Yesu ucer

I ng’ey ma Yesu utho, jalonyo moko ma nyinge Yozefu upenjo Pilatho uwek elor avuj Yesu kud iwi yen. Yozefu uboyo avune ku bongu ma leng’ man ma nwang’, e ekethe i odi liel moko ma nyen. Eng’ielo kidi ma dit eumo ko dhu odi lielne. Judongo mi julam giyero ni Pilatho kumae: ‘Wabelworo nia julub pa Yesu moko gibiciting’o avuje man gibiwacu nia edaru cer.’ Pieno, Pilatho uyero igi kumae: ‘Wucik dhu odi liel ku kidi man wukure.’

I ng’ey nindo adek, jumamon moko gicidho pir kugweno kaka ma liel n’i iye man ginwang’u jung’ielo kidi kud i dhu odi lielne. Malaika moko ubino i odi lielne man eyero igi kumae: ‘Lworo kud unegwu. Yesu udaru cer. Wucidh wuyer ni julub pare nia gicidh giromb kude i Galilaya.’

E Maria Magdalene uringo pio pio i bang’ Pethro giku Yohana, man ewok ewacu igi kumae: ‘Ng’atu moko uting’o avuj Yesu!’ E Pethro giku Yohana giringo kaka ma odi liel n’i iye. Kinde ma giwok gineno nia iye udong’ thwolo, giloko gidok i pacu migi.

Maria uloko kendo kaka ma liel n’i iye; ewok eneno jumalaika ario i odi liel man eyero igi kumae: ‘Ang’eyo ngo kaka ma juketho Rwoth para i iye.’ I ng’eye, eneno ng’atu moko ma co man eparu nia tie jarafur, e epenje kumae: ‘Rwoth, timba nyuth ira kaka m’ikethe i iye.’ Ento saa ma ng’atune ulwong’e nia, “Maria!”  enyang’ nia etie Yesu. Ekok ma tek kumae: “Japonji!” man egwake. E Yesu uyero ire kumae: ‘Cidh iwac ni umego para nia inena.’ Ndhu ndhu nica, Maria uringo i bang’ julub man ewacu igi nia eneno Yesu.

I ng’eye i nindo ma rom eca, julub ario gibino cidho i Emao niai kud i Yeruzalem. Ng’atu moko ucaku wotho bende kugi man epenjogi nia gibeweco iwi lembang’o. Gidwoko ire kumae: ‘Iwinjo ngo? Nindo adek udaru kadhu niai ma judongo mi julam ginego Yesu. Ento kawoni jumamon moko gibeyero nia etie kwo!’ E ng’atune upenjogi kumae: ‘Wuyiyo ngo jubila? Jubila giewo nia Kristu bitho man i ng’eye ebicer.’ Ng’atune umedere nikoro igi i Lembagora. Kinde ma gitundo i Emao, julub gikwayu ng’atune nia ebed kugi. I dhu cam mir uthieno, kinde m’erwo iwi mukathi, ginyang’ nia eca ubino Yesu. E egam erwinyo.

Julub ario maeno giloko pio i Yeruzalem i ot ma jukwenda gicoko dhoggi i iye man gikoro igi lembe m’utimere. Kinde ma fodi gin’i die ot keca, Yesu ugam uwok i wang’gi ceke. Ku kwong’a, jukwenda giyiyo ngo nia utie Yesu. E eyero igi kumae: ‘Wunen cinga e, man wumul kuma. Egorere nia Kristu bicer kud i kind ju m’utho.’