Ng’atu ma mio ku berocwiny, mugisa bikwanye

NIAI con, lam kunoke giramia utie thenge acel ma zoo mi thier mandha. Nyithindho mir Israel gibed gimio lam mi lei, man Jukristu ke ging’eyiri maber nikum “lam mi pak” ma gimio. Re, lam mange bende nuti ma foyo i Mungu lee. (Ebr. 13:15, 16) Lam maeno ketho ng’atu m’ubemie, nwang’u anyong’a man mugisa, calu ma wabineno i lapor m’ulubo e.

Con, jaratic pa Yehova moko ma nyinge Hana, ugam umito lee mandha nia enwang’ awiya, re lembene ucopere ngo ire. Pieno, eng’olo ni Yehova i rwo pare nia, kan ebinyolo nyathin moko ma nico, ‘ebilund mie ni Yehova i nindo ceke mi [kwo]” pa nyathin ne. (1 Sam. 1:10, 11) I ng’eye, Hana unwang’u mugisa, man enyolo nyathin ma nico ma nyinge Samwel. Kinde ma Samwel ukwiro cak, Hana utere i hema mi thier, tap calu m’elar eng’olo. Yehova upoko mugisa iwi Hana pi pidoic m’emio ko nyathin pare. Edok enwang’u rwom mi nyolo awiya mange abic, man Samwel ke udoko ni jabila man acel m’ikind dhanu m’ugoro Biblia.—1 Sam. 2:21.

Calu Hana man Samuel, tin bende Jukristu gitie ku rwom mi tio ku kwo migi i tic pa Jacwic migi. Yesu ugam ung’olo nia, wabinwang’u mugisa lee mandha pi miiri ceke ma wabemiara ko pi niworo Yehova.—Mk. 10:28-30.

I rundi ma kwong’a, Jakristu moko ma dhaku ma nyinge bino Dorka, ung’eyere lee mandha pi “tic ma ber ku tic ma ni jucan m’etimo,” niwacu ebed emiere nikonyo jumange. Re, lembe marac utie nia “kume make, man etho.” Lembuno unyayu can i dhanu ceke mi cokiri. Kinde ma julub giwinjo nia Petro ni ceng’ini i ng’ombuca, gikwaye nia ekebin nyapio pio. Kepar pir anyong’a ma gibino ko kinde ma gineno Petro ucero Dorka! Eno utie cer ma kwong’a m’utimere nikadhu kud ibang’ jakwenda. (Tic mi Jukwenda 9:36-41) Mungu uwil ungo pi miiri pa Dorka. (Ebr. 6:10) Jukiewo pi berocwiny pare mi mio piny i Lembe pa Mungu kara ubed iwa ni lapor ma walubi.

Jakwenda Paulo bende uweko lapor maber akeca; ewodho saa pare ku bero cwinye pi jumange man edieng’ pigi. Ekiewo kumae ni Jukristu wadi mi Korinto: “Abilalu ndhu alala ku mutoro ma dit man abidaru tekna de piwu.” (2 Kor. 12:15) Lembe ma jakwenda Paulo unwang’u i kwo pare uketho etundo ninyang’ nia ka ng’atini ubemiere pi ju mange, enwang’u mutoro, man m’usagu zoo, enwang’u mugisa pa Yehova man Yehova jole.—Tic mi Jukwenda 20:24, 35.

Ubenen kamaleng’ nia anyong’a nego Yehova ka wabetio ku saa mwa man tego mwa pi Ker pare, man ka wabekonyo juyic wadwa. Nyo yo mange de nuti ma wacopo nitielo ko tic mi rweyo lembanyong’a mi Ker? Eyo! M’uweko nitio ku saa mwa man tego mwa pi jumange, wacopo bende niyungo Mungu nikadhu kud i giramia mwa ma ku berocwiny. Jubed jutio ku giramianegi pi tic mi rweyo lembanyong’a i ng’om ngung’, m’uketho i ie bende nikonyo jumisioner ku jurutic mange masegi mi saa ceke. Giramia eno konyo bende tic mi yiko man mi loko girasoma mwa i dhok ma tung’ tung’ man video. Bende, ekonyo ju ma lembe ma rek uwok i wigi, man giedo mi Ot Ker manyen. Watie ku tegocwiny nia ng’atu ma mio ku berocwiny, mugisa bikwanye. M’umedo maeno, ka wabemio piny mwa ma pigi tek ni Yehova, eca nwang’u wabeyunge.—Rie. 3:9; 22:9.

