1-3. Dhanu gibed gipenjo penji makani ka dhanu tho, man dini moko dwoko wang’ penji maeno nenedi?

BIBLIA ung’olo nia nindo moko, “tho bibedo nuti kendo ngo.” (Lembanyutha 21:4) I Wic mir 5, waponjo nia nikum jamgony, ecopere iwa ninwang’u kwo ma rondo ku rondo. Ento pi kawoni, fodi dhanu ubetho asu. (Eklizia 9:5) Pieno, wabed wapenjara ku penji dupa ma dongo dongo calu ve, ka watho, wadoko nenedi?

² Wabed wapenjo penji maeno, akecane ka ng’atu moko ma wamaru utho. Wacopo nipenjara kumae: ‘Ecidho kani? Nyo ebeneno wiwa dee? Nyo ecopo nikonyowa? Nyo wabinene kendo?’

³ Dini ma tung’ tung’ gibed gidwoko wang’ penji maeno i ayi de ma tung’ tung’. Dini moko ponjo nia kan itie ng’atu m’atira, icidho i polo ing’ei tho peri, kan itie ng’atu marac ke, icidh iwang’ i mac ma kuthum. Dini mange yero nia ing’ei tho peri, idoko ni tipo man icaku nikwo karacelo ku jupewu ma gidaru nitho. Dini mange ke yero nia kan itho, jupoko lembe i wii, e ing’eye, idok inyoliri kendo, kunoke idok ikwo kendo, re ku kum mange. Ku lapor, giyero nia idok inyoliri ni dhanu kendo kunoke ni lei.

4. Dini ma tung’ tung’ gitie ku ponji acel makani mir ukungu pi tho?

⁴ Icopo geno nia dini maeno ceke giponjo lembe m’ukoc i kindgi. Ento i andha, ponji migi ceke ucungo iwi ukungulembe acel. Giponjo nia ka ng’atini utho, piny moko tie i kume ma medere asu nikwo. Nyo eno tie lemandha?

KA WATHO WACIDHO KANI?

5, 6. Ka watho wadoko nenedi?

⁵ Yehova ung’eyo kite ma wadoko ko ka watho, pieno ewacu iwa nia ka ng’atini utho, kwo pare jik. Tho utie jadhu kwo. Pieno, ka ng’atu moko tho, mutoro kunoke can man paru pare medere ngo nikwo kaka moko mange.a Ka watho, wacopo neno piny ungo, wacopo winjo ngo lembe, man wacopo paru de ngo kendo.

⁶ Ubimo Suleman ukiewo nia “ju m’utho ging’eyo gin moko ngo.” Ju m’utho gicopo ngo nimaru kunoke nidagu ng’atini, man “tic moko mbe, kadi bodho, kadi ng’eyong’ec, kadi rieko, i liel.” (Som Eklizia 9:5, 6, 10.) M’umedo maeno, i Zaburi 146:4, Biblia yero iwa nia ka ng’atini utho, “pidoic pare” tho.

LEMBE MA YESU UYERO PI THO

7. Yesu uyero ang’o pi tho?

⁷ Kinde ma Lazaru ma jarimb Yesu utho, Yesu uyero ni julubne kumae: ‘Jarimbwa Lazaru nindo.’ Re, Yesu ubino yero ngo nia Lazaru ubeyom ayoma. Ing’eye, Yesu udok uyero kumae: ‘Lazaru tho.’ (Yohana 11:11-14) Pieno, Yesu uporo tho ku nindo. Eyero ngo nia Lazaru ubino i polo kunoke nia ebino karacelo ku jupagi m’ular utho i wang’e. Bende, eyero ngo nia Lazaru ubino nisendere i mac ma kuthum kunoke nia enyolere kendo ni dhanu mange kunoke ni lei. Ubino ve Lazaru unindo nindo ma pek. Giragora mange bende uporo tho ku nindo ma pek. Saa ma junego Stefano, Biblia uyero nia “Enindo.” (Tic mi Jukwenda 7:60) Jakwenda Paulo bende ukiewo pi Jukristu moko ma gigam githo nia, “Ginindo.”​—1 Jukorinto 15:6.

