Wor Kwo Pilembe Etie Giramia Pa Mungu

1. Ng’a m’umio iwa kwo?

YEHOVA tie “Mungu ma kwo.” (Yeremia 10:10) En re m’etie Jacwic mwa, man emio iwa kwo. Biblia yero kumae: “Icwio gin ceke, man gibedo nuti ni kum yeny m’iyenyo, gicwiri de.” (Lembanyutha 4:11) Andha, Yehova umaru nia wabed kwo. Kwo tie giramia ma pire tek m’uai ibang’e.​—Som Zaburi 36:9.

2. Wacopo timo ang’o kara kwo mwa ubed maber akeca?

² Yehova ubemio iwa piny ma watie ku yenyne kara wamedara nikwo, calu ve, cam man pii. (Tic mi Jukwenda 17:28) Ento m’usagu maeno, ebemito nia wanwang’ anyong’a i kwo mwa. (Tic mi Jukwenda 14:15-17) Kara kwo mwa ubed maber akeca, wacikara niworo cik pa Mungu.​—Isaya 48:17, 18.

MUNGU NENO KWO NENEDI?

3. Yehova utimo ang’o kinde ma Kain unego Abel?

³ Biblia ubeponjowa nia Yehova neno kwo mwa man kwo mi dhanu mange bende ni gin ma pire tek i wang’e. Ku lapor, saa ma Kain ma wod Adamu giku Eva, ubino ku ng’ecwiny lee ikum Abel m’umin m’ulubo ng’eye, Yehova ucimo wang’e nia ebim wi kwinyo pare. Ento, Kain uwinjo ngo, ng’ecwiny pare umedere ameda nitundo ‘epodho wi Abel m’umin mire, man enege.’ (Thangambere 4:3-8) Yehova umio matira ni Kain pi nek m’enego ko Abel. (Thangambere 4:9-11) Pieno, kwinyo kud adegi tie rac magwei pilembe gicopo ketho wadoko junek kunoke dhanu ma cwinygi rac. Ng’atu ma kumeno copo nwang’u ngo kwo ma rondo ku rondo. (Som 1 Yohana 3:15.) Kara wanyai mutoro i Yehova, wacikara niponjo nimaru dhanu ceke.​—1 Yohana 3:11, 12.

4. Cik acel ikind cik ma Mungu umio ni nyithindho mir Israel ubeponjowa nenedi iwi giramia mi kwo?

⁴ Oro dupa ing’ei lembe maeno, Yehova udok unyutho kendo nia eneno kwo ni gin ma pire tek, kinde m’emio Cik Apar ni Musa. Cik acel m’ikindgi uwacu kumae: “Kud ineg nek.” (Poi mi Cik 5:17) Ka ng’atu moko unego nek akakaka, en de jucikiri ninege.

5. Mungu neno wodho ic nenedi?

⁵ Mungu neno wodho ic nenedi? Kadok kwo pa nyathin ma fodi unyolere ngo de, pire tie tek iwang’ Yehova. I Cik ma Yehova umio ni nyithindho mir Israel, eyero nia ka ng’atu moko unyayu ret ikum dhaku ma ie nuti, man retne uketho nyathin m’i ie utho, jubinego ng’atu m’unyayu retne anega. (Som Ai 21:22, 23; Zaburi 127:3.) Eno ponjowa nia wodho ic tie rac.​—Som Thenge ma jumedo, namba 28.

6, 7. Wacopo nyutho nenedi ni Yehova nia wabeneno kwo ni gin ma pire tek?

⁶ Wacopo nyutho nenedi ni Yehova nia wabeneno kwo mwa ku kwo mi dhanu mange bende ni gin ma pire tek? Nwang’u wabetimo ngo timo moko ci ma romo ketho kwo mwa kunoke kwo mi jumange i ariti. Pieno, wabimadhu ngo taba, njai, wabinyamu ngo mairungi [niwacu, miraa], wabitio ngo bende rac ku yath ma merojo, pilembe piny maeno gitimowa rac man gicopo ninegowa.

⁷ Mungu umio en kwo mwa man kumwa, pieno wacikara nitio kugi i kite m’emito en. Wacikara nigwoko kumwa agwoka. Ka watimo kumeno ngo, wabidoko dhanu m’ucido iwang’ Mungu. (Jurumi 6:19; 12:1; 2 Jukorinto 7:1) Wacopo woro ngo Yehova m’umio iwa kwo, ka wabeneno kwo ni gin ma pire tek ungo. Kadok ecopo bedo tek niweko ng’io marac, Yehova bikonyowa ka wabetimo kero pilembe wabeneno kwo ni gin ma pire tek.

