“Juyabu” dhu kitabu m’adola moko ma con

I ORO 1970, ju ma gisayu dong’ piny ma con ginwang’u kitabu m’adola moko m’unyothere i adhura mi Ein Gedi i Israel, yo reto mi dhu Nam kadu. Junwang’u kitabune kinde ma jubino golo piny i uvuru Sinagog moko m’uwang’ con saa ma junyotho adhura maeno, copere i kind oro 500 nicidho i oro 550 mi R.M. Kitabune unyothere lee dit uketho nisomo lembe m’i ie ubino tek, man niyabe ayaba de ubino lembe ma copere ngo. Enre ni kum bodho moko ma jumaku ko cal mi piny (Scanner en 3 D), jugam “juyabu” dhu kitabu maeno. Bodho maeno mi nivo ma malu ukonyojo nisomo kitabu m’adola maeno.

E junwang’u ang’o i kitabune? Junwang’u nia ekoro lembe mi Biblia, man etie ku verse moko ma nwang’ere i acaki mi buku mi Lembe mi Julawi. I versene moko junwang’u nyiguta ang’wen mi nying’ Mungu i dhok mi Juebrania. Junwang’u nia ebino kitabu moko ma jutio ko i kind oro 50 mi R.M, nicidho i oro 400 mi R.M, eno ubenyutho nia etie kitabu mi lembagora mi Juebrania m’utii nisagu kadok kitabu m’adola mi Qumran. I gazeti moko (The Jerusalem Post), jagor ma nyinge Gil Zohar ukiewo kumae: “Ma fodi junwang’u ngo kitabu m’adola mi Ein Gedi, jugam junwang’u kitabu m’adola mi Nam kadu (i kum oro 100 W.R.M.), man oro kago 1 000 i ng’eye, judok junwang’u kitabu m’adola mange ma julwong’o Aleppo Codex (i kum oro 930 R.M.). Jururieko giwacu nia kitabu m’adola maeno unyutho nia theng lembagora ma Jumasoreti gikiewo “utuc nigwokere cuu mandha pi oro ma dupa man kosa ma thindho thindho ma ju ma gigore gitimo uwilo ngo paru mi ie.”