8. Wang’eyo nenedi nia Mungu ucwio ngo dhanu kara githo?

⁸ Nyo Mungu ucwio Adamu giku Eva kara nindo moko gibin githo? Ungo! Yehova ucwiogi kara gikwo kud anyong’a man ku leng’kum maber rondo ku rondo. Kinde ma Yehova ucwio dhanu, emio igi ava mi kwo nja ku nja. (Eklizia 3:11) Junyodo moko mbe ma maru nia awiya migi gitii man githo, Yehova de udagu ka wabetii man wabetho. Dong’ ka Mungu ucwiowa kara wakwo rondo ku rondo, pirang’o ke wabetho?

PIRANG’O WABETHO?

9. Pirang’o cik ma Yehova umio ni Adamu giku Eva ubino tek ungo?

⁹ Yehova uyero ni Adamu i podho mir Eden kumae: “Ku ba yen ceke m’i podho icopo camu kume moko calu iyenyo. Ento yen mi ng’eyong’ec mi gin maber ku gin marac, kud icam nyinge moko: kum i ceng’ m’ibicamu nyinge moko ci ibitho andha.” (Thangambere 2:9, 16, 17) Ebino tek ungo niworo cik maeno m’ubino terere, man Yehova re m’ubino ku twero mi nyutho ni Adamu giku Eva, gin maber ku gin marac. Ka nwang’u giworo cik maeno pa Yehova, nwang’u gibecinyutho nia giworo dito pare. Nwang’u gibecinyutho bende foyofoc migi ire pi gin ceke m’egam emio igi.

10, 11. (a) Sitani uwondo Adamu giku Eva nenedi? (b) Pirang’o kisa copo timere ngo ni Adamu giku Eva pi lembe ma gitimo?

¹⁰ Lembe mi can utie nia, Adamu giku Eva ging’io migi nituro cik pa Yehova. Sitani upenjo Eva kumae: “Meno te Mungu wacu kumae, kud wucam kum nying’ yen ceke m’i podho?” Eva udwoko ire kumae: “Kum nying’ yen m’i podho wacopo camu: ento kum nying’ yen ma ni i die podho, Mungu wacu kumae, kud wucam kume moko, kadok amula de kud wumul kume, wumaru tho.”​—Thangambere 3:1-3.

¹¹ Sitani udok uwacu ni Eva kumae: “Wubitho andha ngo: kum Mungu ng’eyo nia i ceng’ ma wucamu kume moko, e weng’wu biyabre, man wubibedo calu Mungu, ma wung’eyo ko gin maber ku gin ma rac.” (Thangambere 3:4-6) Sitani umito Eva upar nia ecopo ng’io en gire gin maber ku gin marac. Bende, ecwayu ndra pi lembe ma bitimere ka Eva uturo cik pa Mungu. Sitani uyero nia Eva bitho ngo, pieno Eva ucamu nying yen ne moko man ing’eye edok emio moko ni cware bende. Adamu giku Eva ging’eyo cuu nia Yehova ukwerogi nicamu nying yen maeno. Saa ma gicame, gigam gituro cik maeno pa Mungu akakaka, cik m’ubino terere man m’ubino yot. Ginyutho bende nia giworo ngo Wego migi mi polo ma jamer. Gitimo lembe ma kisa copo timere ko ngo igi!

12. Pirang’o tegowic ma Adamu giku Eva gitimo ni Yehova tie lembe ma turo cwinyjo hai?

¹² Junyodo mwa mi kwong’o gitimo lemkasegu mandha ma giworo ko ngo Jacwic migi! Kepar nia itungo awiya peri ku can, re ing’eye gijai iri, gicaku timo kwa lembe m’ukoc ku m’iyero nia gitim; icopo winjiri nenedi? Nyo lembe maeno copo turo cwinyi ngo?

13. Saa ma Yehova uwacu nia “ibidoko ni utur,” emito ninyutho ang’o?

¹³ Kinde ma gituro cik pa Yehova, Adamu giku Eva gibayu genogen migi mi kwo ma rondo ku rondo. Yehova uyero ni Adamu kumae: “Kum in i utur, man ibidoko ni utur.” (Som Thangambere 3:19.) Eno nyutho nia Adamu bidoko ni utur kendo, tap kite m’elar ebino ko saa ma nwang’u fodi jucwie ngo. (Thangambere 2:7) Ing’ei ma Adamu udubo, etho man ebedo nuti kendo ngo.

