Yesu ung’io jukwenda pare apar ario

Kawoni oro acel ku nusu udaru kadhu niai ma Yohana ma Jababutisi unyutho nia Yesu utie nyathi rombo pa Mungu. Kinde ma Yesu ucaku tic pare, dhanu dupa m’adundegi leng’ gidoko julub pare, calu ve Andrea, Simon Petro, Yohana, copere (Yakobo m’umin Yohana) de, Filipo, man Bartolomayo (ma julwong’e bende Nathanael). Nok nok, dhanu mange bende dupa gilubo tok Kristu.​—Yohana 1:45-47.

Kawoni ubekwayu Yesu ung’ii jukwenda pare ma gibibedo kugi saa ceke, man ebitendogi i kite ma segi. Re iwang’ ning’iogi, Yesu uidho iwi got moko ma copo bedo ceng’ini ku nam mi Galilaya, man gotne bor ungo ku Kapernaum. Ecidh erwo diewor traka, copere ebino kwayu rieko man mugisa ibang’ Mungu. Urwonde elwong’o julub pare man eng’io ju 12 m’ikindgi gibed jukwenda.

Yesu ung’io ju abusiel ma jukwanu nying’gi maluno, man bende Matayo m’elwong’o ku kakar ajok. Ju abic mange m’eng’io nying’gi ni e: Yuda (ma julwong’e bende Thadayo ma tie “wod Yakobo”), Simon ma Jakananayo, Thoma, Yakobo ma wod Alfayo, man Yuda Iskariote.​—Matayo 10:2-4; Luka 6:16.

Julub 12 maeno gicaku wotho giku Yesugi iwang’e, pieno eng’eyogi maber mandha. Ju mapol m’ikindgi utie wat pare. Yakobo gikud umin ma Yohana gitie umaru pa Yesu. Bende, kan andha etie ve ma jumoko beparu, nia Alfayo ubino umin Yosefu ma tie won Yesu m’utunge, nwang’u jakwenda Yakobo ma tie wod Alfayo de utie umaru Yesu.

I andha, wi Yesu copo wil ungo ku nying’ jukwenda pare nyanok de. Nyo in de ing’eyogi? Kara ipoi ikum nying’gi yot yot, ng’ei lembe mae: ju ma nying’gi tie Simon gin ario, ju ma nying’gi tie Yakobo de gin ario, man ju ma nying’gi tie Yuda bende gin ario. Simon (Petro) utie kud umin ma nyinge Andrea, man Yakobo (ma wod Zebedayo) utie kud umin ma nyinge Yohana. Eno bikonyi ning’eyo nying’ jukwenda abora. Jumange ang’wen ke utie (Matayo) m’ubed ujoko ajok, (Thoma) ma nindo moko ubino ku jiji, (Nathanael) ma julwong’o kud i the yen, man umin ma nyinge (Filipo).

Jukwenda apar acel pa Yesu gitie dhanu ma thugi Yesu i Galilaya. Nathanael ke utie dhanu mi Kana. Filipo, Petro man Andrea gitie dhanu mi Bethsaida. Saa moko Petro gikud Andrea gidok gibedo i Kapernaum, kaka ma ve nia Matayo ubed ubedo i ie. Yakobo giku Yohana de gibedo i Kapernaum kunoke ceng’ini, man gibed gidwaru dwar bor ungo ku keca. Yuda Iskariote ma ing’eye udok ucibo Yesu kende re ma ve nia uai kud i Yahudi.