Wod nyamin Paulo ubedo ku tegocwiny

Wakeponj lembe moko iwi jalawobi m’ubodho kwo pa nerumire. Nerumirene ubino jakwenda Paulo. Wang’eyo ngo nying jalawobine, ento wang’eyo nia etimo lembe m’ukwayu tegocwiny lee. Nyo imaru iwinj lembe m’etimone?—

Paulo ubino i odkol, i Yerusalem. Jugam jutwiye pilembe ebino nirweyo lembanyong’a iwi Yesu. Dhanu moko ma cwinygi col gigam gidagu Paulo, pieno gipangu lembe marac ikume. Giyero kumae: ‘Wakwai jego ma dit nia eketh juaskari pare giter Paulo i wang’ pido. Wabipondo ing’et yo, e saa ma gibekadhu ku Paulo, wabinege!’

Wod nyamin Paulo uwinjo lembe maeno ma gipangu. Ebitimo ang’o kawoni? Ecidh eyero lembene ni Paulo i odkol. Wang’ acel, Paulo uyero ire nia enyuth pi lembene ni jego ma dit. Iparu nia ebino lembe mayot ni wod nyamin Paulo ninyutho lembene ni jego madit?— Ungo, pilembe jego madit ubino ng’atu moko ma pire tek dit akeca. Ento wod nyamin Paulo ubedo ku tegocwiny, e ecidh eweco ku jego madit.

Lembuno ukonyo jego madit ning’eyo gin m’ecopo timo. Eketho juaskari maromo 500 gigwok Paulo! Eyero igi nia giter Paulo i Kaisaria diewor nica. Nyo Paulo ugam uboth?— Eyo, dhanu ma cwinygi colne ginwang’u ngo kakare mi nege! Lembe ma gipangune ugam urombo ngo.

Uda maeno copo niponji nenedi?— In de icopo bedo ku tegocwiny calu wod nyamin Paulo. Wacikara nibedo ku tegocwiny kinde ma wabeyero pi Yehova ni dhanu. Nyo ibibedo ku tegocwiny man ibimediri niyero pi Yehova?— Kan itimo kumeno, icopo nibodho kwo pa dhanu moko.