14. Pirang’o wabed watho?

¹⁴ Ka nwang’u Adamu giku Eva giworo cik pa Mungu, nwang’u di tin de gitie kwo asu. Ento saa ma gituro cik pare, gidubo, man ing’eye githo. Dubo tie calu twoyo moko ma pek ma walagu niai ibang’ junyodo mwa ma kwong’a. Wan ceke junyolowa ku dubo, eno re m’uketho wabed watho. (Jurumi 5:12) Ento eno tie ngo lembe ma Mungu ukeco pi dhanu. Mungu maru ngo nyanok de nia dhanu githo, pieno Biblia ulwong’o tho ni “jakwor.”​—1 Jukorinto 15:26.

LEMANDHA UBEGONYOWA

15. Lemandha ma Biblia ponjo iwi ju m’utho ubegonyowa nenedi?

¹⁵ Lemandha ma wang’eyo iwi ju m’utho, ubegonyowa ikum paru dupa mi ndra. Biblia ubeponjowa nia ju m’utho giwinjo ngo litho kadi can de. Wacopo weco kugi ngo, gin de gicopo weco kudwa ngo. Wacopo konyogi ngo, gin de gicopo konyowa ngo. Gicopo timowa rac ungo, pieno wacikara ngo nilworogi. Re, dini dupa loko nia ju m’utho gibekwo kaka moko, man nia wacopo konyogi ka wamio sente ni judongo mi dini kunoke ni dhanu ma junenogi nia gitie ju maleng’. Ento ka wang’eyo lemandha ma Biblia ubeponjo iwi ju m’utho, jucopo wondowa ngo.

16. Dini mapol ponjo vupo makani iwi ju m’utho?

¹⁶ Sitani ucikutio ku dini mi ndra pi niwondowa man niketho wapar nia ju m’utho gitie kwo asu. Ku lapor, dini moko ponjo nia ka watho, piny moko tie ikumwa ma medere asu nikwo kaka mange. Nyo dini peri de beponjo kumeno, kunoke nyo ebed eponjo tap lembe ma Biblia yero iwi ju m’utho? Sitani ubetio ku vupo pi niwingo dhanu kud ikum Yehova.

17. Pirang’o ponji ma nia Yehova wang’u dhanu i mac ma kuthum tie ponji ma nyayu acidi i wie?

¹⁷ Dini mapol ponjo lembe ma nyayu can ku ng’ecwiny. Ku lapor, jumoko ponjo nia dhanu mareco gibiwang’ rondo ku rondo i mac ma kuthum. Eno tie ponji mi vupo man ma mio acidi iwi Yehova. Ecopo ngo nisendo dhanu i ayi ma kumeno kadok nyanok de! (Som 1 Yohana 4:8.) Icopo winjiri nenedi ka ng’atu moko ubewang’u cing’ nyathin pare i mac, nia eca ebemio ire matira? M’umbe jiji, icopo paru nia etie ng’atu ma cwinye rac akeca. Icopo mito ngo nia itund ning’eye ang’eya de. Sitani bende ubemito tap nia wadag Yehova kumeno!

18. Pirang’o ukwayu ngo walwor ju m’utho?

¹⁸ Dini moko wacu nia ka dhanu utho, gidoko ni tipo. Giponjo nia wacikara niworo kunoke nilworo tipo maeno pilembe gicopo nidoko iwa ni jurimo ma konyowa kunoke ni judhogwa ma timowa rac. Dhanu mapol giyiyo vupo maeno. Gilworo ju m’utho man giworogi kakare niworo Yehova. Poi nia ju m’utho copo ngo ning’eyo lembe moko kadok nyanok de, pieno, wacikara ngo nilworogi. Yehova tie Jacwic mwa. En re m’etie Mungu mandha man wacikara niworo en kende.​—Lembanyutha 4:11.

19. Ng’eyo lemandha iwi ju m’utho konyowa nenedi?

¹⁹ Ng’eyo lembe mandha iwi ju m’utho gonyowa kud i ponji mi ndra mi dini ma tung’ tung’. Lemandhane konyowa ninyang’ iwi lembang’ola mabeco ma Yehova ung’olo pi kwo mwa man pi nindo mwa m’ubino.

20. Wabiponjo lembang’o i wic m’ulubo?

²⁰ Yang’ con, Yob m’ubino jaratic pa Mungu upenjo kumae: “Tek dhanu tho, ebikwo kendo?” (Yob 14:14) Nyo ecopere de ni ng’atu m’utho nicer? Kite ma Mungu udwoko ko wang’ penji maeno i Biblia, nyayu mutoro lee i iwa. Wabiponjo lembene i wic m’ulubo.

