecopo kwayere bende nia eponj dhok mange manyen. Somo maeni konyo umego ku nyimego ma gitie jumusuma man jum’ugamri ma oro migi ucaku niai 23 nitundo 65, kara giponj nibedo ku kite kunoke kura mi tipo ma bikonyogi kakare ma jubiorogi i ie man kara giponj bodho ma biketho Yehova man dilo pare uti kugi lee akeca.

Somo mi Biblia mi Watchtower mi Gilead. I dhok Juebrania, thelembe mi “Gilead” utie “udul tucolembe.” Niai ma ecaku i oro 1943, Gilead udaru niponjo dhanu ma kadhu 8 000 ma juorogi ke ni jumisioner pi nituco lembe ‘cil i kajik mi ng’om’ ma tic migi ne ke unwang’u matoke maber dit akeca. (Tic mi Jukwenda 13:47) Kulapor, kinde ma ju moko m’udaru somo maeno utundo i ng’om mi Peru, cokri kadok acel de ubino mbe kuca. Ento tin, wend cokri kadhu 1 000 kuca. Kinde ma jumisioner mwa ucaku nitimo tic i Japan, ng’ombe zoo ubino ku Jumulembe ma tundo ngo apar de. Ento tin wend cokri kadhu 200 000. Somo maeno ma timo dwi abic uketho i ie ponjo Lembe pa Mungu kilili mandha. Dhanu ma jucopo lwong’o kara gicidh gilub somo maeni tie ju ma gitimo kawoni calu juyab yo ma segi kunoke jumisioner ma fodi ulubo ngo somo ma eno, ju m’utimo tic i biro mi filial kunoke i Bethel, jum’utie juliew ma wotho awotha, kara gicidh gimed wi ponji ma gitie kudo, wek kara gikony tic pa Mungu ucungi maleng’ man ubed ku kero i ie i ng’om zoo.

• Thelembe mi Somo mi juyab yo utie ang’o?

• Jukani ma copo lubo somo mi jurwei Injili mi Ker?