Yesu ucero nyathin pa dhaku ma cware utho

Nyanok ing’ei ma Yesu ukeyo kum jaratic pa jadit mir askari, eai kud i Kapernaum, ecidho i Nain ma nwang’ere yo piny, i kilometre ma kadhu 32. Ecidho ngo kende. Julubne man udul dhanu dupa bende gicidho i toke. Ecicopere nia kinde ma giwok ceng’ini ku mupaka mi Nain, nwang’u dong’ ceng’ ubemwony. E ewok erombo ku Juyahudi dupa gicokiri i tok avu pa jalawobi moko ma jubecikunyo woko mir adhura.

Ng’atu m’utie ku can magwei ikind dhanu maeno, utie min nyathin m’utho. Etie dhaku ma cware tho, man nyathin pare m’acel kulong’ de utho. Saa ma cware utho, ng’atu m’udong’ ire ubino nyathin maeno m’emaru lee. Kepar kite m’ecopo nimaru ko nyathin maeno. Egeno nia nyathin maeno re ma bikonye man bigwoke i can pare mi nindo m’ubino. Kawoni nyathin maeno de utho. Ebidong’ bedo ku ng’a, man ng’a ma bikonye?

Kinde ma Yesu uneno dhaku maeno, kisa unege i kume pi ywak m’eywagu man can m’etie ko. Yesu ujuko cwinye ku yo kumae: “Kud iywaki.” Re eno kende ngo. Ecoro bende ceng’ini, man emulo kum tara ma juyeyo ko avu. (Luka 7:13, 14) Kite pare ku timo pare utelo nen mi dhanu mir adhura m’ubino wi tho, man gicungo dri. ‘Pirang’o eyero lembuno, man ebecitimo ang’o?’ Dhanu dupa gibino nipenjiri kumeno.

Udul dhanu m’ulubo tok Yesu ma gigam gineno tic ma wang’u ijo m’etimo, ku remokum dupa m’ekeyo ke giwinjiri nenedi? Ecicopere nia fodi nwang’u gineno ngo ng’atu moko m’utho ma Yesu ucero. Re bor yang’con, jugam jucero ju moko m’utho, nyo Yesu de bitimo kumeca? (1 Ubimo 17:17-23; 2 Ubimo 4:32-37) Yesu ung’olo kumae: “Jalawobi, awacu iri, Ai malu.” (Luka 7:14) E lembe m’eyero utimere kumeca. Jalawobine ai malu, man ecaku niweco! E Yesu umie i cing’ min. I min uwang’ lii, man ebino ku mutoro madit. Dong’ ebibedo kende kendo ngo.

Kinde ma dhanu gineno nia andha jalawobi maeno ucer, gipaku Yehova ma Jamii kwo, giwacu kumae: “Jabila madit uwok i kindwa.” Dhanu mange ginyang’ i tic ma wang’u ijo ma Yesu utimo, uketho giwacu kumae: “Mungu liewo dhanu pare.” (Luka 7:16) Rwonglembe maeno ma wang’u ijo, uyik tir cil i ng’om mange, ve nitundo i Nazareti, adhura pagi Yesu, ma niai Nain utie kilometre 10. Lembe maeno uloro nitundo cil i Yahudi bende.

Nwang’u fodi Yohana ma Jababutisi utie asu i otkol, man anyong’a ubino ninege ikum tic ma wang’u ijo ma Yesu ubino nitimo. Julub pare gikoro ire pir udu ma Yesu utimo. Eyero ang’o?