1-3. Wan ceke watie i kol mir ang’o, man Yehova bigonyowa nenedi kud i kolne?

KEPAR nia jung’olo lembe i wii nia ibibedo i otkol pi dong kwo peri zoo, ke pi kosa moko m’itimo ngo. Lembe moko acel de mbe m’unyutho nia jucopo nigonyi nindo moko. Imbe ku genogen pi kwo peri mi nindo m’ubino, man gin moko m’icopo timo de umbe. Ento kinde ma dong’ cwinyi uai magwei, ilund inwang’u nia kara ng’atu moko nuti ma tie ku copo mi gonyi kud i kol, man ng’atune ng’olo nia ebikonyi! Icopo winjiri nenedi?

² Wan ceke watie i kol mi tho. Kadok watim ang’o de, karingo mbe iwa. Ento Yehova tie ku copo mi gonyowa kud i tho. Pieno eng’olo nia, “Jakwor ma cen ma bikabre en e tho.”​—1 Jukorinto 15:26.

³ Kepar ayi ma cwinyi bikwio ko saa maeno ma dong’ ibibedo mbe ku lworo mi tho! Ento Yehova bikabu tho kende kende ngo. Ebicero bende ju m’udaru nitho. Kepar ayi mutoro ma binegi saa maeno. Eng’olo nia “avu,” niwacu ju m’utho, gibikwo kendo. (Isaya 26:19) Eno tie gin ma Biblia lwong’o cer.

KA NG’ATU MA WAMARU UTHO

4. (a) Ang’o ma copo nimio iwa jukojuk ka wat mwa kunoke jarimbwa moko utho? (b) Kekwan jurimo moko ma ceng’ni pa Yesu.

⁴ Ka wat mwa moko kunoke jarimbwa moko utho, ecopo bedo tek iwa niciro litho ku can ma wanwang’u i cwinywa. Wanwang’u nia tego mwa uthum. Gin moko acel de mbe ma waromo nitimo pi nidwoke kwo. Ento Biblia mio iwa jukojuk mandha. (Som 2 Jukorinto 1:3, 4.) Wakenen lapor acel m’unyutho nia Yehova giku Yesu gimaru lee nicero dhanu mwa ma githo. Saa ma Yesu ubino iwi ng’om, ebed ecidho wang’ mapol niliewo Lazaru man nyimego pare, Martha giku Maria. Gin adek ceke gibino jurimo ma ceng’ni pa Yesu. Biblia uyero kumae: ‘Yesu maru Marsa [niwacu, Martha] ku nyamin de man Lazaru.’ Nindo moko, Lazaru ugam utho.​—Yohana 11:3-5.

5, 6. (a) Yesu utimo ang’o saa m’eneno jupagi lazaru man jurimbe gibeywak? (b) Ning’eyo nia tho unyayu can i cwiny Yesu bende, copo nijuko cwinywa nenedi?

⁵ Yesu ucidho pi nijuko cwiny Martha giku Maria. Kinde ma Martha uwinjo nia Yesu ubebino, ewok kud i adhura kara ecidh eromb kude. Anyong’a nege nineno Yesu, ento eyero ire kumae: “Tek ande ini keni, kuno di umira tho ngo.” Martha paru nia Yesu ugalu dit. Ing’eye, Yesu uneno Maria ma nyamin Martha ubeywak. Kinde m’eneno can ma dhanu m’ubedo keca ubino niwinjo i cwinygi, can ugam umondo i cwinye bende, man en de eywak. (Yohana 11:21, 33, 35) Ewinjo i cwinye, litho ma lee ma wabed wawinjo ka ng’atu moko ma wamaru utho.

⁶ Ning’eyo nia Yesu bende bedo ku can i cwinye, calu ma wabed wabedo ko saa ma dhanu mwa utho, juko cwinywa lee. Yesu tie tap calu Won. (Yohana 14:9) Yehova tie ku copo mi kabu tho pi nja, man ebikabe ceng’ni eni.

‘LAZARU, WOK WOKO!’

7, 8. Pirang’o Martha umito ngo nia jung’iel kidi kud i dhu odliel pa Lazaru, ento Yesu utimo ang’o?

