Kite ma lembe upangere ko i cokiri man kite ma jubetelo ko wie

I WARAGA ma kwong’a ma jakwenda Paulo ugoro ni Jukorinto, enyutho lemandha moko ma pire tek iwi Mungu. Ekiewo kumae: ‘Mungu en e Mungu mi yakini ngo, endre mi kwiocwiny.’ I ng’eye, emedo lembe mange iwi coko ma tung’ tung’ mi Jukristu; eyero kumae: ‘Wek jutim gin ceke cuu kakare bende.’​—1 Kor. 14:33, 40.

² I acaki mi waraga pare ma rom eno, egam emio juk ni umego mi cokiri mi Korinto pi teliri m’ubino i kindgi. Paulo ukwayugi nia ‘giwec lembe ma calacel’ man ‘gibed ma giribiri karacelo ku pidoic ma calacel man ku lembapoka ma calacel.’ (1 Kor. 1:10, 11) I ng’eye, edok emio juk iwi lembe ma tung’ tung’ m’ubino nyotho bedo i acel mi cokiri. Pieno, etio ku lapor mi watkum pi ninyutho nia ubekwayu nibedo i acel man nidiko cingjo adika. Ekwayu dhanu ceke mi cokiri mi Jukristu nia nimakere ku tic migi, ng’atuman udieng’ ku wadi ku mer. (1 Kor. 12:12-26) Kara winjiri ubed ma ber kumeno i kind umego ku nyimego, ubekwayu lembe upangere cuu i cokiri.

³ Dong’, lembe ucikere nipangere i ayi ma nenedi i cokiri mi Jukristu? Ng’a m’ucikere nipangu lembene? Ecikere nilubo kit pangulembe ma kani? Jukani ma gicikiri nibedo ku rwom? Wacopo nwang’u dwokowang’ penji maeno ceke ka waweko Biblia re m’utel wiwa.​—1 Kor. 4:6.

TELOWIC MI COKIRI UTIE I AYI MI THEOKRASI

⁴ The cokiri mi Jukristu ucaku i Pentekoste mi oro 33 R.M. Ponji ma kani ma wacopo nwang’u iwi cokiri mi Jukristu mi rundi ma kwong’a? Pangu lembe mi ie man telowicne ubino i ayi mi theokrasi, niwacu i the bimobim (ku dhu Jugiriki, kratos) pa Mungu (theos). Wec ario maeno nwang’ere i gor ma con mi dhok mi Jugiriki i 1 Petro 5:10, 11. Lembe m’ugam utimere i Yerusalem oro kago 2 000 kawoni, unyutho kamaleng’ nia Mungu re m’ucaku the cokiri mi Jukristu ma juwiro ku tipo. (Tic. 2:1-47) Cokirine ubino giragoma, niwacu juot pa Mungu en gire. (1 Kor. 3:9; Ef. 2:19) Cokiri mi rundi ma tin ubelubo kite ma lembe ugam upangere ko man ubed uwotho ko i cokiri mi Jukristu mi rundi ma kwong’a.

⁵ Cokiri ma kwong’a mi Jukristu ucaku ku julub 120 kumeni. Tipo maleng’ ugam ukonjere iwi ju ma kwong’a maeno, man upong’o lembila pa Yoel 2:28, 29. (Tic. 2:16-18) Bende i nindo ma rom eno, dhanu mange ma romo 3 000 gigam gilimo batizo i pii man gimondo i cokiri mi Jukristu ma juwiro ku tipo. Gijolo lembe ma jurweyo igi iwi Kristu man gimediri ‘nibedo i ponji mi jukwenda.’ I ng’eye, ‘[Yehova] uwotho medo ju m’ubeboth ku ba rupiny ku ba rupiny.’​—Tic. 2:41, 42, 47.

⁶ Kite ma cokiri mi Jukristu ubino nimedere ko ugam unen kamaleng’, uketho jalam ma dit mi Juyahudi uywagere nia julub giromo Yerusalem zoo ku ponji migi. I ng’eye, julam dupa mi Juyahudi gituc bende nidoko julub ma nyen i cokiri mi Yerusalem.​—Tic. 5:27, 28; 6:7.