8. Wacopo timo ang’o kara kwo mwa ku kwo mi dhanu mange kud ubed i peko?

⁸ Waponjo nia kwo tie giramia ma pire tek. Yehova tie ku genogen nia wabitimo kero mwa ceke kara kud waketh kwo mwa man kwo mi dhanu mange i peko. Wabitimo kumeno i ayi ma waberingo ko ku mutukari mwa, moto, gari, kunoke piny mange. Wabituko ngo ayi tuko ma ketho kwo mwa i peko, kunoke tuko mi rop. (Zaburi 11:5) Wabitimo kero bende niketho ot mwa ubed ni ot ma nyayu ngo peko i kumjo. Yehova umio cik mae ni nyithindho mir Israel: “Kinde m’igomo ot [étage] ma nyen, ilund itim gang’ kum wi ot peri, kara kud ikel rimo wi ot peri, tek ng’atu moko podho ku kuca.”​—Poi mi Cik 22:8.

9. Wacikara nitio ku lei nenedi?

⁹ Kite ma watio ko ku lei, utie bende gin ma pire tek i wang’ Yehova. Emio iwa twero mi nego lei pir acama, man pi kendi, man eyio bende nia waneg lei, ka leine ubeketho kwo mwa i ariti. (Thangambere 3:21; 9:3; Ai 21:28) Ento wacopo ngo nitimo lei rac kunoke ninegogi kende kende pi tuko.​—Lembrieko 12:10.

WOR KWO PILEMBE ETIE LENG’

10. Wang’eyo nenedi nia rimo nyutho kwo?

¹⁰ Rimo tie gin maleng’ iwang’ Yehova, pilembe enyutho kwo. Ing’ei ma Kain unego Abel, Yehova uwacu ire kumae: “Ba rimb umeru ywak i bang’a kud i ng’om.” (Thangambere 4:10) Rimo pa Abel ugam unyutho kwo pare, pieno, Yehova umio matira ni Kain pi nek m’enego ko Abel. Ing’ei pii madit m’uumo ng’om i rundi pa Noa, Yehova udok unyutho kendo nia rimo nyutho kwo. Yehova umio ni Noa ku juruot pare, twero mi camu ring’ lei. Eyero kumae: “Ku ba gin ceke ma kwo m’ubewotho bibedo ni cemo iwu; calu uboko ma numu m’amio iwu e amio iwu giki ceke kumeca.” Re, gin moko acel ubino nuti ma Yehova ugam ung’olo nia kud gicam: “Ento ring’o ku kwone, ma en e rimone, kud wucam.”​—Thangambere 1:29; 9:3, 4.

11. Mungu umio ni thek mir Israel cik makani iwi rimo?

¹¹ Oro ma tundo 800 kumeni ing’ei ma Yehova uyero ni Noa nia kud gicam rimo, edok emio kendo ni dhanu pare cik mae: “Man ng’atu ma tek nuti i kind nyithindho mir Israel, kadi mir umondo m’ubedo i kindgi, m’ugamu lim moko kadi winyo i dwar ma jucopo camu: ebicwiro rimone woko, man ebiume kud utur.” Ing’eye, eyero kumae: “Kud wucam rimo.” (Lembe mi Julawi 17:13, 14) Yehova ubino medere asu nimito nia dhanu pare ginen rimo ni gin maleng’. Yehova uyio igi nia gicam ring’o, ento rimo re ngo. Ka ginego lei moko pir acama, gicikiri nicwiro rimbe i ng’om.

12. Jukristu gineno rimo nenedi?

¹² Oro moko ing’ei tho pa Yesu, jukwenda man judongo mi cokiri mi Jukristu i Yerusalem, gigam gicokiri karacelo pi ning’io nia ukwayu Jukristu gimediri niworo cik makani, ikind Cik ma Yehova umio ni nyithindho mir Israel. (Som Tic mi Jukwenda 15:28, 29; 21:25.) Yehova ugam ukonyogi kara ginyang’ nia rimo ubino asu gin ma pire tek i wang’e, man nia gicikiri ninene ni gin maleng’. Jukristu mi rundi mi jukwenda gibino mbe ku twero mi camu kunoke mi madhu rimo, kadok mi camu ring’ lei ma juthumo ng’ute cuu ngo, niwacu ma rimbe cwir cuu ungo. Ka nwang’u gicamu kunoke gimadhu rimo, nwang’u gitimo lembe marac ma rom ku niworo ayi gin m’acwia kunoke nitimo tarwang’. Niai eca, Jukristu mandha gibed gikwero nicamu kunoke nimadhu rimo. Ka tin ke? Tin bende, Yehova ubemedere nimito nia wanen rimo ni gin maleng’.

13. Pirang’o Jukristu gicopo niyio ngo nia jucik rimo i kumgi?

¹³ Nyo eno nyutho nia Jukristu gicikiri nikwero bende ciko rimo i kumgi? Eyo, gicikiri nikwero. Yehova ukwero iwa nicamu kunoke nimadhu rimo. Ku lapor, ka munganga ukweri ku madhu kong’o, nyo icopo cobo kong’one acoba i kumi yor i ler? M’umbe jiji icopo cobo ngo! Kumeno bende, cik ma nia kud wacam kunoke kud wamadh rimo, nyutho nia wacopo ngo niyio jucik rimo i kumwa.​—Som Thenge ma jumedo, namba 29.