⁷ Kinde ma Yesu utundo i dhu odliel kakare ma juketho i ie avuj Lazaru, nwang’u jujengo kidi ma pethere i dhu odlielne. Yesu wacu kumae: “Wung’iel kidi woko.” Ento Martha umito ngo nia jung’iel kidine. Nwang’u kum Lazaru udaru timo nindo ang’wen i liel. (Yohana 11:39) Martha ung’eyo ngo gin ma Yesu ubecitimo ni Lazaru m’umin.

⁸ Yesu ukok ni Lazaru kumae: “Wok woko!” Lembe ma Martha Giku Maria gineno ing’eye ubino lembe mir anyong’a ma lee dit. “E ng’atu m’utho wok woko, ma cinge ku tiende bedo ariwa ku bongu mi kuny.” (Yohana 11:43, 44) Lazaru ucer! Edwogo kendo i kwo karacelo ku jupagi man ku jurimbe. I saa maeno, gijole, gigwake, man giweco kude. Lembuno ubino udu ma lee dit! Yesu ucero Lazaru.

NYAKU, “AWACU IRI KUMAE, AI MALU!”

9, 10. (a) Ng’a m’umio ni Yesu copo mi cero dhanu? (b) Pirang’o cer ma jukoro pigi i Biblia tie iwa lembe ma pire tek?

⁹ Nyo Yesu ucero dhanu ku copo pare gire? Ungo. Iwang’ nicero Lazaru, Yesu ular urwo ibang’ Yehova, man Yehova umio ire copo mi cere. (Som Yohana 11:41, 42.) M’uweko Lazaru, dhanu mange bende tie ma gicer. Biblia ukoro pi nyaku moko mi oro 12, ma kume bino remo lee. Won ma nyinge Yairo ubino nidieng’ akeca, man ekwayu nia Yesu ukei kum nyaku pare. Ebino nyaku pare m’acel kulong’. Kinde ma Yairo ubino nikoro lembene ni Yesu, dhanu moko gitundo keca man giwacu kumae: “Nyeri tho: isendo Japonji nedi kendo?” Ento Yesu uwacu ni Yairo kumae: “Lworo kud unegi, yi kende, e kume bititre [niwacu, ebiboth].” E gicidho yo pa Yairo gikude. Kinde ma gidhingo tundo, Yesu uneno man ewinjo dhanu ubeywak. E ewacu igi kumae: “Kud wuywaki: kum etho ngo, ento enindo.” Ecicopere nia won giku min ginyang’ ungo i lembe ma Yesu umito niyero. Yesu ukwayu nia dhanu ceke giwok woko, man eting’o won nyakune ku min, emondo kugi i ot ma nyakune vuto i ie. Yesu umaku cinge man ewacu ire kumae: Nyaku, “awacu iri kumae, ai malu!” Kepar anyong’a ma junyodo pare gibino ko kinde ma nyaku maeno uai ndhu ndhu malu man ecaku niwotho! Yesu ucero nyaku migi. (Marko 5:22-24, 35-42; Luka 8:49-56) Niai cing’ nica, ka gineno nyaku migi ci, gicopo poi kum bero ma Yehova utimo igi nikadhu kud ibang’ Yesu.a

¹⁰ Dhanu ma Yesu ucero, gidok githo kendo. Ento lembe ma Biblia ukoro pi cer migi tie lembe ma pire tek lee, pilembe emio iwa genogen mandha. Yehova ubemito nicero dhanu, man ebicerogi andha.

PONJI MA WACOPO NINWANG’U IKUM CER MA JUKORO PIGI I BIBLIA

11. Giragora pa Eklizia 9:5 ubeponjowa ku lembang’o iwi tho pa Lazaru?

¹¹ Biblia uwacu kamaleng’ nia “ju m’utho ging’eyo gin moko ngo.” Tho pa Lazaru unyutho nia eno tie lemandha. (Eklizia 9:5) Tap calu ma Yesu uwacu, ebino ve Lazaru ubenindo aninda. (Yohana 11:11) Kinde m’ebino i liel, Lazaru ung’eyo “gin moko ngo.”

12. Wang’eyo nenedi nia cer pa Lazaru utimere andha?

¹² Dhanu dupa ubino nuti saa ma Yesu ucero Lazaru. Kadok judegi pa Yesu bende ging’eyo nia etimo udu maeno. Lazaru ubino kwo, lembe maeno nyutho nia cer maeca utimere andha. (Yohana 11:47) Bende, dhanu dupa gicidh giliewo Lazaru, e ing’eye, gicaku niyio nia andha, Mungu re m’uoro Yesu. Lembe maeno ufoyo ngo i judegi pa Yesu, pieno, gipangu ninego Yesu giku Lazarune ceke.​—Yohana 11:53; 12:9-11.

