Lembanyong’a Makani m’Utie pi Dini?

1. Nyongo dini ceke tie ber?

M’umbe jiji, i dini ceke junwang’u dhanu ma beco. Etie lembe mir anyong’a ni ng’eyo nia Mungu neno dhanu maeno man edieng’ pigi. Ento, lembe ma rac utie nia, niai con, ng’atu ma rac (jok) utio ku jukusoma pi nitimo lembe ma reco. (2 Jukorinto 4:3, 4; 11:13-15) Ni makre ku lembang’eya ma tung’ tung’, dini moko udaru nimondo i nek ma kukero, nek ma junego ko dhanu mi thek acel zoo, lwiny, man timo lembe ma rac i kum awiya. M’umbe jiji, lembe maeno mio can i juruyic ma beco.​—Som Matayo 24:3-5, 11, 12.

Dini mandha ubeyungo Mungu, ento mi ndra timo lembe ma foyo ie ngo. Dini mi ndra ponjo paru m’umbe i Biblia, calu ve ponji moko mi vupo iwi Mungu man iwi jum’utho. Ento Yehova ubetwong’o dhanu kara ging’ei lembe mandha i wiye.​—Som Ezekiel 18:4; 1 Timoteo 2:3-5.

2. Lembanyong’a makani m’utie pi dini?

Lembe ma ber utie nia, Mungu copo foyo ngo ku dini ceke m‘uloko nia gimare ma kun ke i andha gimaru migi ng’om pa Jok. (Yakobo 4:4) Lembe pa Mungu lwong’o dini ceke mi ndra “Babeli madit.” Babeli ubino adhura ma con, kakare ma dini mi ndra ugam ucaku i ie, ing’ei pi ma dit m’uumo ng’om i rundi pa Noa. Ceng’ni eni, Mungu binyotho mbwang’ dini ceke m’ubewondo man usendo dhanu.​—Som Lembanyutha 17:1, 2, 5, 16, 17; 18:8.

Lembanyong’a mange utie nia wi Mungu wil ungo ku dhanu m’atira ma ginwang’iri i dini ma tung’ tung’ i ng’om zoo. Ebediko dhu dhanu maeno, eponjogi ku lembe mandha.​—Som Mika 4:2, 5.

3. Umaku Dhanu m’utie ku cwiny ma ber utim ang’o?

Yehova dieng’ pi dhanu m’umaru lembe mandha man ma ber. Etwong’ogi nia giwok cen kud i dini mi ndra. Dhanu m’umaru Mungu gitie ayika nitimo alokaloka kara ginyai anyong’a ie.​—Som Lembanyutha 18:4.

I rundi mi jukwenda, kinde ma dhanu m’utie ku cwiny maber ugam uwinjo lembanyong’a ni ai kud i bang’ jukwenda, anyong’a ugam unegogi. Yehova uponjogi ku kite manyen mi kwo, kite mi nwang’u kwo mir anyong’a, m’utie ku thelembe man m‘utie ku genogen. Dhanu maeno uweko iwa lapor maber akeca kum gitio ku lembanyong’a ma giwinjo, niwacu giketho ku kwong’a Yehova i kwo migi.​—Som 1 Jutesaloniki 1:8, 9; 2:13.

Yehova ubejolo dhanu ceke m’ubewok kud i dini mi ndra man gibemondo i kind jum’ubewore i andha. Kan ijolo lwong’o maeno pa Yehova ma ku maru i ie, ibigam bedo jarimone, ibibedo acel mi kind umego ku nyimego ma nyen m’umariri, ma gibeworo Yehova man ibinwang’u kwo ma rondo ku rondo.​—Som Marko 10:29, 30; 2 Jukorinto 6:17, 18.

4. Mungu binyayu anyong’a nenedi i dhanu mi ng’om ceke?

Lembanyong’a mange utie nia pokolembe ubebino iwi dini mi ndra. Pokolembe maeno biwodho dhanu kud i masendi ma jubesendo kogi. Dini mi ndra biwondo ngo kendo kadok nikelo apokapoka i kind dhanu. Dhanu ceke ma bikwo bidikiri i acel pi niworo Mungu acel kende mandha.​—Som Lembanyutha 18:20, 21; 21:3, 4.