⁷ Yesu uyero kumae: “Wubibedo jumulembe para i Yerusalem, man i Yahudi ngung’ ku Samaria de, man cil i tung’ ng’om bende.” (Tic. 1:8) Lembuno utimere kumeno; kinde ma ragedo ma dit ugam umoc i kum julub i ng’ei tho pa Stefano, julub m’ubino i Yerusalem gigam gilal nge nge i Yahudi kud i Samaria. Ento kaka ceke ma giringo i ie, gimediri asu nirweyo lembanyong’a man niketho dhanu dupa gidok julub, kadok jumoko m’i kind Jusamaria de. (Tic. 8:1-13) Asu yor i ng’eye, julub gimediri nirweyo lembanyong’a i kind dhanu ma jutimo ngo yaa i kumgi, niwacu dhanu mi thek mange ma gitie ngo Juyahudi. (Tic. 10:1-48) Tic maeno zoo mi rweyo lembanyong’a ukonyo pi niketho dhanu dupa gidok julub man nicaku the cokiri ma nyen i kabedo mange m’uweko Yerusalem.​—Tic. 11:19-21; 14:21-23.

⁸ Yub ma kani m’ugam umakere kara i cokiri ceke ma nyen maeno lembe upangere ma ber man telowicne de ubed i the bimobim pa Mungu, niwacu i ayi mi theokrasi? Nikadhu i tipo maleng’ pa Mungu, jugam juketho jukwac kunoke judong cokiri pi nigwoko udul rombe. Ku lapor, i woth migi ma kwong’a mi misioner, Paulo giku Barnaba, giwok giketho judong cokiri i cokiri ma tung’ tung’ ma giliewo. (Tic. 14:23) Luka ukiewo kite ma Paulo utimo ko coko moko karacelo ku judong cokiri mir Efeso. Paulo uyero igi kumae: “Wubed ku weng’wu i kumwu giwu man i kum udul ceke ma tipo maleng’ uketho wudoko juliew i ie, kara wukwai cokiri pa Mungu m’eng’iewo ku rimb Wode gire.” (Tic. 20:17, 28, NWT) Umego maeno giromo ya gidok judong cokiri pilembe gipong’o lembe ma Biblia ubekwayu i bang’gi. (1 Tim. 3:1-7) Tito m’ubino ng’atu acel ma gibed gitimo tic karacelo ku Paulo unwang’u twero mi ng’io umego pi nidoko judong cokiri i Krete.​—Tit. 1:5.

⁹ Calu ma wend cokiri ubino medere, jukwenda karacelo ku judongo mi Yerusalem re ma gimediri nibedo jutela ma kwong’a pi cokiri ceke mi Jukristu mi rundi ma kwong’a i ng’om ma tung’ tung’. Gin re ma gibino i guriri m’utelowic.

¹⁰ I waraga ma jakwenda Paulo ugoro ni cokiri mir Efeso, enyutho nia ka cokiri mi Jukristu ubewotho nimakere ku tipo pa Mungu man ubelubo telowic pa Yesu Kristu, ecopo medere nibedo i acel. Jakwenda Paulo ukwayu Jukristu nia gibed ku jwigiri man gimediri nibedo i ‘acel i tipo,’ ku kwiocwiny karacelo ku dhanu ceke mi cokiri. (Ef. 4:1-6) I ng’eye, eweco iwi lembe ma nwang’ere i Zaburi 68:18 man enyutho nia wec maeno utie pi dhanu ma co ma giteng’ini i tipo, ma Yehova ung’io gibed jukwenda, jubila, jurwei, jukwac man juponji pi nipong’o yeny mi cokiri. Jumaco maeno gitie giramia m’uai i bang’ Yehova pi nigiero cokiri ceke kara giteng’ini i tipo man ginyai anyong’a i Mungu.​—Ef. 4:7-16.

