PONJI MI 58
Mediri nigwoko bedoleng’ peri ni Yehova
Jukristu mandha gicopo yiyo ngo nia gin moko kadi ng’atu moko acel de uketh giwek nitimo ni Yehova. Wang’eyo nia in de icopo yiyo ngo. Ng’ey nia Yehova umeri lee pilembe imoko kikiki i kume. (Som 1 Lemkei 28:9.) Re lembang’o ma copo ketho ebedo tek nigwoko bedoleng’ peri ire, man icopo voyo lembene nenedi? Wakenen.
1. Dhanu mange gicopo mito gicerwa nenedi ku timo ni Yehova?
Dhanu moko copo pimo niwondo wang’wa kara nia wawek nitimo ni Yehova. Jukani eno? Jumoko nuti ma gidaru wok kud i lemandha man kawoni gibecwayu vupo iwi dilo pa Yehova pi ninyotho yiyoyic mwa bende. Julwong’ogi ‘ju m’ujay i kum lemandha.’ M’uweko gin, judong dini moko bende gibecuku mewo lembe mi ndra i wiwa, kara ju m’ubedo ngo ku wang’gi giwek nitimo ni Yehova. Pieno nipiemiri ku kwond dhanu maeno, nisomo buku migi, nimondo i kusika migi mir internet, man nineno video migi, tie niroyiri gijo i ariti. Yesu upoyowa kumae pi dhanu m’ubemito gitur cwiny ju m’ubetimo ni Yehova: “Wuwekgi. Gitie jutelwic ma gin abinga. Dong’ kan abinga ubetelo wi abinga, gin ario ceke gibipodho i vur.”—Matayo 15:14.
2. Yub ma wabemaku pi kwo mwa giwa copo codo kindwa ku Yehova nenedi?
Mer ma wamaru ko Yehova biketho wabidikara ngo ku dini mi vupo i lembe moko ci. Nik’ebed tic mwa, dikiri ma wan’i iye, kadi lembe mwa moko mange, ucikere ngo nibedo ku winjiri moko ku dini mi vupo. Yehova umiyo iwa cik ma e: “Wuwok kud i [Babeli ma dit], dhanu para.”—Lembanyutha 18:2, 4.
MED NYANG’ PERI
Wakenen lembe m’iromo timo kara ng’atu moko kud unyoth winjiri peri ku Yehova. Wanen bende kite m’icopo wodhiri ko ma zoo kud i Babeli ma dit pi ninyutho gwoko bedoleng’ peri ni Yehova.
3. Bed ku weng’i i kum juponji mi vupo
Waromo timo ang’o ka wawinjo lembe moko ma reco iwi dilo pa Yehova? Som Lembrieko 14:15, man i ng’eye wuwec iwi penji m’ulubo e:
Pirang’o wacikara ngo niyiyo lembe moko ci ma wawinjo?
Som 2 Yohana 9-11, man i ng’eye wuwec iwi penji m’ulubo e:
Wacikara ninyutho timo ma nenedi ni ju m’ujay i kum lemandha?
Kadok nyo wabeweco ngo ku ju m’ujay de, lembang’o ma copo ketho wanwang’u ponji migi asu ka wabedo ngo ku wang’wa?
Iparu Yehova copo winjere nenedi ka wabewinjo wec ma reco ma jubeyero ku nyinge kunoke ku nying’ dilo pare?
4. Nyuth gwoko bedoleng’ peri ni Mungu tek umego moko dubo
Ka wawinjo nia umego kunoke nyamego moko utimo dubo ma pek, wacikara nitimo ang’o? Kenen gin ma Cik pa Mungu ugam ung’olo ni Juisrael ma con. Som Lembe mi Julawi 5:1.
Verse maeni ubekonyowa ninyang’ nia, tekene wang’eyo nia umego kunoke nyamego moko utimo dubo ma pek, wacikara ninyutho lembe ma wang’eyone ni judong cokiri. Re i wang’ nitimo kumeno, etie ber magwei nia wakway ng’atu m’udubone ucidh utuc dubo pare en gire ni judong cokiri. Kan ecidho ngo re ma dong’ mer ma wamaru ko Yehova bicwaluwa niciyero lembene wan giwa ni judong cokiri. Pirang’o ka watimo kumeno wabinyutho nia wamaru . . .
Yehova Mungu?
ng’atu m’udubone?
jumange mi cokiri?
Kan umego kunoke nyamego moko udubo, konye!
5. Bed bor ku Babeli ma dit
Som Luka 4:8 man Lembanyutha 18:4, 5, man i ng’eye penjiri ku penji ma e:
Nyo fodi nyinga ubenwang’ere asu i buku mi dini moko mi vupo, kunoke nyo fodi gibekwana asu i kindgi?
Nyo atie i dikiri kunoke dilo moko m’ubetimo karacelo ku dini mange?
Nyo tic para ubetielo dini mi vupo i yore moko?
Nyo lembe moko nuti i kwo para m’ubekwayu nia athum kinda cen ku dini mi vupo?
Kan adwoko kadok wang’ penji acel kende nia “eyo,” ubekwayu atim alokaloka ma kani m’umbe galu?
I lembe maeno ceke, mak yub ma biketho ibidong’ ku pidocwiny ma cuu man ma binyutho nia ibegwoko bedoleng’ peri ni Yehova.
Icopo timo ang’o ka jukwayu nia imii ajok pi nitielo tic ma dini moko ubetimo?
DHANU MOKO BEYERO KUMAE: “Kara atuc nicero ba lemandha cuu, kwayu akeng’ey lembe ma ju m’ujay gibeyero iwi Jumulembe pa Yehova.”
Nyo eno tie paru mi rieko? Pirang’o iyero kumeno?
I ADUNDO
Pi nigwoko bedoleng’ mwa ni Yehova, wacikara ngo nidikara kadok nyanok de ku ju ma gimito giwingwa.
Penji mi poyowic
Pirang’o wacikara ngo niwinjo lembe moko ci mi ju m’ujay i kum lemandha?
Ukwayu watim ang’o tek wang’eyo nia umego kunoke nyamego moko utimo dubo ma pek?
Wacopo nyutho nenedi nia wabeworo lembe ma Yehova uwacu nia wawok cen kud i dini mi vupo?
TIM SAYUSAC
Nen gin m’iromo timo ka dhanu ubemewo lembe mi vupo iwi Jumulembe pa Yehova.
Icopo ng’eyo nenedi nia dilo kunoke dikiri moko ubediko cinge ku Babeli ma diti?
Judhogwa moko gibed gitimo ang’o kara nia ginyoth yiyoyic mwa?
I kpawa ma thiwie tie “Acaku yenyo Mungu niai i thino para,” som lembe iwi japadri moko mi dini mi Shinto i Japan m’utuc niwok cen kud i dini mi ndra.
“Biblia loko kwo” (Otkur ma Wiw, nindo 1, dwi mir 7, 2011, mi français)