14, 15. Jukristu gineno kwo nenedi? Nyo gicopo yio nituro cik pa Mungu kara gimediri nikwo asu? Kekor.

¹⁴ Wacopo timo ang’o ka munganga uwacu iwa nia ka juciko ngo rimo i kumwa ci, wabitho andha? Ng’atuman ucikere ning’io en gire nia nyo ebiworo cik pa Mungu iwi rimo kunoke ungo. Jukristu ginyutho woro ma thuth ikum kwo pilembe etie giramia pa Mungu. Pieno, wabisayu kit yath mange ma bikonyowa kara wamedara nikwo, ento wabiyio ki ngo nia jucik rimo i kumwa.

¹⁵ Calu kwo pire tek iwang’ Mungu, watimo kero nigwoko leng’kum mwa, ento wayio ngo nia jucik rimo i kumwa. Etie lembe ma pire tek lee nia wawor cik pa Yehova, kakare nituro cikne ma wamito ko nia kwo mwa ung’adi. Yesu uwacu kumae: “Kum ng’atu ma tek uyenyo egwok kwo pare ebirwinye: ng’atu ma tek birwinyo kwo pare de pira ebinwang’e.” (Matayo 16:25) Wamito niworo Yehova pilembe wamare. En re m’eng’eyo gin maber akeca piwa, pieno, waneno kwo ni gin ma pire tek man maleng’ calu ma en de eneno.​—Juebrania 11:6.

16. Pirang’o jurutic pa Mungu giworo cik pare?

¹⁶ Jurutic pa Mungu ma gigwoko bedoleng’ migi, giketho i rieko migi nia gibimediri niworo cik pa Mungu iwi rimo. Gibicamu ngo rimo, kadok amadha de gibimadhe ngo, man gibiyio ngo nia jucik rimo i kumgi kara kumgi kei.a Re, gibiyio kit yath mange ma copo bodho kwo migi. Ging’eyo m’umbe jiji nia Ng’atu m’ucwio kwo man rimo ung’eyo gin maber akeca pigi. Nyo in de iyio nia Yehova ung’eyo gin maber akeca piri?

YO ACEL KENDE MA YEHOVA UGAM UYIO NIA JUTII KO KU RIMO

17. Yo acel kende makani ma Mungu uyio nia thek mir Israel gitii ko ku rimo?

¹⁷ I Cik ma Yehova umio ni Musa, eyero ni nyithindho mir Israel kumae: “Kwo mi ring’kum ni i rimo; man amie iwu wi pemblam kara utim adunya [niwacu, pi kwayu weko dubo] pi ng’eyong’ec mu: kum en e rimo e ma timo adunya kum kwo.” (Lembe mi Julawi 17:11) Ka nyithindho mir Israel gitimo dubo, pi nikwayu nia Yehova uwek dubo migine, gibed githiero lei man gibed gikwayu jalam ukonj rimb leine moko iwi pemblam i hekalu. Eno re m’ubino yo acel kende ma Yehova ugam uyio nia nyithindho mir Israel gitii ko ku rimo.

18. Kwo ma Yesu uthiero piwa umio iwa genogen makani?

¹⁸ Kinde ma Yesu ubino iwi ng’om, ewilo cik ma jubed juthiero ko lei; ewile ku kwo pare, kunoke rimo pare, m’emio kara dubo mwa uwekere. (Matayo 20:28; Juebrania 10:1) Kwo pa Yesu ubino gin ma pire tek akeca; uketho ing’ei ma Yehova ucere man edok i polo, Yehova utio ku kwo maeno ma pire tek akeca, pi nimio ni dhanu ceke genogen mi kwo ma rondo ku rondo.​—Yohana 3:16; Juebrania 9:11, 12; 1 Petro 1:18, 19.

19. Wacikara nitimo ang’o kara wabed “leng’ ni rimb dhanu ceke”?

¹⁹ Wacopo dwoko foyofoc lee ni Yehova pi giramia pare maber akeca mi kwo! Bende, watie ku mutoro ninyutho ni dhanu nia, ka gitie ku yioyic i Yesu, gicopo nwang’u kwo ma rondo ku rondo. Wamaru dhanu, man wabitimo kero mwa ceke niponjogi ku lembe m’ukwayu gitim kara ginwang’ kwo. (Ezekiel 3:17-21) Ka watimo kumeno, wacopo tundo niyero kumae, calu jakwenda Paulo: “An a leng’ ni rimb dhanu ceke. Kum alworo ngo niyero iwu lembapora pa Mungu.” (Tic mi Jukwenda 20:26, 27) Eyo, wanyutho woro ma thuth ikum kwo man ikum rimo, nwang’u wabeyero lembe iwi Yehova ni dhanu mange man wabenyutho igi nia eneno kwo ni gin ma pire tek akeca.