13. Pirang’o wacopo niyio nia andha Yehova bicero dhanu m’utho?

¹³ Yesu uwacu nia “ju m’i liel ceke” gibicer. (Yohana 5:28) Wec maeno nyutho nia dhanu ceke ma Yehova ubepoi pigi gibicer. Re, kara Yehova ucer ng’atini, bikwayu nia eke epoi ikum lembe moko ci iwi ng’atune. Nyo ecopo poi andha ikum lembe moko ci iwi ng’atuman m’ebicero? I kor polo, nyikaluku tie milioni swa. Biblia uyero nia Yehova ung’eyo nying’ nyikaluku ceke acel acel. (Som Isaya 40:26.) Ka Yehova copo nipoi ikum nying’ nyakalukuman, gin ma copo cere mbe acel de nipoi ikum lembe moko ci iwi dhanu ceke m’ebicero. M’umedo maeno, Yehova re m’ucwio piny ceke, pieno, wang’eyo nia etie ku copo mi dwoko dhanu m’utho gidok gikwo kendo.

14, 15. Wec ma Yob uyero ubeponjowa ku lembang’o iwi cer?

¹⁴ Won bedopwe ma nyinge Yob uyio nia cer bibedo nuti. Epenjo kumae: “Tek dhanu tho, ebikwo kendo?” Ing’eye ewacu ni Yehova kumae: ‘Ibilwong’o man abiloko iri lembe: Ibibedo kud ava tic mi cingi.’ Eyo, Yob ugam ung’eyo nia Yehova ubekuro kud ava madit, nindo m’ebicero i ie dhanu ma githo.​—Yob 14:13-15.

¹⁵ Genogen mi cer ketho iwinjiri nenedi? Saa moko icopo nipenjiri kumae: ‘Nyo wat para ku jurimba ma githo ca de gibicer?’ Ning’eyo nia Yehova tie kud ava ma lee mi cero dhanu ma githo mio iwa jukojuk. Re, Biblia yero nia jukani ma gibicer, man gibikwo kakani? Wakeponj lembe maeno.

‘GIBIWINJO DWANDE MAN GIBIWOK WOKO’

16. Dhanu ma gibicer pi nikwo iwi ng’om, gibikwo kit kwo ma nenedi?

¹⁶ I rundi ma con, dhanu ma gicer, gidok gikwo kendo iwi ng’om keni karacelo ku wat migi man jurimo migi. Nindo m’ubino bende lembe bibedo kumeno, re maeca bibedo ber ma sagu. Pirang’o? Pilembe dhanu ma gibicer iwi ng’om, gibibedo ku kaka mi nwang’u kwo ma rondo ku rondo, man gibitho kendo ngo. Bende, gibikwo iwi ng’om ma kwo m’i ie bikoc ku kwo mwa ma tin eni. Lwiny, timo mareco, man twoyo de bibedo mbe kendo.

17. Jukani ma gibicer?

¹⁷ Jukani ma gibicer? Yesu yero nia “ju m’i liel ceke biwinjo . . . dwande man gibiwok woko.” (Yohana 5:28, 29) Lembanyutha 20:13 bende ukoro kumae: “Nam uwodho ju m’utho ma ni i ie: man tho kud Hadeya [niwacu, Liel] de giwodho ju m’utho ma ni i igi.” Eyo, dhanu milioni dupa dit gibidok kwo kendo. Jakwenda Paulo bende uyero nia ‘weg bedopwe ku weg bedopwe ngo,’ ceke gibicer. (Som Tic mi Jukwenda 24:15.) Thelembe mi wec maeno tie ang’o?

18. “Weg bedopwe” tie jukani?

¹⁸ “Weg bedopwe” uketho i ie jurutic pa Yehova ma gigwoko bedoleng’ migi man ma gigam gikwo iwang’ bino pa Yesu iwi ng’om. Noa, Abraham, Sara, Musa, Ruth, Ester ku dhanu mange bende, gibicer pi nikwo iwi ng’om keni. Icopo nisomo pi ju moko m’ikind dhanu ma co ku ma mon maenogi i buku mi Juebrania thek 11. Kadong’ jurutic pa Yehova ma gigwoko bedoleng’ migi man ma gibetho i rundi mwa e kee? Gin de gibicer pilembe gitie bende “weg bedopwe.”