COKIRI MA TIN UBELUBO LAPOR MA JUKWENDA GIWEKO

¹¹ Tin bende, cokiri ceke mi Jumulembe pa Yehova ubelubo lapor mi cokiri mi rundi ma kwong’a. Gin ceke gitie i acel i ng’om zoo man gigomiri zoo i kum Jukristu ma juwiro ku tipo. (Zek. 8:23) Yesu Kristu re m’ubetelo wi lembe maeno. Calu m’elar eng’olo, ebemedere nibedo saa ceke ku julub pare ma juwiro ku tipo “cil i kajik mi ng’om.” Dhanu ma gibemondo i cokiri maeni m’ubemedere ameda, gibejolo lembanyong’a pa Mungu, gibethiero kwo migi zoo ni Yehova, man gibelimo batizo pi nidoko julub pa Yesu. (Mat. 28:19, 20; Mk. 1:14; Tic. 2:41) Ging’eyo nia Yesu Kristu utie “jakwac ma ber,” man etie Wic mir udul rombe zoo, m’uketho i ie Jukristu ma juwiro ku tipo man bende ‘rombe mange.’ (Yoh. 10:14, 16; Ef. 1:22, 23) Gin zoo gitie “udul acel” man gibemediri nibedo i acel pilembe ging’eyo nia jatelwic migi tie Kristu, man gibejwigiri niworo ‘jamiru mandha man ma riek’ ma tie yo ma Kristu ubetio ko pi nitelo wi dilo. Ubekwayu dong’ wamedara nigeno man niworo jamiru maeno ku cwinywa zoo.​—Mat. 24:45.

BERO MI BEDO KU DIKIRI MA CIK UNG’EYO PIRE

¹² Kara cam mi tipo uwok i saane man kara jurwei lembanyong’a mi Ker i ng’om zoo i wang’ ajiki, jutuc niketho dikiri moko i ng’om ma tung’ tung’. Dikiri maeno zoo, cik mi ng’om ma tung’ tung’ ma ginwang’iri i ie ung’eyo pigi man gibetimo tic i acel i kindgi. Gibekonyo kara tic mi lembanyong’a utimere i wang’ ng’om zoo.

KITE MA LEMBE UPANGERE KO I FILIAL (BETHEL)

¹³ Kaka ceke ma biro mi filial utie i ie, juketho umego adek kunoke nikadhu i Komite mi filial, pi nineno wi tic i ng’omne kunoke i ng’om mange ma tie i the loc mi filialne. Umego acel m’i kindgi timo calu janen wi tic mi Komite mi filial.

¹⁴ Cokiri ceke ma filialman ubeneno wigi, jupokogi i twodiri ma tung’ tung’. Twodiri maeno gitie ngo rom rom; dit migi ubed ukoc nimakere ku kabedo ma ginwang’iri i ie, nimakere ku dhok, man wend cokiri ma filial ubeneno wigi. Juketho jaliew mi twodiri pi nineno wi cokiri ceke mi twodiri acel acel. Biro mi filial bemio telowic ni juliew mi twodiri pi tic migi.

¹⁵ Cokiri ceke ung’eyo yub m’utie i dilo pa Yehova, kum yub maeno utie pi bero migi ceke. Gidiko cing’gi ku judong cokiri ma juketho pi nibetelo wi filial, wi twodiri man wi cokiri ma tung’ tung’. Gikuro kende kende jamiru mandha man ma riek re m’umii igi cam i saane. Jamiru mandha ke lund lubo kilili telowic pa Kristu, eworo cik mir ukungu mi Biblia man eweko tipo maleng’ re m’utel wie. Tekene wan ceke wabetimo tic i acel, wanwang’u kit cegonying’ ma rom ku mi Jukristu mi rundi ma kwong’a, Biblia uyero kumae: ‘Ka kumeno cokiri udoko tek i yioyic, man giwotho mediri ku ba rupiny.’​—Tic. 16:5.