Nyo ibed iwinjiri saa moko nia itie kendi man lworo benegi?

Kenen nyathin ma co ma nwang’ere i cal no. Etie kende man lworo benege, kumeno ngo? In de idaru niwinjiri saa moko kumeno?— Saa moko dhanu ceke bewinjiri kumeno. Biblia weco pi jurimo pa Yehova ma giwinjiri bende nia gibino kendgi man lworo bino negogi. Acel mi kindgi bino Eliya. Wakeponj lembe moko iwiye.

Eliya ukwo i ng’om mir Israel oro dupa iwang’ nyoliri pa Yesu. Ubimo mir Israel ma nyinge Ahab ubed uworo ngo Yehova, matie Mungu mandha. Ahab giku dhaku pare ma Yezebel, gibed giworo Baal, m’ubino mungu m’araga. Pieno dhanu mapol mir Israel gicaku bende niworo Baal. Yezebel ma dhaku p’ubimo bino kwiny lee man emito nia eneg dhanu ceke m’ubed uworo Yehova, uketho i ie bende Eliya! Ing’eyo gin m’Eliya timo?—

Eliya ringo! Eringo bor i langa man ecidh epondo i od cana. Iparu nia pirang’o eringo man epondo?— Eyo, pilembe lworo bino nege. Ento nwang’u Eliya cikere ngo nibedo lwor. Pirang’o? Pilembe eng’eyo nia Yehova copo konye. Iwang’e, Yehova ular unyutho tego pare ni Eliya. Nindo moko, Yehova udwoko wang’ rwo pare, eoro mac niai kud i polo. Pieno kawoni bende Yehova copo nikonyo Eliya!

Saa m’Eliya bino i od cana, Yehova weco ibang’e man epenje kumae: ‘Itimo ang’o keni?’ Eliya dwoko ire kumae: ‘An kenda m’adong’ ni jatic peri, man lworo benega kum jubinega.’ Eliya paru nia jurutic pa Yehova mange ceke gidaru nitho. Ento Yehova wacu ni Eliya kumae: ‘Kumeno ngo. Fodi dhanu 7 000 mange nuti m’ubewora asu. Cwinyi bed tek. Atie ku tic mange m’ukwayu itim!’ Iparu nia anyong’a nego Eliya niwinjo wec maeno?—

Lembe m’uwok ikum Eliya copo ponji nenedi?— Ukwayu ngo iwinjiri kendo nia itie kendi kunoke ibed ku lworo. Itie ku jurimo m’umaru Yehova man m’umeri. Bende, Yehova tie ku tego lee, man ebikonyi saa ceke! Nyo itie kud anyong’a ning’eyo nia kara itie ngo kendi?—