19. “Weg bedopwe ngo” tie jukani? Yehova bimio igi kaka mi timo ang’o?

¹⁹ “Weg bedopwe ngo” tie dhanu milioni dupa dit ma ginwang’u ngo kaka mi ng’eyo Yehova. Kadok githo de, Yehova uwil ungo pigi. Ebicerogi man ebimio igi kaka mi ponjo lembe i wie man mi timo ire.

20. Pirang’o dhanu moko gibicer ungo?

²⁰ Nyo eno nyutho nia dhanu ceke ma gidaru nitho gibicer? Ungo. Yesu yero nia dhanu moko tie ma gibicer ungo. (Luka 12:5) Ng’a m’utie ku twero mi ng’io nia jukani ma gibicer, jukani ma gibicer ungo ke? Yehova re m’utie Japoklembe madit m’usagu zoo, ento emio bende ni Yesu, dito mi bedo “japoklembe mi ju ma kwo ku ju m’utho.” (Tic mi Jukwenda 10:42) Ebicero ngo nyanok de ng’atu m’eneno nia tie jatimrac m’ukwero niloko timo pare marac.​—Som Thenge ma jumedo, namba 19.

CER PI KWO MI POLO

21, 22. (a) Cer pi kwo mi polo thelembene tie ang’o? (b) Ng’a m’ular ucer pi kwo mi polo?

²¹ Biblia yero iwa bende nia dhanu moko tie ma gibikwo i polo. Ka ng’atu moko ucer pi kwo mi polo, ecer ungo ku kum maeni mi ring’ kum. Ento, ecer pi kwo mi polone ku kum mi tipo.

²² Ng’atu ma kwong’a m’ular ucer pi kwo mi polo tie Yesu. (Yohana 3:13) Nindo adek ing’ei tho pare, Yehova ucere. (Zaburi 16:10; Tic mi Jukwenda 13:34, 35) Yesu ucer ungo ku kum maeni mi ring’kum. Jakwenda Petro ukoro nia ‘junego [Yesu] i kum, ento judwoke kwo i tipo.’ (1 Petro 3:18) Mungu cero Yesu ku kum mi tipo man ecere ni ng’atu ma won tego lee! (1 Jukorinto 15:3-6) Ento Biblia wacu nia m’uweko Yesu, dhanu mange bende nuti ma gibicer pi kwo maeno mi polo.

23, 24. “Udul ma nyanok” ma Yesu uweco pigi gitie jukani, man gitie dhanu adi?

²³ Iwang’ tho pare, Yesu uwacu ni julubne m’ugwoko bedoleng’ migi kumae: “Acidho niyiko kabedo iwu.” (Yohana 14:2) Wec maeno unyutho nia jumoko m’ikind julubne gibicer pi nikwo kude i polo. Gitie dhanu adi? Yesu uwacu nia gibibedo dhanu ma wendgi nok, elwong’ogi “udul ma nyanok.” (Luka 12:32) Jakwenda Yohana udok umio wel migi ma tap kinde m’eneno Yesu “cungo wi got Sayuni [m’i polo] ku dhanu rubanga dak acel ku pier ang’wen wi ang’wen (144 000).”​—Lembanyutha 14:1.

²⁴ Jukristu 144 000 maeno gibicer awene? Biblia uyero iwa nia cer maeno bitimere ing’ei ma Kristu bicaku nibimo i polo. (1 Jukorinto 15:23) Tin eni dong’ wabekwo i saa maeno, man ju mapol m’ikind dhanu 144 000 gidaru nicer pi nikwo i polo. Ju ma fodi gitie asu iwi ng’om keni, ma gibetho i rundi mwa eni, gicer ndhu ndhu ing’ei tho migi pi kwo mi polo. Ento, dhanu mange mapol gibicer i nindo m’ubino pi nikwo i Paradiso iwi ng’om keni.

25. I wic m’ulubo wabiponjo ang’o?

²⁵ Ceng’ni eni, Yehova bigonyo dhanu ceke kud i tho, man tho bithum magwei! (Som Isaya 25:8.) Ento dhanu m’ubecidho i polo, gibecidho nitimo ang’o kuca? Biblia ukoro nia gibibimo giku Yesugi i bimobim mi Ker pa Mungu. I wic m’ulubo, wabiponjo lembe lee iwi bimobim maeno.