Yo Ma Tung’ Tung’ M’iromo Mio Ko Giramia Pi Tic Mi Ker I Ng’om zoo

Calu i rundi pa Paulo, tin bende dhanu dupa ‘gibed gikoyo piny moko i kakanpiny’, kunoke gibed gikanu sente moko, man gibole i sanduku mi giramia i cokiri, ma jugoro i kume nia “Tic mi Ker i ng’om zoo.” (1 Kor. 16:2) Kubang’ thum pa dwi, cokiriman beoro giramia maeno i biro mi filial mi Jumulembe pa Yehova pa Yehova m’ubeneno wi tic i ng’om migi. Re, iromo bende nioro giramia peri wang’ acel ni dikiri ma Jumulembe pa Yehova gitio ko i ng’om m’ibedo i ie. Pi ning’eyo nying’ dikirine, wakwayu ilwong’ kunoke ikiew ni biro mi filial mwu. Iromo nwang’u adres mi birone i www.pr418.com. Nimakere ku cik mi ng’om m’inweng’iri i ie, kit giramia m’icopo oro romo ketho i ie:

GIRAMIA MI SENTE WANG’ ACEL

Iromo oro sente peri wang’ acel i yo mir elektronik nikadhu kud i bank kunoke karte mi bank. I filial moko, ecopere bende nitio ku jw.org kunoke kusika mange ma jung’io.
Giramia mi sente ku kume. Kan imio sente ku kume, ore ku waraga moko i kume m’unyutho nia sentene utie giramia.

GIRAMIA MA JULAR JUPANGU PIRE CON CON

M’uweko giramia mi sente, yo mange bende nuti ma juromo tio ko pi nitielo tic mi Ker i ng’om zoo. Yone jurieyogi piny no. Re, kan imaru itii ku yone moko, wakwayu ikelar inyang’ i biro mi filial m’ubeneno wi tic i ng’om mwu pi ning’eyo nia yone makanigi m’ubetio i beng’wu. Bende, calu cik ku taks ukoc kubang’ ng’om, pire tie tek nia ikeweci ku dhanu moko m’ung’eyo cuu mandha lembe mi cik ku mi taks, kara gikonyi ing’ii yo moko ma cuu akeca pi nimio giramia peri.

Asiranse: Iromo kiewo nia kan itho, sente mir asiranse mi kwo, kunoke mi pansio peri, bibedo ku nying’ dikiri ma Jumulembe pa Yehova gitio ko i ng’om mwu.

Kont mi bank: Iromo kiewo nia ing’ei tho peri, sente mi kont peri mi bank bidong’ ku nying’ dikiri ma Jumulembe pa Yehova gitio ko i ng’om mwu, re nimakere ku cik mi bank mi ng’ombe.

Twero m’itie ko iwi sente: Icopo mio twero m’itie ko iwi sente (titres et obligations) ni dikiri ma Jumulembe pa Yehova gitio ko i ng’om mwu. Iromo mie wang’ acel kunoke iromo kiewo nia ebidong’ ni dikirine ing’ei tho peri.

Ng’om man ot: Irimo mio ng’om kunoke ot peri. Iromo mie wang’ acel, kunoke, kan etie ot m’ibedo i ie, iromo kiewo nia ibimediri nikwo i ie ka fodi itie kwo; re niai ceng’ m’ibitho i ie, otne bidong’ ni dikiri ma Jumulembe pa Yehova gitio ko i ng’om m’ini ie.

Testama: Iromo weko piny peri kunoke sente peri ni dikiri ma Jumulembe pa Yehova gitio ko i ng’om m’ini ie, nikadhu kud i testama ma jukiewo calku cik. Ng’atu m’utimo kumeno, Leta romo jwigo ire kum taks moko.

Kit giramia maeni julwong’ogi “Giramia ma jular jupangu pire con con” pilembe, ubekwayu nia ng’atu m’ubemie ular upang pi lembene i wang’e. Dhanu dupa m’umio kit giramia ma kumeni, gitundo nikonyo tic mwa mi Ker i ng’om ngung’, man gitundo ninwang’u bero moko m’uneno taks bende.

Pi ninyang’ lee, dii wi wec “Faire un don pour notre œuvre mondiale” ma nwang’ere i the mbaya moko ci mi jw.org, kunoke lwong’ biro mi filial mwu.