Dwokowang’ penji mwu

◼ Nyo jurwei gicikiri nitio kud Internet pi nirweyo lembanyong’a kunoke niponjo Biblia ku dhanu mi ng’om mange?

Jurwei moko gibed gitio kud Internet pi ninwang’u dhanu ma giponj kugi Biblia i ng’om moko ma jukwero i ie tic mwa kunoke ma jurwei gitie nyanok i ie. Saa moko, matoke mabeco udaru ninwag’ere nikadhu kud i yo maeno. Ento, awic utie ka jurwei gibedikiri karacelo ku dhanu mi ng’om mange i wec ma juweco ko ku ng’atu acel acel kunoke ku dhanu dupa wang’ acel i yo mir Internet. (Som Tic Mwa mi Ker mi dwi mir 7, 2007, mba. 3.) Kadok yeny mwa tie nirweyo lembanyong’a ni dhanu ma cwinygi leng’ de, weco kugi nikadhu kud i yo maeno copo ketho umego kunoke nyamego ucak nitwio mer karacelo ku jurimo ma reco, man bende ku ju m’ujai ikum yioyic. (1 Kor. 1:19-25; Kol. 2:8) Bende, judong ng’om ma jucero kunoke jukwero i ie tic mi Ker, gibed gilubo kilili man gineno wi wec ceke ma juweco ku dhanu yor i yamu. Pieno, wec ma kumeno copo nikelo peko i kum umego ku nyimego ma ginwang’iri kuca. Pieno, jurwei gicikiri ngo nitio kud Internet pi nisayu dhanu mi ng’om mange kara girwei igi lembanyong’a.

Ka watundo nirweyo lembanyong’a ma wapangu ngo ni ng’atu moko m’uai i ng’om mange, wacikara ngo nimedo asu nirweyo ire kinde m’edaru nidok i ng’om pare m’umbe telowic ma tung’ niai kud i biro mi filial mi ng’ombe. Kakare nitimo kumeno, wacopo ninyutho ire kite m’eromo tio ko ku jw.org pi ninwang’u lembe mange kunoke kite m’ecopo niweco ko ku biro mi filial mi ng’om pare. Wacopo bende niketho cwinye nia ecidh i Ot Ker ma ceng’ni kude. Re, i ng’om moko, Udi Ker umbe. Kan emaru nia Jumulembe ma ceng’ni kude gibin giliewe, ukwayu wapong’ wi karatasi Veuillez suivre l’intérêt (S-43), man wamie ibang’ jagor mi cokiri mwa; en ke ebilund ore nikadhu kud i jw.org. Calu Biro mi filial ma neno wi tic i ng’om ma ng’atine bedo i ie ung’eyo kit lembe masegi m’ubetimere i ng’ombe, birone copo nimio ire maleng’ mandha kony mi tipo.​—Som Tic Mwa mi Ker mi dwi mir 6, 2014, mba. 7, ku Tic Mwa mi Ker mi dwi mir 11 2011, mba. 2.

Ka ng’atu ma wabed waliewo njaa udok i ng’om mange kunoke nyo wacikuponjo Biblia ku ng’atu moko mi ng’om mange ma wang’eyo ndhu nikadhu kud i Internet kende, wacikara nilubo telowic ma nwang’ere malu no. Re, wacopo medo asu nirweyo ire kunoke niponjo kude nitundo jurwei mi ng’om m’enwang’ere i ie binwang’e. Re, kan ebedo i ng’om ma jucero kunoke jukwero i ie tic mwa, wacikara nibedo ku wang’wa lee kinde ma wabeweco kude iwi lembe mi Biblia nikadhu kud i waraga, telefon, kunoke Internet.​—Mat. 10:16.